ގެލްސެންކާޗެން (ޖޫން 20) - ޔޫރޯގެ ގުރޫޕް ބީގައި މިރޭ އެންމެ ފަހުގެ ޗެމްޕިއަން، އިޓަލީއާ ދެކޮޅަށް ނުކުންނައިރު، ސްޕެއިން އިން ތައްޔާރުވަނީ ރީތި ފުޓްބޯޅައެއް ކުޅޭ މެޗަކަށް ނޫން ކަމަށް އެ ޓީމުގެ ކޯޗު ލުއިސް ޑެ ލަ ފުއެންޓޭ ބުނެފި އެވެ.
ޔޫރަޕްގެ ވަރުގަދަ ދެ ބާރު މިރޭ ކުރިމަތިލާއިރު، މި ދެ ޓީމުވެސް ވަނީ ގުރޫޕްގައި ކުޅުނު ފުރަތަމަ މެޗުން މޮޅުވެފަ އެވެ. ސްޕެއިން ވަނީ ކްރޮއޭޝިއާ އަތުން 3-0 އިން މޮޅުވެފަ އެވެ. އިޓަލީ ވަނީ ފަހަތުން އަރައި 2-1 އިން އަލްބޭނިއާ އަތުން މޮޅުވެފަ އެވެ.
ލޫސިއާނޯ ސްޕަލެއްޓީގެ އިރުޝާދުގެ ދަށުން ކުޅެމުންދާ އިޓަލީން ފުރަތަމަ މެޗު ކާމިޔާބުކުރިއިރު، އެޓޭކިން ފުޓްބޯޅައެއް ފެނިގެންދިޔަ އެވެ.
އެހެން ނަމަވެސް، ސްޕެއިނުގެ ކޯޗު، ޑެލަ ފުއެންޓޭ ބުނީ މިރޭގެ މެޗަށް ތައްޔާރުވީ "ރީތި، ފުރިހަމަ މެޗަކަށް" ވާނެ ކަމަށް ބަލައިގެން ނޫން ކަމަށެވެ. އަދި ހުރިހާ ގޮތަކަށްވެސް ސްޕެއިން އޮތީ ތައްޔާރަށް ކަމަށެވެ.
"އަަހަރަމެންނަށް އެނގޭ އިޓަލީން ކުޅޭ ފުޓްބޯޅަ. އަދި އެ ޓީމަކީ ވަރަށް ކޮމްޕެޓިޓިވް ޓީމެއްކަންވެސް އެނގޭ. އަހަރެން މި ލަފާކުރަނީ އިޓަލީން މަސައްކަތް ކުރާނީ ޕޮޒެޝަން ހިފަހައްޓަން ކަމަށް. މިއީ ގުރޫޕް ސްޓޭޖުގެ އެންމެ މުހިންމު މެޗު،" ޑެ ލަ ފުއެންޓޭ ބުންޏެވެ.
"މިއީ ދެ ޓީމަށް ވެސް ނަތީޖާ މުހިންމު މެޗެއް، މާ ރީތި ކުޅުމެއް، ނޫނީ މެޗަކަށް ވުރެ އިސްކަންދޭނީ ނަތީޖާއަށް،"
މިރޭގެ މެޗުން މޮޅުވާ ޓީމަކަށް މި ގުރޫޕްގެ އެއް ވަނަ ޓީމުގެ ގޮތުގައި ގަދަ 16ގެ ބުރުން ޖާގަ ލިބޭނެެ އެވެ. މި ގުރޫޕްގައި ދެން އޮތް ދެ ޓީމު ކަމަށްވާ ކްރޮއޭޝިއާ އާއި އަލްބޭނިއާ އަށް މިހާތަނަށް ލިބިފައިވަނީ އެއް ޕޮއިންޓެވެ.
ޑެލަ ފުއެންޓޭ ބުނީ ސްޕެއިން އާއި އިޓަލީގެ ފަރާތުން ވެސް މިހާރު ފެނިގެންދަނީ ސަޕޯޓަރުން އުންމީދުކުރި ކަހަލަ ކުޅުމެއް ނޫން ކަމަށެވެ. އަދި ދެ ޓީމުގައިވެސް އެއްގޮތް ކަންތައްތައް އެބަހުރި ކަމަށް ޑެ ލަ ފުއެންޓޭ ގަބޫލުކުރެ އެވެ.
"ބައެއް ފަހަރު އިޓަލީގެ ޓީމަށް ވިސްނާލާއިރު، ހީވަނީ ލޯގަނޑެއް ކުރިމައްޗަށް ހުއްޓޭހެން. ދެ ޓީމުގައިވެސް އެއްގޮތް ކަންތައްތައް އެބަހުރި. އިޓަލީ ޓީމުގައި ޒުވާން ކުޅުންތެރިން ގިނަ،" ޑެލަ ފުއެންޓޭ ބުންޏެވެ.
އިޓަލީ އާއި ސްޕެއިންއަކީ ޔޫރޯގައި މުއްސަނދި ތާރީހެއް އޮތް ދެ ގައުމެވެ. މިރޭގެ މެޗަކީ 1960 ވަނަ އަހަރުގެ ފަހުން ޔޫރޯގައި މި ދެ ގައުމު ބައްދަލުކުރާ އަށް ވަނަ މެޗެވެ. އެންމެ ފަހުން ކުޅުނު ޔޫރޯގެ ފަސް މުބާރާތުގައިވެސް އިޓަލީ އާއި ސްޕެއިން ވަނީ ބައްދަލުކޮށްފަ އެވެ. އެންމެ ފަހުން ޔޫރޯގެ ސެމީ ފައިނަލުގައި އިޓަލީން ވަނީ ޕެނަލްޓީ ޖަހައިގެން ސްޕެއިން ބަލިކޮށްފަ އެވެ.
ސްޕެއިނާއި އިޓަލީ ކުޅޭ މެޗު ފަށާނީ މިރޭ 12 ޖަހާއިރު އެވެ.
