ފްލޮރިޑާ، ޔުނައިޓެޑް ސްޓޭޓްސް (ޖޫން 13) - މިހާރު ކުޅެމުން އަންނަ އެމެރިކާ ލީގުގެ އިންޓަ މިއާމީ ވާނީ އޭނާގެ ކެރިއަރުގެ ފަހު ކްލަބަށް ކަމަށް ދުނިޔޭގައި އުފެދުނު އެންމެ މޮޅު އެއް ކުޅުންތެރިޔާ، ލިއޮނަލް މެސީ ބުނެފި އެވެ.
ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް އަށް ފަހަރު ހޯދާފައިވާ މެސީ، 36، "އީއެސްޕީއެން" އަށް ދިން އިންޓަވިއުއެއްގައި ބުނީ މި ވަގުތުގެ ހާލަތާއި ކަންކަމަށް ވިސްނާއިރު އިތުރު ކްލަބަކުން ދެން އޭނާ ފެންނާނެ ކަމަށް ނުބެލެވޭ ކަމަށެވެ.
"މި ވަގުތު އަހަންނަށް ވިސްނޭ ގޮތުގައި މިއީ އަހަރެންގެ ފަހު ކްލަބް. އެކަމަކު، އަދި ފުޓްބޯޅަ އެއްކޮށް ދޫކޮށްލާކަށެއް އަހަރެން ތައްޔާރެއް ނޫން،" ބާސެލޯނާގައި ކާމިޔާބު އަހަރުތަކެއް ހޭދަކޮށް ފަހުން ޕީއެސްޖީ އަށް ކުޅުނު މެސީ ބުންޏެވެ.
މިދިޔަ އަހަރު މިއާމީ އަށް ބަދަލުވި މެސީ އަންނަނީ މި ފަހަރުގެ ސީޒަނުގައި މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް މި ސީޒަނުގެ 12 މެޗުގައި 12 ގޯލު ޖަަހައި، 13 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
މެސީ ބުނީ ޔޫރަޕްގެ ފުޓްބޯޅަ ދޫކޮށްލުމަށް ފަހު، އެމެރިކާ ލީގަށް އައުން އެންމެ ފުރަތަމަ ވީ ވަރަށް އުނދަގޫ ކަމަކަށް ކަމަށެވެ. އެކަމަކު، ދުނިޔޭގެ ޗެމްޕިއަނެއްގެ ގޮތުގައި އޭނާ އަށް ކެރިއަރުގައި ބޮޑު ކާމިޔާބެއް ލިބުނު ފަހުން، ކޮންމެ ޕްރެޝަރަކަށް ވެސް ހޭނެން ފަސޭހަވި ކަމަށް މެސީ ވަނީ ބުނެފަ އެވެ.
އެމެރިކާގައި 2026 ވަނަ އަހަރު އޮންނަ ފީފާ ވޯލްޑް ކަޕްގައި ވެސް ކުޅެން ބޭނުންވާ ކަމަށް ދާދި ފަހުން ހާމަކުރި މެސީ ބުނީ، ފުޓްބޯޅައިން އެއްކޮށް ދުރަށް ދާން ޖެހުން އެއީ ވަރަށް އުނދަގޫވާނެ ނިންމުމެއް ކަމަށެވެ.
