އައްޑޫ ސިޓީ ހުޅުމީދޫ މިފްކޯ މަސް ފެކްޓްރީގައި މަސްވެރިން ކުރަމުންދާ އިހުތިޖާޖުގެ ތެރެއިން އެ ފެކްޓްރީގެ ކަރަންޓު ކަނޑާލާފައިވާކަމަށާއި، ކެންޓީނު ތަޅުލާފައި ހުއްޓައި ކުޑަދޮރުން ވަދެފައިވާ ކަމަށް މިފްކޯއިން މިއަދު ބުނެފި އެވެ.
ދައުލަތުގެ މަސް ކުންފުނި، މިފްކޯއިން މިއަދު މީޑިއާތަކަށް ފޮނުވި މެސެޖެއްގައި ބުނީ މުޒާހަރާގެ ސަބަބުން އައްޑޫ ފިޝަރީޒް ކޮމްޕްލެކްސްގެ އޮޕަރޭޝަން ވަގުތީ ގޮތުން މެދުކެނޑިފައިވާ ކަމަށެވެ. އަދި މިއަދު ހަވީރު 4:00 ގެ ފަހުން ފެކްޓްރީން މުވައްޒަފުން ނެރެ، އޮޑިވެރިންނާއި މަސްވެރިންގެ ބެލުމުގެ ދަށަށް އެ ފެކްޓްރީ ގެންދާނެކަމަށް މަސްވެރިން އިންޒާރުދީފައިވާ ކަމަށް ވެސް އެ ކުންފުނިން ބުންޏެވެ.
އިއްޔެ މުޒާހަރާ ކުރި ވަގުތު ފެކްޓީގެ ސްޓާފް ކެންޓީން ތަޅުލާގައި ހުއްޓައި ކުޑަދޮރުން ވަދެ، އެ ތަނުގައި ހުރި ކާއެއްޗެހި ބޭނުންކޮށްފައިވާކަމަށް ވެސް މިފްކޯއިން ބުންޏެވެ. އަދި ފެކްޓްރީގެ މުވައްޒަފުން ތިބޭ އެކޮމޮޑޭޝަން ބްލޮކުން ކަރަންޓު ކަނޑައިލުމުގެ ސަބަބުން ރޭ މުވައްޒަފުން ނިދީ ބޭރުގައި ސަތަރި އަޅައިގެން ކަމަށް މިފްކޯއިން މައުލޫމާތުދެ އެވެ.
"ރެއިން ފެށިގެން އޭއެފްސީ މުވައްޒަފުން ނިދަނީ ބޭރުގަ ސަތަރި އަޅައިގެން. މުވައްޒަފުންގެ ޒަރޫރީ ބޭނުންތައް ވަނީ ނުފުދިފަ. ކެއިން ބުއިމާ ފާހަނަކުރުން ފަދަ ކަންކަން،" މިފްކޯގެ މެސެޖުގައިވެ އެވެ.
މީގެ އިތުރުން ރޭގައި ފުލުހުންގެ އެދުމުގެ މަތިން ފެކްޓްރީއަށް ކަރަންޓު ދިނުމުން މުޒާހަރާގެ މަސްލަހަތު ގެއްލި، ތަނާއި މުދަލަށް އަދި މުވައްޒަފުންނަށް އެކަމުގެ ސަބަބުން ގެއްލުން ލިބިދާނެ ފަދަ ހާލަތަކަށް ހިނގައިދާނެކަމަށް ކުންފުންޏަށް ގަބޫލުކުރެވުމުން ފެކްޓްރީން ކަރަންޓު ކަނޑާލީ ކަމަށް މިފްކޯއިން ބުންޏެވެ.
"މަސްވެރިންގެ ޑިމާންޑްއަކީ އެކޮމޮޑޭޝަން، އެޑްމިން ބިލްޑިންގް، ކެފެޓީރިއާއިން ކަރަންޑު ކަނޑާލާފަ ބެހެއްޓުން،" މިފްކޯއިން ބުނެ އެވެ.
އީދު ބަންދަށް މިފްކޯއިން 46 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް އެ ކުންފުނިން މައުލޫމާތުދެ އެވެ. އަދި ބާކީ ފައިސާ ދޫކުރުމާއި މެދު ހެދޭނެ ގޮތެއް ބަލައި، ސަރުކާރާއެކު މަޝްވަރާކޮށްގެން އަވަސް ގޮތެއް ހޯދާނެ ކަމަށް އެ ކުންފުނިން ބުނެ އެވެ.
މިފްކޯއިން ވަނީ މަސްވެރިންގެ މުޒާހަރާ ސުލްހަވެރިކަމާއެކު ކުރިއަށް ގެންދިއުމަށް އެދިފަ އެވެ.
އެގޮތުން އެ ކުންފުނީގެ މުދަލާއި މުވައްޒަފުންގެ ޒަރޫރީ ބޭނުންތައް ނުފުދި، ގެއްލުން ލިބޭ ގޮތަށް ކަންތައް ނުކުރުމަށް ވެސް އެ ކުންފުނިން އިލްތިމާސްކުރެ އެވެ. އަދި މުވައްޒަފުންގެ ހައްގުގައި މިފްކޯއިން ކަމާބެހޭ ފަރާތްތަކާއި ގުޅިގެން ކުރަންޖެހުނު ކޮންމެ މަސައްކަތެއް ކުރާނެ ކަމަށް މިފްކޯއިން ބުންޏެވެ.
އައްޑޫ ފިޝަރީޒް ކޮމްޕްލެކްސްގައި ފުލުހުން ހަރަކާތްތެރިވި ނަމަވެސް، މުޒާހަރާއަށް އެއްވެސް ހުރަހެއް އެޅުމަށް އެ އިދާރާއިން ނިންމާފައެއް ނުވެ އެވެ.
ފުލުހުން ވަނީ އެ ސަރަހައްދުގެ ރައްކާތެރިކަން ކަށަވަރުކުރުމަށް އެ އިދާރާއިން އަޅާ ފިޔަވަޅުތަކަށް މަސްވެރިންގެ ފަރާތުން އެއްބާރުލުންދިނުމަށް އެދިފަ އެވެ. އަދި އެގޮތަށް ކުރިއަށްގެންދާ އިހުތިޖާޖުތަކުގައި ގާނޫނާއި ގަވާއިދުތަކަށް ހުރުމަތްތެރިކޮށް ހިތައި އާންމު މަސްލަހަތު އިސްކުރުމަށް ފުލުހުން ވަނީ އިލްތިމާސްކޮށްފަ އެވެ.
