ޔޯގާ، ޔޯގާއަކަށް ވަނީ ހިންދޫއިން ގަބޫލު ކުރާ އިރުގެ ކަލާންގެއަށް އަޅުކަން ކުރާބައި އޭގައި ހިމެނެނުނީމާ ކަމަށާއި އެބައި ނުހިމެނޭ ނަމަ ޔޯގާއަކީ ކަސްރަތު ކަމަށް ޝެއިހް އަލީ ޒައިދު ވިދާޅުވެއްޖެ އެވެ.
އިންޑިއާ އެމްބަސީގައި އިއްޔެ ފާހަގަ ކުރި އިންޓަނޭޝަނަލް ޔޯގާ ޑޭއަށްފަހު، ކުރިން ޔޯގާ ހެދުން ކުށްވެރި ކުރި ބައެއް އިލްމުވެރިން މިހާރު އެކަން ކުށްވެރިނުކުރާތީ ފާޑުކިޔުން އަމާޒުވެފައި އޮއްވައި، ޒައިދު އެކްސްގައި ކުރެއްވި ޕޯސްޓެއްގައި ވިދާޅުވީ، އޭނާގެ ނަސޭހަތަކީ ޔޯގާގެ ބަދަލުގައި ކަސްރަތު ކުރުން ކަމަށެވެ.
"ޔޯގާ ޔޯގާއަކަށް ވަނީ [ހިންދޫއިން ގަބޫލު ކުރާ] އިރުގެ ކަލާނގެ ތަޤްދީސް ކުރާ، ސްޕިރިޗުއަލް ބައިވެސް އޭގައި ހިމެނުނީމަ، [ނަޢޫޒު ބިއްލާހި] އެބައި ނުހިމަނަންޏާ އެއީ ކަސްރަތު،" ޒައިދުގެ ޕޯސްޓުގައި ލިޔުއްވާފައިވެ އެވެ.
ޒައިދު ވިދާޅުވެފައި ވަނީ އިންޑިއަން ހައިކޮމިޝަނުން ޔޯގާޑޭގެ ނަމުގައި ހިންގާ ހަރަކާތަކީ ދަންތުރައެއް ކަމަށެވެ.
އިންޑިއާ އެމްބަސީގައި އިއްޔެ ޔޯގާ ހަދަނީ:
ޔޯގާ ދުވަސް ފާހަގަކުރުމަށް 2021 ވަނަ އަހަރު ގަލޮޅު ދަނޑުގައި ބޭއްވި ހަރަކާތަށް އޭރު ބަޔަކު ހުރަސް އަޅައި ހުއްޓުވި އެވެ. އޭގެތެރޭގައި މިހާރުގެ ސަރުކާރުގެ އިސް ބައެއް މަގާމުތަކުގައި ތިއްބެވި ބޭފުޅުންނާއި ޕީއެންސީގެ މަޖިލިސް މެންބަރުން ވެސް ހިމެނިވަޑައިގެންނެވި އެވެ.
ޔޯގާއާ ގުޅިގެން ޒައިދު ރޭ ކުރެއްވި ޕޯސްޓަށް ބައެއް މީހުން ފާޑު ވެސް ކިޔެވެ. އެގޮތުން ބައެއް މީހުން ތުހުމަތު ކުރާ ގޮތުގައި ޔޯގާ ދުވަސް ރާއްޖޭގައި ފާހަގަ ކުރުމާ ގުޅިގެން ޒައިދު މިފަހަރު ކުރެއްވި ޕޯސްޓުގައި ސްޕިރިޗުއަލް ބައި ނުހިމެނެންޏާ ޔޯގާއަކީ ކަސްރަތު ކަމަށް ބުނެފައި ވަނީ ސިޔާސީ ގޮތުން ޒައިދު ގަބޫލުކުރާ ސަރުކާރެއް ވެރިކަމުގައި އޮތުމުންނެވެ.
ޒައިދުގެ ޕޯސްޓަށް އާންމުންގެ ފާޑުކިޔުން އަމާޒުވުމުން އޭނާ ވަނީ އެކަމާ ގުޅޭގޮތުން އިތުރު ދެ ޕޯސްޓެއް ކުރައްވައިފަ އެވެ. ފަހުން ކުރެއްވި ޕޯސްޓުގައި ޒައިދު ވިދާޅުވެފައި ވަނީ "ހިންދޫ ދީނުގައި އެ ފަތުރާ ގޮތަށް ޔޯގާގެ ބާތިލްކަމާއި، އޭގެ ނުބައި ކަމާއި، ހަރާމަކްނަ، އަދި އެފަދަ ކަމެއް އިސްލާމީ ގައުމުތަކުގައި ބޭއްވިގެން ނުވާނޭ ކަމާމެދު" ހިތުގައި އެއްވެސް ޝައްކެއް ނެތް ކަމަށެވެ.
އޭގެފަހުން ދެން ކުރެއްވި ޕޯސްޓުގައި ޒައިދު ވަނީ ޔޯގާގެ ހުކުމަށް އެއްވެސް ބަދަލެއް ނާންނަ ކަމަށް ވިދާޅުވެފަ އެވެ. އެގޮތުން ހިންދޫ ޔޯގާއަކީ އޭރުވެސް މިހާރުވެސް އިސްލާމީ އެއްކައުވަންތަ ކުރުމުގެ އަސާސްއާ ހިލާފު އަމަލެއް ކަމަށާއި އެކަމާ މުސްލިމުން ދުރުހެލި ވާންޖެހޭ ކަމަށް ޒައިދުގެ ޕޯސްޓުގައި ލިޔުއްވާފައިވެ އެވެ. ޒައިދު ވަނީ މި ޕޯސްޓު އަލުން ރީޕޯސްޓު ވެސް ކުރައްވައިފަ އެވެ.
ރާއްޖޭގައި އިއްޔެ ޔޯގާ ދުވަސް ފާހަގަކުރި ނަމަވެސް އާންމުކޮށް ޔޯގާ ދުވަސް ފާހަގަ ކުރަނީ ޖޫން މަހުގެ 21 ވަނަ ދުވަހު އެވެ. އެއީ އުތުރު އިރުދު [އިރުދެބައިހަމައާ އެންމެ އުތުރަށް ދާ ދުވަސް ނުވަތަ ސޮލްސްޓައިސް] ދިމާވާ ދުވަހެވެ.
