ކަލްކަތާ، އިންޑިއާ (މާޗް 5) - މެޗަކުން ބަލިނުވެ ސެމީ ފައިނަލާ ހަމައަށް ދަތުރުކުރި ދެކުނު އެފްރިކާ ނުވަ ވިކެޓުން ބަލިކޮށް، އެ ޓީމު ކަޓުވާލުމަށް ފަހު ނިއު ޒީލެންޑުން މިހާރު ކުރިއަށްދާ ޓީ20 ވޯލްޑް ކަޕްގެ ފައިނަލުގެ ފުރަތަމަ ޖާގަ ހޯދައިފި އެވެ.
ދެކުނު އެފްރިކާ އިން ވަނީ މި ފަހަރުގެ މުބާރާތުގެ ގްރޫޕް ސްޓޭޖުގައި ކުޅުނު މެޗުން ނިއު ޒީލެންޑް އަތުން ހަތް ވިކެޓުން މޮޅުވެފަ އެވެ. އެކަމަކު، ރޭ ކަލްކަތާގެ މަޝްހޫރު ސްޓޭޑިއަމް، އެޑަން ގާޑަންގައި ކުޅުނު މެޗުގައި، ނިއު ޒީލެންޑުން ވަނީ ތަފާތު ރޫހެއްގައި ކުޅެލައި، ދެ ވަނަ ފަހަރަށް ޓީ20 ވޯލްޑް ކަޕްގެ ފައިނަލުން ފުރުސަތު ހޯދައިފަ އެެވެ.
ޓޮސް ދިމާވުމުން ނިއު ޒީލެންޑުން ނިންމީ ހޮވާށެވެ. ދެކުނު އެފްރިކާ އިން ކުޅެން އަރައި، 20 އޯވަރުގެ ތެރޭގައި އަށް ކުޅުންތެރިން ނުބައިވިއިރު، ހެދުނީ 169 ލަނޑެވެ. އެންމެ ރަނގަޅު ކުޅުމެއް ދެއްކީ ނުބައިނުވެ، 30 ބޯޅައިން 55 ލަނޑު ހެދި، މާކޯ ޖެންސަން އެވެ. މި އިނިންގްސްގައި، ނިއު ޒީލެންޑުގެ މެޓް ހެންރީ، ކޯލް މެކްކޮންޗީ އަދި ރަޗިން ރަވިންދުރަ، ކޮންމެ ކުޅުންްތެރިއަކު ދެ ވިކެޓް ނެގި އެެވެ.
ޖަވާބުގައި ކުޅެން އަރައި، ނިއު ޒީލެންޑަށް މެޗުގެ ނަތީޖާ ނެރުމުގައި ތަފާތު ދެއްކީ ރޭގެ މެޗުގައި ރެކޯޑް ސެންޗަރީއެއް ހެދި ފިން އެލަން އެވެ. ނިއު ޒީލެންޑުން 12.5 އޯވަރުގެ ތެރޭގައި، އެއް ކުޅުންތެރިއަކު ނުބައިވެގެން، ބާކީ 43 ބޯޅަ ނުއުކައި އޮއްވައި، ނަތީޖާ ނެރުނީ، 33 ބޯޅައިން އެލަން ހެދި ސައްތައާ އެކު އެވެ. މިއީ، ޓީ20 ވޯލްޑް ކަޕް ތާރީހުގައި ފެނިގެންދިޔަ އެންމެ އަވަސް ސެންޗަރީ އެވެ. މީގެ ކުރިން މި ރެކޯޑް އޮތީ ވެސްޓް އިންޑީސްގެ ކްރިސް ގޭލް އަތުގަ އެވެ. އޭނާ 2016 ވަނަ އަހަރުގެ ވޯލްޑް ކަޕްގައި، އިންގްލެންޑާ ދެކޮޅަށް ސައްތަ އެއް ފުރިހަމަކުރީ 47 ބޯޅައިންނެވެ.
ނިއު ޒީލެންޑުން މީގެ ކުރިން ޓީ20 ވޯލްޑް ކަޕް ފައިނަލުގައި ހަމައެކަނި ވާދަކުރި ފަހަރު، 2021 ވަނަ އަހަރުގެ މުބާރާތުގައި އޮސްޓްރޭލިއާ އަތުން ވީ ބައްޔެވެ. މި ފަހަރުގެ ފައިނަލުން ނިއު ޒީލެންޑުން ފުރުސަތު މި ހޯދީ، އެންމެ ފަހުން 2024 ވަނަ އަހަރު ބޭއްވި މުބާރާތުގެ ރަނަރަޕް ބަލިކޮށްފަ އެވެ. ފައިނަލުގައި، ނިއު ޒީލެންޑުން ކުޅެން ޖެހޭ ޓީމެއް ކަނޑައެޅޭނީ އިންގްލެންޑާއި އިންޑިއާ ކުޅޭ ސެމީ ފައިނަލް ދެ ވަނަ މެޗުންނެވެ.
