ލިވަޕޫލް (ޖޫން 14) - ސައުދީ ޕްރޯ ލީގުގެ ކްލަބް އަލް ނަސްރުން ލިވަޕޫލްގެ ބްރެޒިލް ގޯލްކީޕަރު، އެލިސަން ބެކާ ހޯދަން ކުރި މަސައްކަތް ނާކާމިޔާބުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
ރޯމާ ދޫކޮށް 2018 ވަނަ އަހަރު ލިވަޕޫލަށް ބަދަލުވި އެލިސަން، 31، ހޯދަން އަލް ނަސްރުން ބޮޑު ކޮންޓްރެކްޓެއް ހުށަހެޅި ނަމަވެސް އެ ޑީލް ކުރިއަށްދިއުމުގެ ފުރުސަތު ނެތް ކަމަށް ރިޕޯޓްތައް ބުނެ އެވެ. ސަބަބަކީ އެލިސަންގެ ފޯކަސް މި ވަގުތު ހުރީ ލިވަޕޫލްގައި މަޑުކޮށް، އާ ކޯޗު އާން ސްލޮޓާ އެކު މަސައްކަތް ކުރުމަށެވެ.
އަލް ނަސްރަކީ ލިވަޕޫލްގެ ކުރީގެ ފޯވާޑް، ސަޑިއޯ މާނޭ ވެސް ކުޅެމުން އަންނަ ކްލަބް އެވެ. އެ ޓީމުގެ ކެޕްޓަނަކީ ޕޯޗުގީސް ތަރި ކްރިސްޓިއާނޯ ރޮނާލްްޑޯ އެވެ. އެލިސަން އެ ޓީމަށް ދާން ބޭނުންނުވާ ކަމަށް ހާމަކުރުމާ އެކު، އަލް ނަސްރުން މިހާރު މަސައްކަތް ފަށާފައިވަނީ ޔުވެންޓަސް އަށް ކުޅޭ ޕޮލެންޑްގެ ކީޕަރު ވޮޒްޝިއޭ ޝެޒްނީ ގެންދިއުމަށެވެ.
އެލިސަން، ލިވަޕޫލަށް ބަދަލުވި ފަހުން ކުޅުނު 260 އަށް ވުރެ ގިނަ މެޗުތަކަށް ބަލާއިރު، 114 މެޗު ނިންމާލީ ކޮޅަށް ގޯލެއް ނުވަދެ އެވެ.
މި ވަގުތު ގައުމީ ޓީމާ އެކު ހުރި އެލިސަން އަންނަނީ ބްރެޒިލުން ކޮޕަ އެމެރިކާ އަށް ތައްޔާރުވާން ކުޅުނު މެޗުތަކުގައި މޮޅު ކުޅުމެއް ދައްކަމުންނެވެ. އެ ގޮތުން، މެކްސިކޯ އަތުން 3-2 އިން ބްރެޒިލް މޮޅުވި މެޗާއި އެމެރިކާ އާއި 1-1 އިން ބްރެޒިލް އެއްވަރުވި މެޗުގައި އެލިސަން ވަނީ ރަނގަޅު ހަމަލާތަކެއް ހުއްޓުވައިފަ އެވެ.
