މި އަހަރު ބާއްވަން ތާވަލުކޮށްފައިވާ 20 އަހަރުން ދަށާއި 17 އަހަރުން ދަށުގެ އޭޝިއަން ކަޕް ކޮލިފައިން ބުރުގައި ރާއްޖޭގެ ޒުވާން ގައުމީ ޓީމުތައް ވަރުގަދަ ގްރޫޕެއްގައި ވާދަކުރަން ޖެހިއްޖެ އެވެ.
އަންނަ އަހަރު ބާއްވާ 20 އަހަރުން ދަށުގެ އޭޝިއަން ކަޕްގެ ކޮލިފައިން ބުރު މި އަހަރު ކުރިއަށްދާއިރު، ކޮލިފައިން މެޗުތައް ކުޅެން ޖެހެނީ ސެޕްޓެމްބަރު 21-29 އަށެވެ. އެ ގޮތުން ރާއްޖެ ހިމެނިފައިވަނީ، ގްރޫޕް އެފްގަ އެވެ. އެ ގްރޫޕްގައި ދެން ހިމެނެނީ، އިންޑޮނީޝިއާ، ޓިމޯ ލެސްޓޭ އަދި ޔަމަން އެވެ.
އިންޑޮނީޝިއާގައި ކޮލިފައިން މެޗުތައް ހޯސްޓްކުރާއިރު، ރާއްޖޭން ފުރަތަމަ މެޗުގައި ސެޕްޓެމްބަރު މަހު 25 ގައި ކުޅޭނީ އިންޑޮނީޝިއާއާ ދެކޮޅަށެވެ. ދެ ވަނަ މެޗުގައި، 27 ވަނަ ދުވަހު ޔަމަނާ ދެކޮޅަށް ކުޅުމަށް ފަހު، ފަހު މެޗުގައި 29 ވަނަ ދުވަހު އީސްޓް ޓިމޯއާ ކުޅޭނެ އެވެ.
އޭޝިއާގެ 20 އަހަރުން ދަށުގެ ކޮލިފައިން އާއި ސާފް 20 އަހަރުން ދަށުގެ މުބާރާތަށް، އެ އުމުރުފުރާގެ ގައުމީ ފުޓްބޯޅަ ޓީމު އެކުލަވާލަނީ މިހާރު ކުރިއަށްދާ 19 އަހަރުން ދަށުގެ ޔޫތު ޗެމްޕިއަންޝިޕުންނެވެ. ސާފް 20 އަހަރުން ދަށުގެ މުބާރާތް އޮތީ އޮގަސްޓް މަހު، 16-28 އަށެވެ. ނޭޕާލުގައި ކުރިއަށްދާ، އެ މުބާރާތުގައި ރާއްޖެ ހިމެނެނީ، އިންޑިއާ އާއި ބޫޓާނާ އެކު ގްރޫޕް ބީގަ އެވެ.
ސަތާރަ އަހަރުން ދަށުގެ އޭޝިއަން ކަޕްގެ ކޮލިފައިންގައި ރާއްޖެ ހިމެނުނީ، ގްރޫޕް ސީގަ އެވެ. އެ ގްރޫޕްގެ މެޗުތައް ޗައިނާގައި ކުޅޭއިރު، ރާއްޖޭގެ އިތުރުން ދެން ހިމެނެނީ، ދެކުނު ކޮރެއާ އާއި ބަހުރޭން އަދި ބޫޓާން އެވެ.
އޮކްޓޫބަރު 19 ވަނަ ދުވަހު ކޮލިފައިން ފުރަތަމަ މެޗުގައި ރާއްޖޭން ބޫޓާނާ ކުޅޭނެ އެވެ. ދެ ވަނަ މެޗުގައި، 21 ވަނަ ދުވަހު ބަހްރޭނާ ކުޅުމަށް ފަހު ތިން ވަނަ މެޗުގައި، ކޮރެއާއާ ކުޅޭނީ 23 ވަނަ ދުވަހު އެވެ. އަދި ފަހު މެޗުގައި ޗައިނާއާ ދެކޮޅަށް 25 ވަނަ ދުވަހު ނުކުންނާނެ އެވެ.
ސޯޅަ އަހަރުން ދަށުގެ ޔޫތު މުބާރާތެއް އަންނަ މަހު ބާއްވަން އެފްއޭއެމް އިން ތާވަލުކޮށްފައިވަނީ، އޭޝިއަން ކަޕް ކޮލިފައިން އާއި ސާފްގެ 17 އަހަރުން ދަށުގެ މުބާރާތަށެވެ. ބޫޓާނުގައި ސެޕްޓެމްބަރު 18-28 އަށް ކުރިއަށްދާ 17 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެ ހިމެނެނީ، އިންޑިއާ އާއި ބަންގްލަދޭޝާ އެއް ގްރޫޕެއްގަ އެވެ.
