އެޓަލަންޓާ (ޖޫން 21) - ކެނަޑާ 2-0 ގެ ނަތީޖާ އަކުން ބަލިކޮށް، އެންމެ ފަހުގެ ޗެމްޕިއަން އާޖެންޓީނާ އިން ކޮޕަ އެމެރިކާގެ މި ފަަހަރުގެ މުބާރާތް މޮޅަކުން ފަށައިފި އެވެ.
މި މެޗު ފަށައިގެން ފުރަތަމަ 10 މިނެޓުގެ ތެރޭގައި އާޖެންޓީނާ އިން ކެނަޑާގެ ހާފަށް ބާރުބޮޑުކޮށް ގިނަ ހަމަލާތަކެއް އުފެއްދޭތޯ މަސައްކަތްކުރި ނަމަވެސް, ކެނަޑާގެ ޑިފެންޑަރުން ވަނީ އެކަމަށް ސަމާލުވެ, އާޖެންޓީނާގެ އެޓޭކުތައް ހުއްޓުވައިފަ އެވެ. އަދި އޭގެ ފަހުން ކެނަޑާ ކުޅުންތެރިން މަޑުމަޑުން މެޗުގެ ތެރެއަށް ވަދެ, އާޖެންޓީނާގެ ގޯލަށް ނުރައްކާތެރި ކުރެވޭތޯ މަސައްކަތްކުރި އެވެ.
މެޗުގެ 39 ވަނަ މިނެޓުގައި އާޖެންޓީނާގެ އަލެކްސިސް މެކް އަލިސްޓާ އަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. އެންހެލް ޑި މާރިއާ ނަގާދިން ހުރަސް މުޅިން ހުސްކޮށް ހުރެ މެކް އަލިސްޓާ ބޮލުން ފޮނުވާލި ނަމަވެސް ކެނަޑާގެ ކީޕަރު މެކްސިމް ކްރެޕައު ވަނީ ދިފާއުކޮށްފަ އެވެ.
ފުރަތަމަ ހާފު ނިމުމުގެ ކުރިން ކެނަޑާގެ ސްޓެފަން އޮކާސިއޯ އަށް ވަނީ ލީޑު ނަގަން ރަނުގެ ފުރުސަތެއް ލިބި ބޭކާރުވެފަ އެވެ. އާޖެންޓީނާގެ އޭރިއާ ތެރެއިން މުޅިން ހުހަށްހުރެ އޮކާސިއޯ ފޮނުވާލި ބޯޅައިގެ ހުރަހަކަށްވީ އާޖެންޓީނާގެ ކީޕަރު އެމާލިއޯ މާޓިނޭޒް އެވެ.
ދެ ވަނަ ހާފު ފަށައިގެން ތިން ވަނަ މިނެޓުގައި އާޖެންޓީނާ އިން ވަނީ ލީޑު ނަގައިފަ އެވެ. މިއީ އޭރިއާ ތެރެއަށް ލިއޮނަލް މެސީ ދިން ޕާހެއްގެ ބޭނުން ހިފައި، މެކް އަލިސްޓާ، ދިން ބޯޅަ އަކުން އަލްވަރޭޒް ކާމިޔާބު ކުރި ލަނޑެކެވެ.
އޭގެ މިނެޓެއް ފަހުން އަލްވަރޭޒް އަށް ވަނީ ލީޑު ފުޅާ ކުރަން ވެސް ފުރުސަތު ލިބިފަ އެވެ. ކެނަޑާ ހާފުގެ ތެރެއިން އަލްވަރޭޒް ފޮނުވާލި ހަމަލާގެ ހުރަހަކަށްވީ ކެނަޑާގެ ކީޕަރު ކްރެޕައު އެވެ.
މެޗުގެ އެންމެ ހުސް ފުރުސަތު ލިބުނީ މެޗުގެ 65 ވަނަ މިނެޓުގައި އާޖެންޓީނާގެ ކެޕްޓަން މެސީ އަށެވެ. މުޅިން ހުސްކޮށް ކެނެޑާގެ އޭރިއާތެރެއަށް ވަދެ މެސީ ފޮނުވާލަން މަސައްކަތްކުރި ބޯޅައިގެ ހުރަހަކަށްވީ ވެސް މި މެޗުގައި ގިނަ ސޭވްތަކެއް ކުރި ކެނެޑާގެ ކީޕަރު ކްރެޕައު އެވެ. އޭގެ މިނެޓެއް ފަހުން ކެނަޑާގެ ޖޮނަތަން ޑޭވިސް އަށް ވެސް ވަނީ ގޯލު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. އާޖެންޓީނާގެ އޭރިއާ ތެރޭގައި މުޅިން ހުސްކޮށް ހުރެ ބޮލުން ޑޭވިސް ފޮނުވާލި ބޯޅަ ދިޔައީ ގޯލާ އަމާޒުނުވެ ބޭރަށެވެ.
މެޗުގެ 79 ވަނަ މިނެޓުގައި ވެސް މެސީ އަށް ވަނީ ގޯލު ޖަހަން ހުސް ފުރުސަތެއް ލިބި ބޭކާރުވެފަ އެވެ. މުޅިން ހުހަށް ކެނެޑާގެ އޭރިއާ ތެރެއަށްވަދެ މެސީ ފޮނުވާލި ހަމަލާ ދިޔައީ ގޯލާ އަމާޒުނުވެ އަރިމަތީ ދަނޑި ކައިރިން ބޭރަށެވެ.
އޭގެ ފަހުން މެޗުގެ 83 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ލަޓާރޯ މާޓިނޭޒް އަށް ވެސް ވަނީ ގޯލު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. މާޓިނޭޒް ފޮނުވާލި ބާރު ހަމަލާގެ ހުރަހަކަށްވީ ވެސް ކެނެޑާގެ ކީޕަރު ކްރެޕައު އެވެ.
އާޖެންޓީނާ އިން ލީޑު ފުޅާކުރީ 88 ވަނަ މިނެޓުގައި މާޓިނޭޒް ކާމިޔާބުކުރި ގޯލުންނެވެ. މިއީ މެސީ އޭރިއާ ތެރެއަށް ދިން ޕާހެއް މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން މާޓިނޭޒް ކާމިޔާބުކުރި ގޯލެކެވެ.
