ބުޑަޕެސްޓް، ހަންގޭރީ (ނޮވެމްބަރު 20) - ޔުއެފާ ނޭޝަންސް ލީގުގައި ރޭ ކުޅުނު ލީގު އޭގެ ގްރޫޕްތަކުގެ ފަހު މެޗުން ނެދަލެންޑްސް އާއި ޖަރުމަނަށް މޮޅެއް ނުލިބި ޕޮއިންޓަކުން ފުއްދާލަންޖެހިއްޖެ އެވެ.
ލީގު އޭގެ ގްރޫޕް ތިނެއްގައި ރޭ ހަންގޭރީން ވަނީ ފަހު ވަގުތު ޕެނަލްޓީއެއް ކާމިޔާބުކޮށް 1-1 އިން ޖަރުމަނާ އެއްވަރުކޮށްފަ އެވެ. އެ ގްރޫޕްގައި ރޭ ނެދަލެންޑްސް އިން ކުޅުނު މެޗުން ވަނީ 1-1 އިން ބޮސްނިއާއާ އެއްވަރުވެފަ އެވެ.
މި ގްރޫޕްގެ އެއް ވަނަ ހޯދީ ހަ މެޗުން 14 ޕޮއިންޓާ އެކު ޖަރުމަނެވެ. ދެ ވަނަ އަށް ދިޔައީ، ހަ މެޗުން ނުވަ ޕޮއިންޓް ހޯދި ނެދަލެންޑްސް އެވެ. ކުއާޓާ ފައިނަލުން ފުރުސަތު ހޯދީ ޖަރުމަނާއި ނެދަލެންޑްސް އެވެ. ތިން ވަނައިގައި ނިންމީ ހަ މެޗުން ހަ ޕޮއިންޓް ލިބުނު ހަންގޭރީ އެވެ. ހަ މެޗުން ދެ ޕޮއިންޓް ލިބި، ގްރޫޕްގެ ފުލުން ނިންމާލި ބޮސްނިއާ ވަނީ ލީގު ބީ އަށް ރެލިގޭޓްވެފަ އެވެ.
ނެދަލެންޑްސް އިން ކެޕްޓަން ވާޖިލް ވެން ޑައިކް ނުލައި ކުޅުނު މެޗުގައި އެ ޓީމަށް ލީޑުނަގައިދިނީ ފުރަތަމަ ހާފުގައި ބްރިއަން ބްރޮބީ ޖެހި ގޯލުންނެވެ. ދެ ވަނަ ހާފުގައި ބޮސްނިއާ އަށް އެއްވަރުކޮށްދިނީ އެރްމެޑީން ޑެމިރޯވިޗް އެވެ. މި މެޗުގައި ނެދަލެންޑްސް އަށް ލަނޑު ޖަހާނެ ރަނގަޅު ފުރުސަތުތަކެއް ލިބި ބޭނުމެއް ނުކުރެވުނެވެ.
ފެލިކްސް އެންމެކާ ޖެހި ގޯލުން ޖަރުމަނުން ވަނީ ހަންގޭރީ ދަނޑުގައި ލީޑުނަގައިފަ އެވެ. މިއީ އެންމެކާ ގައުމީ ޓީމަށް ޖަހައިދިން ފުރަތަމަ ގޯލެވެ. ހަންގޭރީން އެއްވަރުކުރީ އިތުރު ވަގުތުގެ ނުވަ ވަަނަ މިނިޓްގައި ޑޮމިިނިކް ސޮބޯސްލާއި ޖެހި ޕެނަލްޓީންނެވެ. މިއީ، ހަންގޭރީގެ މިހައިލީ ކާޓާ ޖެހި ބޯޅައެއް ޖަރުމަނުގެ ރޮބިން ކޮކް އަތުގައި ޖެހުމުން، ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން، ދަނޑުގައި ހުރި މޮނީޓަރުން ބަލާފައި ދިން ޕެނަލްޓީ އެކެވެ.
