ބ. އަތޮޅު ގޮއިދޫ އަކީ ކުޅިވަރުގެ ރަށެކެވެ. އެ ރަށުން އުފެދުނު އެތައް ކުޅުންތެރިންތަކެއް ގައުމީ އަދި ބައިނަލްއަގްވާމީ ލެވަލްގައި ވާދަކޮށްފައިވެ އެވެ. އެކަމަކު, އޭގެ ތެރެއިން ހަސަން މާހިރު (ހަންޓޭ) އަކީ ފާހަގަކޮށްލެވޭ ނަމެކެވެ. ގޮއިދޫ ރައްޔިތުންގެ އުންމީދާ ގުޅިފައިވާ އެތުލީޓެކެވެ. އެ ރަށުގެ ފަހުރެކެވެ.
ހަންޓޭ, 18, އަކީ ގޮއިދޫގެ ނަން އެހެން ހަރުފަތަކަށް ގެންދިޔަ އެތުލީޓެކެވެ. އާދަޔާހިލާފު ކާމިޔާބީ އެއް މިހާތަނަށް ލިބިފައިނުވިޔަސް އެއީ މުސްތަގުބަލުގައި ގޮއިދޫގެ ނަން ރަން އަކުރުން ފަވާލާނެ އެތުލީޓެއް ކަމަށް އެ ރަށު ރައްޔިތުން ގަބޫލުކުރެ އެވެ.
ގޮއިދޫ މިހާރު އެންމެ ބޮޑަށް މަޝްހޫރުވެފައި ވަނީ މޫދު ކުޅިވަރުގެ ރަށެއްގެ ގޮތުގަ އެވެ. އޭގެ ތެރެއިން ވެސް ކައިޓްސާފިންގެ ރާއްޖޭގެ އެންމެ ބޮޑު ހަބަކީ ގޮއިދޫ އެވެ. ހަންޓޭ އޭ ބުނުމުން ޒުވާނުންނަށް އިތުރު ތަފްސީލެއް ދޭން ނުޖެހޭނެއޭ ބުންޏަސް ދޮގަކަށް ނުވާނެ އެވެ. އެއީ، މިހާރު ރާއްޖޭގައި ހުރި އެންމެ މޮޅު ކައިޓް ސާފަރެވެ.
ރެޑްބުލް ވިންޑް ރައިޑާސް އިވެންޓްގެ ތެރެއިން ހަންޓޭ.--- ފޮޓޯ: އަތޫފް އާތިފް/ އަދަދު
ރެޑް ބުލް އިން ބާއްވާ ރެޑް ބުލް ވިންޑް ރައިޑާސް ތިން ފަހަރު ކާމިޔާބުކުރި ހަންޓޭ, މި ފަހަރުގެ މުބާރާތް ކާމިޔާބުކުރީ ރާއްޖެއިން ބޭރު އެތުލީޓުން ވެސް ބަލިކުރުމަށް ފަހުގަ އެވެ.
ހަންޓޭ، ކައިޓްސާފް ކުރަން ފެށީ އޭނާގެ އުމުރުން ގާތް ގަނޑަކަށް 10 އަހަރުގަ އެވެ. ކުޑައިރުން ފެށިގެން މޫދަށް ހިތްޖެހިފައި ހުރި ހަންޓޭ, ކައިޓް ސާފް ކުރަން ދަސްކުރަން ފެށި ގޮތް "އަދަދު" އާ ހިއްސާކުރަމުން ބުނީ ކުޑައިރު އެ ރަށު ޒުވާނުން ކައިޓް ދުއްވާތަން ފެނުމުން އެކަން ކުރަން ބޭނުންވީ ކަމަށެވެ.
"އަހަރެން އަށް އެންމެ ފުރަތަމަ މި ފުރުސަތު ދިނީ ކައްޑެ މެން. އޭރު ކައްޑެ މެން މިތާ (ގޮއިދޫ ކައިޓް ބީޗް) ގައި ކައިޓް ދުއްވާނެ. ދެން އަހަރެން އެކަން ކުރަން ބޭނުންވެފައި ހުރީ. އެކަމަކު، އަހަރެން ކުޑަވީމަ އެކަން ނުކުރެވޭނެ ކަމަށް ހީކުރީ. އެކަމަކު ކައްޑެ އަހަރެން ކައިރީ ބުނީ ދަސްކުރަން ބޭނުންވޭހޭ." ހަންޓޭ ބުންޏެވެ.
