އަންނަ މަހު ފްރާންސްގެ ޕެރިހުގައި ފަށާ އޮލިމްޕިކްސްގެ ސްވިމިން އިވެންޓްގައި ރާއްޖޭން ވާދަކުރާނީ މުހައްމަދު އާން ހުސައިން އަދި ޢާއިޝަތު އުލްޔާ ޝާއިގް ކަމަށް ސްވިމިން އެސޯސިއޭޝަން އިން ހާމަކޮށްފި އެވެ.
އޮލިމްޕިކްސްގައި ސްވިމިން އިން ރާއްޖެ އަށް ލިބިފައިވާ މި ދެ ފުރުސަތަކީ ޔުނިވާސިލިޓީ ޕްލޭސަސްގެ ދެ ފުރުސަތެެވެ. މާނަ އަކީ ކޮލިފައިނުވާ ގައުމުތަކަށް ދޭ ފުރުސަތުތަކުގެ ތެރެއިން ފުރުސަތެވެ.
އެ ގޮތުން، އޮލިމްޕިކްސް އަށް ދާނެ ދިވެހި ދެ ފެތުންތެރިން ކަނޑައަޅަން އަމަލުކުރަން ޖެހޭ ގޮތަކީ، ފެތުމުގެ ބައިނަލްއަގުވާމީ ޖަމިއްޔާ، ވޯލްޑް އެކުއަޓިކްސް އިން ކަނޑައަޅާފައިވާ އުސޫލުތަކަށް ބަލައިގެންނެވެ. އެއީ، ފެތުމުގެ ވަކި މުބާރާތްތަކެއްގައި ވާދަކުރި ދިވެހި ފެތުންތެރިންގެ ތެރެއިން އެންމެ މަތިން ވޯލްޑް އެކުއަޓިކްސް ސްވިމިން ޕޮއިންޓް ލިބޭ އެތުލީޓުންނަށް ފުރުސަތު ލިބޭ ގޮތަށެވެ.
ސްވިމިން އެސޯސިއޭޝަނުން ބުނީ، އޮލިމްޕިކްސް ވާދަކުރާނެ ފެތުންތެރިން ކަނޑައަޅުމުގައި ޢަމަލުކުރާނެ އުޞޫލުތަކާއި މިންގަނޑުތައް ކަނޑައަޅަނީ ވޯލްޑް އެކުއަޓިކްސް އިން ކަމަށެވެ.
މިއީ ހުނަރުވެރި ފެތުންތެރިޔާ، އާން އަށް ލިބުނު ބޮޑު ފުރުސަތެކެވެ. އަނިޔާއިން ރިކަވާވެ، މުބާރާތްތަކުގަައި ވާދަކުރަން ފެށި ފަހުން އޭނާ އަންނަނީ ގިނަ ގައުމީ ރެކޯޑްތަކެއް ވެސް ހަދަމުންނެވެ. އޮސްޓްރޭލިއާގައި ޓްރެއިނިން ވެސް ކުރިއަށް ގެންދަމުން އަންނަ އުލްޔާ އަކީ ވެސް މި ފަހުން އެންމެ ބޮޑު ކުރިއެރުމެއް ހޯދި އެތުލީޓެވެ.
މި ފަަހަރުގެ އޮލިމްޕިކްސް އަކީ ކުޅިވަރުގެ އަދަދުގެ ނިސްބަތުން ބަލާއިރު ރާއްޖޭން އެންމެ ބޮޑު ކޮންޓިންޖެންޓް އޮލިމްޕިކްސް އަށް ދާނެ ފަހަރެވެ. މި ފަހަރުގެ އޮލިމްޕިކްސްގައި ރާއްޖޭން ހަތަރު ކުޅިވަރަކުން ވާދަކުރާނެ އެވެ. އެއީ، އެތުލެޓިކްސްގެ އިތުރުން ބެޑްމިންޓަން، ޓޭބަލް ޓެނިސް އަދި ފެތުމެވެ.
ޓޭބަލް ޓެނިސް ތަރި ފާތިމަތު ދީމާ އަލީ އަކީ، ރާއްޖޭން އޮލިމްޕިކްސް އަށް ކޮލިފައިވި ފުރަތަމަ އެތުލީޓެވެ. އިބާދުﷲ އާދަމް އާއި ބެޑްމިންޓަން ތަރި، ފާތިމަތު ނަބާހާ އަދި ސްވިމިންގެ ދެ އެތުލީޓުން ކަމަށްވާ އާން އާއި އުލްޔާ، އޮލިމްޕިކްސްގައި ވާދަކުރަނީ، ޓްރައިޕާޓައިޓް އިންވިޓޭޝަނަލް ފުރުސަތެއްގަ އެވެ.
އޮލިމްޕިކްސް އަށް ރާއްޖޭން ޗެފް ޑި މިޝަނަރަކަށް ހަމަޖެއްސީ ޓޭބަލް ޓެނިސް އެސޯސިއޭޝަންގެ ރައީސް އަލީ ރަޝީދު (އައްޔަ) އެވެ.
