ދުނިޔޭގެ ފުޓްބޯޅައިގެ ގަދަ ބާރެއް ކަމަށްވާ އިޓަލީ އަކީ ޔޫރޯ ފުޓްބޯޅަ މުބާރާތުގެ އެންމެ ފަހުގެ ޗެމްޕިއަނެވެ. އިޓަލީން 1968 ވަނަ އަހަރު އަމިއްލަ ގައުމުގައި އެ މުބާރާތް ހޯސްޓްކޮށް، ކާމިޔާބުކުރި ފަހުން، އެ ޓީމަށް މި މުބާރާތުގެ ތަށި އުުފުލާލެވުނީ އެންމެ ފަހުން ފަހަރު އެވެ. އިޓަލީ ވަނީ 2000 އާއި 2012 ވަނަ އަހަރުގެ ޔޫރޯ ފައިނަލުގައި ބަލިވެފަ އެވެ.
އިޓަލީ އެންމެ ފަހުން ދެ ވޯލްޑް ކަޕަށް ވެސް ކޮލިފައިނުވެ އެވެ. އެކަމަކު، ޔޫރޯގައި އެ ޓީމުން އަންނަނީ 1996 އިން ފެށިގެން މެދުކެނޑުމެއް ނެތި ވާދަކުރަމުންނެވެ.
އެންމެ ފަހުން ބޭއްވި ޔޫރޯ އިޓަލީ އަށް ކާމިޔާބުކޮށްދިން ކޯޗު، ރޮބާޓޯ މަންޗިނީ އެ ޓީމު ދޫކޮށް، ސައުދީ އަރަބިއްޔާ އަށް ބަދަލުވިއިރު، އިޓަލީގެ ކޯޗުކަމާ ހަވާލުވީ އެ ގައުމުގެ ލޫޝިއާނޯ ސްޕަލެއްޓީ އެވެ.
ސްޕަލެއްޓީގެ ކޯޗުކަމާ ހަވާލުވިއިރު، އިޓަލީ އަށް އޮތީ ޔޫރޯ ކޮލިފައިންގެ ފަހު މަރުހަލާ އެވެ. ޔޫރޯ އަށް އިޓަލީ ކޮލިފައިވީ ހަނި ފަރަަގަކުން، ކޮލިފައިން ގްރޫޕްގެ ދެ ވަނަ ހޯދައިގެންނެވެ. ކޮލިފައިންގައި އިޓަލީ ހިމެނުނީ، އިންގްލެންޑާ އެއް ގްރޫޕެއްގައި ކަމަށްވާއިރު، ގްރޫޕް އެއް ވަނަ ހޯދީ އިންގްލެންޑް އެވެ. އިޓަލީ ދެ ވަނަ އަށް ދިޔައީ، ތިން ވަަނަ ހޯދި ޔޫކްރެއިނާ ޕޮއިންޓް އެއްވަރުވި ނަމަވެސް، ހެޑް ޓު ހެޑް އަށް ބަލާއިރު ކުރިލިބޭތީ އެވެ.
ތިން އަހަރުގެ ކޮންޓްރެކްޓެއްގައި އިޓަލީގެ ކޯޗުކަމާ ހަވާލުވި ސްޕަލެއްޓީގެ އިރުޝާދުގެ ދަށުން މި ފަހަރުގެ ޔޫރޯއާ އެ ޓީމު ކުރިމަތިލާއިރު، ހިމެނިފައިވާ ގްރޫޕް ފެންނަނީ ޗެލެންޖް ބޮޑުކޮށެވެ. އިޓަލީގެ އިތުރުން މި ގްރޫޕްގައި ސްޕެއިނާއި ކްރޮއޭޝިއާ އޮތްއިރު، ދެން ހިމެެނެނީ އަލްބޭނިއާ އެވެ.
އިޓަލީ ޓީމުގައި ފާހަގަކޮށްލެވޭ ކުޅުންތެރިންނަށް ބަލާއިރު، ގޯލްކީޕަރު ޖިއަންލުއީޖީ ޑޮންނަރުންމާގެ އިތުރުން، ފެޑެރީކޯ ކިއޭސާ އަކީ ވެސް މި ފަަހަރު މުހިއްމު ރޯލެއް އަދާކުރާނެ ކުޅުންތެރިއެކެވެ.