ހަންޓޭ ބުނީ ކައިޓްސާފިންގެ ހުނަރު އޭނާ ގައިގައި ހުރިކަން ފުރަތަމަ ދުވަހުން ވެސް އޭނާ އަށް އެނގުނު ކަމަށެވެ. އެ ގޮތުން، ކައިޓް ކޮންޓްރޯލް ކުރަން ފުރަތަމަ ދުވަހު ދަސްވި ކަމަށާއި, ދެ ވަނަ ދުވަހު ކައިޓް ދުއްވަން ދަސްވި ކަމަށެވެ.
"އަހަރެން ކުޑައިރު, ސްކޭޓް ކުރީ ކުޑަ ކައިޓް އެއްގައި. އެހެންވެ, ފުރަތަމަ ކައިޓާ އެކު މޫދަށް އެރި ދުވަހު ކައިޓް ކޮންޓްރޯލް ކުރަން ދަސްވި. ދެން، ދެ ވަނަ ދުވަހު ދިޔަތަނާ ކައިޓް ދުއްވަން އަހަރެން އަށް ދަސްވި, އެ ހިސާބުން ކޮންމެ ދުވަހަކު ކައިޓް ކުރަން ބޭނުންވަނީ ވައި ހުރިތޯ ބަލާފައި ކައިޓް ކުރަން އަންނަން އޭގެ ފަހުން" ހަންޓޭ ބުންޏެވެ.
ހަންޓޭ އެންމެ ބޮޑަށް ވިދާލީ އޭނާގެ އުމުރުން 12 އަހަރުގަ އެވެ. ރެޑް ބުލް އިން ސްރީ ލަންކާގައި ބޭއްވި ކޭމްޕެއްގައި ބައިވެރިވެ, އޭނާގެ ހުނަރު ލަންކާގަ ދައްކާލުމާ އެކު ގިނަ ބަޔެއްގެ ލޮލުގައި ހަންޓޭ އަޅައިގަތެވެ. އެއާއެކު, އޭނާ އަށް ރެޑް ބުލް އިން ކައިޓް ކިޓެއް ހަވާލުކުރި އެވެ. އެއީ ހަންޓޭ މި ކަމުން ކުރިއަށްދާން ލިބުނު އެންމެ ބޮޑު ހިތްހަމަ ޖެހުމެވެ.
އޭގެ ފަހުން، ކައިޓް ބްރޭންޑް ސްލިންގްޝޮޓް އިން ހަތަރު އަހަރު ހަންޓޭ ސްޕޮންސާކޮށް ސްލިންގްޝޮޓް ބްރޭންޑްއާ އެކު މަސައްކަތް ކުރި އެވެ. އަދި މިދިޔަ އަހަރުން ފެށިގެން ހަންޓޭ މަސައްކަތް ކުރަނީ އަކުއާ ކިއުބް އިން ރާއްޖެ އެތެރެކުރާ ޑުއެޓޯން ބްރޭންޑާއެކުގަ އެވެ.
މިހާރު ހަންޓޭގެ އަމާޒަކީ ވޯލްޑް ޓުއާގައި ބައިވެރިވުމެވެ. ހަންޓޭ ހުރީ އެ ހުވަފެން ހަގީގަތަކަށް ހެދުމަށް ތައްޔާރަށެވެ. އަދި މިކަމުގައި ހަންޓޭ އަށް އޭނާގެ އާއިލާ އަދި ރަހުމަތްތެރިން އަދި ސްޕޮންސަރުންގެ ފަރާތުން ބޮޑު އެހީތެރިކަމެއް ލިބޭކަން ހަންޓޭ ފާހަގަކުރި އެވެ.
