ޓެކްސަސް، ޔުނައިޓެޑް ސްޓޭޓްސް (ޖޫން 7) - މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގައި ސުޕަ އޯވަރު ކުޅެގެން ޕާކިސްތާންގެ މައްޗަށް ކުރިހޯދައި، އެމެރިކާ އިން ކްރިކެޓްގެ ތާރީހުގައި ހާއްސަ ނަތީޖާއެއް ނެރެފި އެވެ.
ޓީ20 ކްރިކެޓަށް އެމެރިކާ އިން ފުރަތަމަ ނުކުތީ 2019 ވަނަ އަހަރު އެވެ. މިއީ، އެ ޓީމުން ޓީ20 ވޯލްޑް ކަޕް ކުޅޭ ފުރަތަމަ ފަހަރެވެ. އަނެއްކޮޅުން އިއްޔެގެ މެޗަކީ، ޕާކިސްތާނާ ދެކޮޅަށް އެމެރިކާ އިން ކުޅުނު ފުރަތަމަ ބައިނަލްއަގުވާމީ ރަސްމީ މެޗެވެ. އެމެރިކާ ޓީމުގައި ދެކުނު އޭޝިއާ ދަރިކޮޅަށް ނިސްބަތްވާ ގިނަ ކުޅުންތެރިން ހިމެނެ އެވެ.
ޕާކިސްތާނަކީ، 2009 ވަނަ އަހަރުގެ ޓީ20 ވޯލްޑް ކަޕްގެ ޗެމްޕިއަނުންނެވެ. އަދި އެންމެ ފަހުން، 2022 ވަނަ އަހަރުގެ ޓީ20 ވޯލްޑް ކަޕް ފައިނަލުގައި އިންގްލެންޑް އަތުން ބަލިވި، ޕާކިސްތާނަށް އެމެރިކާ އަތުން ބަލިވުމަކީ ލަދުވެތި ނަތީޖާއެކެވެ.
ޓޮސް ދިމާވުމުން އެމެރިކާ އިން ނިންމީ ހޮވާށެެވެ. ޕާކިސްތާނުން ކުޅެން އަރައި، 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން 159 ލަނޑު ހެދި އެވެ. އެންމެ ރަނގަޅަށް ކުޅުނީ 44 ލަނޑު ހެދި ޓީމުގެ ކެޕްޓަން ބާބަރު އާޒަމް އެވެ. އަދި އެ ޓީމުގެ ޝައްދާބް ހާން ވަނީ 40 ލަނޑު ހަދައިފަ އެވެ. މި އިނިންސްގައި އެމެރިކާ ޓީމުގެ ނޮޝްތޫޝް ކެންޖިގޭ ވަނީ ތިން ވިކެޓް ނަގައިފަ އެވެ.
ޖަވާބުގައި ކުޅެން އަރައި، އެމެރިކާ އިން ވަނީ، 20 އޯވަރު ތެރޭގައި ތިން ކުޅުންތެރިން ނުބައިވިއިރު، 159 ލަނޑު ހަމަކޮށް ސުޕަ އޯވަރަކަށް މެޗު ގެންގޮސްފަ އެވެ. އެ ޓީމުން އެންމެ ރަނގަޅަށް ކުޅުނީ، އިންޑިއާ އަށް އުފަން، ޓީމުގެ ކެޕްޓަން، މޮނަންކް ޕަޓޭލް އެވެ. އޭނާ ވަނީ 38 ބޯޅައިން 50 ލަނޑު ހަދައިފަ އެވެ.
ދެ ޓީމު އެއްވަރުވުމުން ސުޕަ އޯވަރެއް ކުޅެން ޖެހި، އެމެރިކާ އިން އަރައި، 18 ލަނޑު ހެދި އެވެ. ޖަވާބުގައި ޕާކިސްތާނަށް ހެދުނީ 13 ލަނޑެވެ. ސުޕަ އޯވަރުގައި އެމެރިކާގެ ޓީމުން ތަފާތު ދެއްކީ، އާރޮން ޖޯންސް އެވެ.
އެމެރިކާ ވަނީ ފުރަތަމަ މެޗުން ކެނަޑާ ބަލިކޮށްފަ އެވެ. އެހެންކަމުން، އަނެއް ބުރަށް ދިއުމަށް އެ ޓީމަށް ވަނީ ފުރުސަތު ފަހިވެފަ އެވެ. ޕާކިސްތާން ފުރަތަމަ މެޗުން ބަލިވިއިރު، ދެ ވަނަ މެޗުގައި އާދިއްތަ ދުވަހު އިންޑިއާއާ ކުޅޭނެ އެވެ. އިންޑިއާ ވަނީ ފުރަތަމަ މެޗުން އަޔަލެންޑް އަތުން މޮޅުވެފަ އެވެ.
