ބޭންކް އޮފް މޯލްޑިވްސް (ބީއެމްއެލް) އަށް ގަންނަން ލިބޭ ޑޮލަރުގެ އަދަދު އިތުރުނުވާހާ ހިނދު ކާޑުން ކުރެވޭ ބޭރުގެ މުއާމަލާތްތަކަށް ކަނޑައަޅާފައިވާ ލިމިޓު އިތުރުކުރުމަކީ ކުރެވޭނެ ކަމެއް ނޫން ކަމަށް، އެންމެ ގިނަ ދިވެހިން ހިދުމަތް ހޯދާ ބޭންކުން ބުނެފި އެވެ.
ރާއްޖޭގެ ބާޒާރުގައި ޑޮލަރުގެ އަގު އުފުލުމާއި ބޭރުގައި ކާޑުން މުއާމަލާތް ކުރެވޭ އަދަދު އިތުރު ކުރުމާއި ގުޅޭގޮތުން، ބީއެމްއެލް އިން ބުނީ ރާއްޖޭގެ ޑޮލަރުގެ ހާލަތާ މެދު ބޭންކުން ވަކި އެއްޗެއް ދެންނެވެން ނެތް ނަމަވެސް، މާކެޓުން ޑޮލަރު ގަންނަން ލިބޭ އަދަދަށް ވުރެ ބޮޑު އަދަދެއް ބޭންކުން ވިއްކަމުން ގެންދާ ކަމަށެވެ.
މިދިޔަ މަހުގެ 28 ވަނަ ދުވަހު ބޭއްވި ބީއެމްއެލްގެ އަހަރީ އާންމު ޖަލްސާގައި ވާހަކަ ދައްކަވަމުން އެ ބޭންކުގެ ސީއީއޯ ކާލް ސްޓުމަކް ވިދާޅުވީ ރާއްޖޭގެ އިގުތިސާދަށް އެހީތެރިވުމުގެ ގޮތުން ކަސްޓަމަރުންނާއި އެމްއެމްއޭ އިން ބީއެމްއެލްއަށް ގަންނަން ލިބުނު ފައިސާގެ އަދަދަށްވުރެ 333 މިލިއަން ޑޮލަރުގެ އިތުރަށް ވިއްކާފައިވާ ކަމަށެވެ.
ބީއެމްއެލްގެ ހެޑް އޮފް ޕަބްލިކް ރިލޭޝަންސް މުހައްމަދު ސައީދު މިއަދު ވިދާޅުވީ "ބޭންކަށް ގަންނަން ލިބޭ ޑޮލަރުގެ އަދަދު އިތުރުނުވާހާ ހިނދު ކާޑުން ކުރެވޭ ބޭރުގެ މުއާމަލާތްތަކަށް ކަނޑައަޅާފައިވާ ލިމިޓު އިތުރުކުރުމަކީ ބީއެމްއެލް އަށް ކުރެވޭނެ ކަމެއް ނޫން،" ކަމަށެވެ.
ސައީދު ވިދާޅުވީ ބޭންކަށް ގަންނަން ލިބޭ ޑޮލަރުގެ އަދަދު އިތުރުކުރުމަށް ކަމާ ބެހޭ އިދާރަތަކާއެކު މަޝްވަރާކުރަމުން ގެންދާ ކަމަށެވެ.
ބޭންކަށް ގަންނަން ލިބެން ނެތް އެއްޗެއް ވިއްކަމުން ދިޔުމަކީ ދެމެހެއްޓެނެވި ކަމަކަށް ނުވާ ހިނދު، އެ މަގު ފަހިވަންދެން ބޭންކުގެ މާލީ ހާލަތާއި ރިސްކްތަކަށް ހުށަހެޅޭ މިންވަރު ކުޑަކުރުމަށްޓަކައި އުދަނގޫ ނިންމުންތަކެއް ނިންމަން އެ ބޭންކަށް މަޖުބޫރުވާ ކަމަށް ބީއެމްއެލްގެ އަހަރީ ރިޕޯޓުގައި ވެސް ވަނީ ފާހަގަކޮށްފަ އެވެ.
ބޭރު ގައުމެއްގައި ބީއެމްއެލްގެ ޑެބިޓް ކާޑަކުން މިހާރު މުއާމަލާތް ކުރެވެނީ މަހަކު 250 ޑޮލަރާ ހަމައަށެވެ. ކްރެޑިޓް ކާޑަކުން މުއާމަލާތް ކުރެވެނީ 750 ޑޮލަރާ ހަމައަށެވެ.
ރާއްޖެއިން ބޭރުގައި ކިޔަވާ ކުދިންނަށް ޑޮލަރު ނެގޭނެ އަދަދު 1،200 އިތުރުކުރުމަށް ސަރުކާރުން ޑިސެމްބަރު މަހު ވައުދުވެފައިވި ނަމަވެސް އެކަން ކޮށްދެވިފައެއް ނުވެ އެވެ. ބޭންކުތަކުން ކަނޑައަޅާފައި އޮންނަ ޑޮލަރު ލިމިޓު އުވައިލުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ.