"އަހަރެންގެ އެންމެ ބޮޑު އުންމީދަކީ އަހަރަކު އެއްފަހަރު ކަމުގައިވިޔަސް ވޯލްޑް ޓުއާގައި ބައިވެރިވުން. އިރާދަކުރެއްވިއްޔާ އެ ހުވަފެން ހަގީގަތަކަށް ވާން މާ ދުވަހެއް ނެތް. ވޯލްޑް ޓުއާ އެޅުމަށްފަހު އަހަރެންގެ އުންމީދަކީ, ދުނިޔޭގެ ފެންވަރުގައި މިކަމުން ކުރިއަށްދިޔުން އެރެން އޮތް އެންމެ މައްޗަކަށް މިކަމުގައި ކުރިއަށް ދިޔުން" ހަންޓޭ ބުންޏެވެ.
މީގެ އިތުރުން ހަންޓޭ އަންނަނީ މިހާރު ވެސް ވޯލްޑް ރެކޯޑެއް ހެދުމަށް މަސައްކަތް ކުރަމުންނެވެ. އޭނާ އަކީ މިހާރުވެސް ކައިޓުގައި އެންމެ އުހަށް އަރާ އަރާ ތިން އެތުލީޓުންގެ ތެރޭގައި ހިމެނޭ އެތުލީޓެކެވެ. އޭނާ ވަނީ ކައިޓުގައި 169 މީޓަރު މައްޗަށް އުދުހިފަ އެވެ. އެކަމަކު، އޭނާގެ އަމާޒަކީ 200 މީޓަރުން މައްޗަށް އަރާ ދުނިޔޭގެ ރެކޯޑް ހެދުމެވެ. މި ކަމަށްޓަކާ ޕެރަޝޫޓް ޓްރެއިނިންގް ވަރަށް އަވަހަށް ހަދާނެ ކަމަށް ހަންޓޭ ބުންޏެވެ.
ރެޑްބުލް ވިންޑް ރައިޑާސް އިވެންޓްގެ ތެރެއިން ހަންޓޭ.-- ފޮޓޯ: އަތޫފް އާތިފް/ އަދަދު
"ދުނިޔޭގެ ތިން ވަނަ އަށް މިހާރު ވެސް ކައިޓް ސާފިންގް ޓޯ އަޕް އަހަރެން މި ހަދަނީ. ދެން މިއީ ވަރަށް ބޮޑަށް ސޭފްޓީ އަށް ވިސްނަން ޖެހޭ ކަމެއް. މިހާރުވެސް ގާތް ގަނޑަކަށް 200 މީޓަރު މައްޗަށް އެބައެރޭ. އެކަމަކު ދެން ޕެރަޝުޓް ޓްރެއިނިންގް ހަދާގެން ދުނިޔޭގެ ރެކޯޑް އަހަރެން ބޭނުން އަހަރެން އަތުގައި އޮންނަން" ހަންޓޭ ބުންޏެވެ.
ހަންޓޭ އަކީ ހަމައެކަނި ކައިޓްސާފް އަށް ހުސްވެ, ހުރި އެތުލީޓެއް ނޫނެވެ. އޭނާ އަކީ ގިނަ ކުޅިވަރުތަކެއް ކުޅޭ ޒުވާނެކެވެ. ވޮލީބޯލް, ސްކޭޓިން އަދި ބައިބަލާގައި ވެސް އޭނާ އަކީ ފާހަގަ ކޮށްލެވޭ ކުޅުންތެރިއެކެވެ. ހާއްސަކޮށް ބައިބަލާ އެވެ. ފުރަތަމަ މުބާރާތުން ވެސް އޭނާ ވަނީ މިސްޓަ ބައިބަލާ ހޯދައިފަ އެވެ. އެއީ މިދިޔަ އަހަރު ބޭއްވި އޮފީސްތަކުގެ ބައިބަލާ މުބާރާތުންނެވެ.
"އަހަރެން ކުޑައިރުން ފެށިގެން ކުޅެން ބޭނުންވި އެއް ކުޅިވަރު އެއީ ބައިބަލާ އަކީ, އެކަމަކު އޭރު ހަމަ ކުޑަވީމަ އެ ފުރުސަތު ނުލިބޭ, އެކަމަކު ފަހުން އަހަރެން އަށް އެ ފުރުސަތު ލިބުނީ. ފުރަތަމަ މުބާރާތުންވެސް މިސްޓަ ބައިބަލާ ލިބުން އެއީ ލިބުނު ބޮޑު ކާމިޔާބީ އެއް" ހަންޓޭ ބުންޏެވެ.
