އަންހެނުންނަށް ހަމަހަމަކަމާއި ރައްކާތެރިކަން ފޯރުކޮށްދިނުމަށް ބާރުއަޅާ "އަޅާލުން" ކެމްޕޭންގެ ދަށުން ބްރިޖިން ދަ ކޮމިއުނިޓީސް އޮފް ދަ މޯލްޑިވްސްއިން 10 ފަރާތަކަށް އެހީތެރިކަން ފޯރުކޮށްދީފި އެވެ.
"އަޅާލުން" ކެމްޕޭނަކީ އިންޑިއާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، މުނު މަހާވަރް އިފުތިތާހުކޮށްދެއްވި ކެމްޕޭނެކެވެ. މި ކެމްޕޭންގެ ދަށުން ބްރިޖިން ދަ ކޮމިއުނިޓީސް އޮފް މޯލްޑިވްސްއިން އަނިޔާ ލިބެމުންދާ އަދި ރައްކާތެރިކަން ބޭނުންވާ އަންހެނުންނަށް އެހީތެރިކަން ފޯރުކޮށްދޭނެ އެވެ.
އަޅާލުން ކެމްޕެއިނުގެ ދަށުން އެހީ ލިބޭ ކަންކަން
- އަންހެނުންގެ ބަލިތަކަށް ހާއްސަ ޑޮކްޓަރުންނަށް ދެއްކުމުގެ އިންތިޒާމު ހަމަޖައްސައިދިނުން
- ގާނޫނީ އެހީތެރިކަން ފޯރުކޮށްދިނުން
- ކައުންސިލިންގެ ހިދުމަތް ފޯރުކޮށްދިނުން
މި ކެމްޕެއިނުގެ ދަށުން މިހާތަނަށް އެހީތެރިކަން ފޯރުކޮށްދީފައިވަނީ ޤާނޫނީ އެހީތެރިކަން ބޭނުންވާ ހަ އަންހެނަކަށާ ސިއްހީ ހިދުމަތް ހޯދުމުގައި އިދާރީގޮތުން ގޮންޖެހުންތަކެއް ހުރެ އެހީތެރިކަމަށް އެދުނު ތިން އަންހެނުން އަދި ނުކުޅެދުންތެރިކަން ހުރި ކުޑަ ކުއްޖަކަށެވެ.
އެގޮތުން ގާނޫނީ އެހީތެރިކަން ބޭނުންވި ހަ އަންހެނުންގެ ތެރެއިން ދެ މީހަކަށް ޝަރުއީ މަރުހަލާގައި ގާނޫނީ ވަކީލެއްގެ އެހީތެރިކަން ފޯރުކޮށްދެވިފައިވާއިރު ހަތަރު މީހަކަށް ވަނީ ގާނޫނީ ލަފާ ދެވިފަ އެވެ.
މި ހަ މައްސަލައިގައި ހިމެނެނީ ގެވެށި އަނިޔާ އާއި ވަރި އަދި ހަލާނާތާ ގުޅުންހުރި މައްސަލަތަކެވެ.
"އަޅާލުން" ކެމްޕެއިނުގެ ދަށުން ވަކި ޖިންސެއްގެ މީހަކަށް ވީތީ ލިބޭ އަނިޔާ އާއި އަންހެނުންނަށް ކުރާ އަނިޔާއާ ދެކޮޅަށް ހޭލުންތެރިކަން އިތުރުކުރުމަށް މީޑިއާގެ ވަސީލަތްތައް މެދުވެރިކޮށް ވެސް ވަނީ ގިނަ މަސައްކަތްތަކެއް ވެސް ކުރެވިފަ އެވެ.
