މަތިންދާ ބޯޓު އުފައްދާ އެމެރިކާގެ ބޮއިން ކުންފުނީގެ މައްޗަށް ދައުވާ އުފުލަން އެމެރިކާގެ ޕްރޮސެކިއުޓަރުން ލަފާ ދީފައިވާ ކަމަށް ރިޕޯޓްތައް ބުނެފި އެވެ.
ރޮއިޓާސްއިން ބުނީ ބޮއިންގެ މައްޗަށް ކުރެވޭ ތުހުމަތުތަކާ ގުޅިގެން އެ ކުންފުނީގެ މައްޗަށް ދައުވާ ކުރަން ދިން ލަފާގެ މައްޗަށް އެމެރިކާގެ ޑިޕާޓްމަންޓް އޮފް ޖަސްޓިސްއިން ޖުލައި 7، ގައި ގޮތެއް ނިންމާނެ އެވެ.
ބޮއިންގެ މައްޗަށް ދައުވާ ކުރަނީ އެ ކުންފުނިން އުފެއްދި މަތިންދާ ބޯޓެއް 2018 އަދި 2019 ގައި ވެއްޓުނު ހާދިސާއާ ގުޅިގެން 2021 ގައި ހެދި ސެޓްލްމަންޓް އެއްބަސްވުމާ ހިލާފުވެފައިވާ ކަމަށް ބުނެ އެވެ.
ބޮއިންގެ މައްޗަށް އެ ހާދިސާއާ ގުޅިގެން ދައުވާ ނުކުރަން ނިންމީ 2.5 ބިލިއަން ޑޮލަރު ދައްކަން އެއްބަސްވުމާ ގުޅިގެންނެވެ.
މިދިޔަ ހަފްތާގައި ވެއްޓުނު ދެ ބޯޓުގައި ތިބި މީހުންގެ އާއިލާތަކުން ވަނީ ބޮއިން އަތުން ބަދަލުގެ ގޮތުގައި 25 ބިލިއަން ޑޮލަރު ހޯދުމާއެކު ޖިނާއީ ދައުވާ އުފުލަން އެދިފަ އެވެ.
މިކަމާ ގުޅިގެން ބޮއިންގެ ރަސްމީ ބަހެއް މިހާތަނަށް ލިބިފައެއް ނުވެ އެވެ. ނަމަވެސް ސެޓްލްމަންޓް އެއްބަސްވުމާ ހިލާފު ނުވާ ކަމަށް މީގެ ކުރިން އެ ކުންފުނިން ބުނި އެވެ.
ބޮއިންއިން އުފައްދާފައިވާ ބައެއް މަތިންދާ ބޯޓުތަކުގެ މައްސަލަތައް ފަހަކަށް އައިސް ފެންމަތިވާން ވަނީ ފަށާފަ އެވެ. އެގޮތުން އެ ކުންފުނީގެ ފަރުވާ ކުޑަކަމުން އެތައް ބައެއްގެ ފުރާނައަށް ނުރައްކާވަމުންދާ ކަމަށް ވެސް މީހުން ތުހުމަތު ކުރެ އެވެ.
