ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ ސުޕަ މެޖޯރިޓީ އޮތް، 20 ވަނަ ރައްޔިތުންގެ މަޖިލީހުގެ ރައީސްކަމާއި ނައިބުރައީސް ކަަމަށް ވާދަކުރަން މެންބަރުންނަށް ހުޅުވައިލުމުގެ ބަދަލުގައި އެ މަގާމުތަކަށް ވާދަކުރައްވާނެ މެންބަރުން ކަނޑައެޅުން ރައީސް ޑރ.މުހައްމަދު މުއިއްޒަށް ދޫކޮށްލީ ޕާލަމެންޓްރީ ގްރޫޕް ބައިބައިވިޔަ ނުދޭން ކަމަށް މަޖިލީހުގެ ނައިބުރައީސް އަހުމަދު ނާޒިމް ވިދާޅުވެއްޖެ އެެވެ.
"އަދަދު"ގެ އެތެރެފުށް ޕްރޮގްރާމްގައި ކުރި ސުވާލަކަށް ޖަވާބުދެއްވަމުން ނާޒިމް ވިދާޅުވީ ވާދަވެރިކަމަށް ދޫކޮށްލުމުން ޕާލަމެންޓްރީ ގްރޫޕް ބައިބައިވާކަން އެއީ 17 ވަނަ މަޖިލީހާއި 18 ވަނަ މަޖިލީހުގައި ވެސް ފެނިފައި އޮތް ހަގީގަތެއް ކަަމަށެވެ. އެއާ އެކު އޭނާ އާ ކުރެއްވީ އެ ދެ މަޖިލީހުގައި ކަންހިނގައި ދިޔަ ގޮތުގެ ހަނދާނެވެ.
"އަޅުގަނޑުގެ ވާހަކައައަކީ އެއީ މާޒީން ފެންނަން އޮތް ތަޖުރިބާއެކޭ. އެހެންވީމާ އަޅުގަނޑުމެން މިހާ ބޮޑު ގުރޫޕެއްގައި، އަަޅުގަނޑުމެން ޕާލަމެންޓްރީ ގުރޫޕުގެ މަގާމަކަށް ވޯޓަކަށް ހުޅުވާލައިގެން، އެއް ބަޔަކު އަނެއް ބަޔަކަށް ކެމްޕެއިނުކޮށްގެން، ކޮންމެވެސް އެއް ބަޔަކު މޮޅުވާނީ ދެއްތޯ؟ މޮޅުވީމާ، މޮޅުނުވާމީހުން ހިތްހަމަނުޖެހިގެން މި ގުރޫޕު ތެރޭގައި އެންމެ ފުރަތަަ ދުވަހުން ފެށިގެން ވެސް، އެ ވާދަވެރިކަމާ ފިތުނަވެރިކަން އުފެދެން އެގޮތަށް ޖާގަދޭން އަޅުގަނޑުމެން ބޭނުމެއް ނުވޭ،" ނާޒިމް ވިދާޅުވި އެވެ.
އެކަމުގައި ރައީސްގެ ނިންމެވުމަކީ ވަރަށް ހިކުމަތްތެރި ނިންމެވުމެއް ކަމަށް ގަބޫލުކުރައްވާ ކަމަށާއި ޕީއެންސީ ޕާލަމެންޓްރީ ގުރޫޕުގައި މިހާރު އެއްވެސް ބައިބައިވުމެއް ނެތް ކަމަށް ވެސް އޭނާ ވިދާޅުވި އެވެ. މިހާރު އޮތް ގޮތަށް ޓީމެއްގެ ގޮތުގައި މަަސައްކަތް ކުރެެވެން އޮއްވާ އެނޫން ގޮތެއް ވާން ޖާގަދޭންވީ ކީއްވެތޯ އޭނާ ސުވާލުވެސް އުފެއްދެވި އެވެ.
"މިދެންނެވި ގޮތަށް ރައީސް ވާދަވެރިކަމަށް ހުޅުވައިލެއްވި ނަމަ، އެމީހަކު ކެމްޕެއިނުކުރާ ގޮތަކަށް ކެެމްޕެއިނުކޮށްގެން ހޮވެން މަސައްކަތްކުރާނެ. ހޮވޭ މީހާ ހޮވުނެއް ކަމަކު ނުހޮވޭ މީހާގެ ހިތްހަމަނުޖެހުން އޮންނާނެ، އޭރުން އޮންނާނީ ބައިބައިވެފައި، އެކަމަކު މިއަދަކު ނެތް ދެއްތޯ އެކަމެއް،" ނާޒިމް ވިދާޅުވި އެވެ.
މަޖިލީހުގެ މަގާމުތަކަށް މެންބަރުން ހޮވުމުގައި ރައީސް ވިދާޅުވި ގޮތަށް އަަމަލުކޮށްފައި ވާއިރު ކުރިއަށް އޮތް ތަނުގައި މަޖިލީހުން ކަންތައްތައް ނިންމުމުގައި "ރައީސް ވިދާޅުވާ ގޮތަށް ސްޓޭމްޕް ޖަހާނެތޯ" އަދަދުން ސުވާލުކުރި އެވެ.
ނާޒިމް ވިދާޅުވީ އެގޮތަށް ކަންތައް ނުކުރާނެ ކަަމަށާއި ފަރުދާގެ ފުރަގަހުގައި ޕާޓީގެ ލީޑަޝިޕް ވެސް އެބަ އޮތް ކަަމަށެވެ. ލީޑަޝިޕާ އެކު ޕާލަމެންޓްރީ ގުރޫޕުގެ ބައްދަލުވުންތައް ގަަވައިދުން ބާއްވަމުން އަންނަ ކަމަށް ވެސް އޭނާ ވިދާޅުވި އެވެ.
ޕީއެންސީގެ ޕާލަމެންޓްރީ ގްރޫޕްގެ މަގާމުތަކުގައި ތިއްބެވި ބޭފުޅުންނަކީ ނާޒިމް ވިދާޅުވި ގޮތުގައި މިހާރު އެޕާޓީގެ ލީޑަޝިޕްގައި ވެސް ހިމެނިވަޑައިގަންނަވާ ބޭފުޅުންނެވެ. ޕާލަމެންޓްރީ ގުރޫޕުން ކަންކަމުގައި އަމަލުކުރާނެ ގޮތް ނިންމަނީ އެ ގުރޫޕުގެ ޖަލްސާތަކުން ކަމަށް ވެސް އޭނާ ވިދާޅުވި އެވެ.
