ފަލަސްތީނުގެ ރައްޔިތުންނާއި ދެކޮޅަށް އިޒްރޭލުން ހިންގަމުންދާ ގަތުލްއާންމުން އެމީހުން ސަލަމާތް ކޮށްދެއްވުމަށް އެދި މިއަދު ދުއާކުރުމަށް ހައްޖު ހުތުބާގައި ގޮވާލައިފި އެވެ.
މަސްޖިދުއް ނަމީރާގައި މިއަހަރުގެ ހައްޖު ހުތުބާ އިއްވައިދެއްވި އަލް މަސްޖިދުލް ހަރަމްގެ އިމާމް މަހާރް އަލް މުއައިއްލީ ވަނީ މިވަގުތު ފަލަސްތީނުގެ މުސްލިމުންގެ ހައްގުގައި ދުއާކުރުން އެންމެ މުނާސަބު ބަޔަކީ ހައްޖުވެރިން ކަމަށް ވިދާޅުވެފަ އެވެ. އަދި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަނިޔާތަކުން އެމީހުން ސަލާމަތްކޮށްދެއްވުމަށް އެދި ހައްޖު ދުވަހު ދުއާ ކުރުމަށް ހުތުބާގައި ގޮވާލި އެވެ.
މިއަހަރުގެ ހައްޖު ހުތުބާގައި ވަނީ އެއް ބަޔަކު އަނެއް ބައެއްގެ މަސްލަހަތު ރައްކާތެރިކުރުމަށާއި ފާސިދު ކަންކަމުން ދުރުހެލިވެ، އެއްބަޔަކު އަނެއްބަޔަކަށް އަނިޔާ ނުކުރުމަށާއި ގެއްލުން ނުދިނުމަށްވެސް ގޮވާލާފަ އެވެ.
ކީރިތި ރަސޫލާ މުހައްމަދު ސައްލަﷲ އަލައިހި ވަސައްލަމްގެ ޙައްޖަތުލް ވަދާއުގެ ހުތުބާގައި ހަދީޘް ކުރެއްވި ބައެއް ކަންކަމަށް ވެސް މިއަދުގެ ހައްޖު ހުތުބާގައި ވަނީ އަލިއަޅުވާލާފަ އެވެ. އޭގެ ތެރޭގައި އެކެއްގެ ލެޔާއި ނަފްސު، އަނެކާއަށް ހަރާމްވެގެންވާ ކަމާއި، މާތް ﷲ ރަސޫލު ބޭކަލުން ފޮނުއްވެވީ ދުނިޔެއިން ޖާހިލުކަމާއި އެއް ބަޔަކު އަނެއް ބައެއްގެ ލޭ އޮހޮރުވުން ހުއްޓުވުމަށްކަން ހުތުބާގައި ފާހަގަކުރި އެވެ.
ދުނިޔޭގެ ޒީނަތްތެރިކަމަށް ނުހެއްލި މާތް ﷲ އަށް ތަގުވާވެރިވުމަށް ވެސް ތަކުރާރުކޮށް ހުތުބާގައި ގޮވާލާފަ އެވެ. މާތް ﷲ އަށް ތަގުވާވެރިވުމަކީ ދެ ދުނިޔޭގެ ހެޔޮކަމާއި ލުއި ފަސޭހަ ގޮތްތައް މިންވަރުކުރައްވާނެ ކަމެއް ކަމުގައި ހުތުބާގައި ވަނީ ފާހަގަކޮށްފަ އެވެ.
އޭގެ އިތުރުން އެއް ބަޔަކު އަނެއް ބަޔަކަށް ގެއްލުން ނުދިނުމަށާއި ފުރައްސާރަ ނުކުރުމަށް އަދި އެކަކު އަނެކަކަށް ނުރުހޭ ނަންނަމުން ނުގޮވުމަށާއި އެމީހެއްގެ މަސްއޫލިއްޔަތުތައް ފުރިހަމައަށް އަދާކުރުމަށްވެސް ހައްޖު ހުތުބާގައި ވަނީ ނަސޭހަތްތެރިވެފަ އެވެ.
ބޭކާރު ގޮތުގައި މުދާ ހޭދަ ނުކުރުމުގެ އިތުރުން ރަލާއި މަސްތުވާތަކެތި ފަދަ ޝައިތާނީ އަމަލުތަކުން ދުރުހެލިވުމަށް ހުތުބާގައި ގޮވާލި އެވެ.
މިއަހަރު ހައްޖުގެ އަޅުކަމުގައި ބައިވެރިވުމަށް 1.5 މިލިއަނަށްވުރެ ގިނަ ހައްޖުވެރިން ދުނިޔޭގެ އެކިކަންކޮޅުތަކުން މައްކާއަށް ޖަމާވިއިރު، އޭގެ ތެރޭގައި ރާއްޖޭގެ 1،150 ހައްޖުވެރިން ހިމެނެ އެވެ. އޭގެ ތެރޭގައި ސަރުކާރުގެ ހަރަދުގައި 50 ހައްޖުވެރިން ގޮސްފައިވެ އެވެ.
