ބ. ގޮއިދޫގަިއ މިއަދު ފެށި ރެޑް ބުލް ވިންޑް ރައިޑާސްގެ ރޭސް ކެޓަގަރީގެ ޗެމްޕިއަންކަން ހުނަރުވެރި ކައިޓް ސާފާ ހަސަން މާހިރު (ހަންޓޭ) ހޯދައިފި އެވެ.
ހަންޓޭ ވަނީ މިދިޔަ އަހަރުގެ މުބާރާތުގެ އެއްވަނަ ހޯދާފަ އެވެ. ހަންޓޭ ވަނީ މިދިޔަ އަހަރު އޭނާ ވާދަކުރި ހުރިހާ ކެޓަގަރީ އަކުންވެސް އެއްވަނަ ހޯދާފަ އެވެ.
ހަންޓޭ މި މުބާރާތުގެ ފައިނަލަށް ދިޔައީ އޭނާ ޖެހި ފުރަތަމަ ހީޓުގެ ތިން ރޭސް ކާމިޔާބުކޮށެވެ. އަދި ފައިނަލް ހަންޓޭ ކާމިޔާބުކުރީ, ފައިނަލް ހީޓުގެ ފަސް ރޭސްގެ ތެރެއިން ހަތަރު ރޭސް އެއްވަނައިގައި ނިންމައިގެންނެވެ.
ރޭސް ކެޓަގަރީގެ ފައިނަލް ހީޓުގައި ހަންޓޭ އާއެކު, ގަދަ 10 ބައިވެރިން ވާދަކުރި އެވެ. މި ކެޓަގަރީގެ ދެވަނަ ހޯދީ ލަންކާގެ ސަނަކާ ސަޑަރޫ އެވެ. އޭނާ ވަނީ ފަސް ރޭހުގެ ތެރެއިން ހަތަރު ރޭސް ދެވަނައިގައި ނިންމާފަ އެވެ. އަދި ތިންވަނަ އަށްދިޔައީ ނަސާރު އަމްޖަތު އެވެ. އޭނާ ވަނީ ފަސް ރޭހުގެ ތެރެއިން އެއް ރޭސް ދެވަނައިގައި އަދި ދެ ރޭސް ތިންވަނައިގައި ނިންމާފަ އެވެ.
ރެޑް ބުލް އިން ވަނީ މި އަހަރު ފޯ ޓު ސްކޯ ނަމުގައި މުބާރާތެއް ބާއްވާފަ އެވެ. އެ މުބާރާތުގެ ޗެމްޕިއަންކަން ހޯދީ ދި ފުޓްސަލް ޓައުން (ޓީއެފްޓީ) އެވެ. އެއާއެކު, ޓީއެފްޓީ އަށް މި އަހަރު ޖަރުމަނުގައި ކުރިއަށްދާ މުބާރާތުން ފުރުސަތު ވަނީ ލިބިފަ އެވެ.
މީގެ އިތުރުން ކުރިއަށްވެސް ރެޑް ބުލްގެ ބައިވަރު އިވެންޓް އެބަހުއްޓެވެ. ރެޑް ބުލް އިން ގޮއިދޫގައި ވިންޑް ރައިޑާސް ބާއްވާތާ މިއީ ތިން ވަނަ ފަހަރެވެ. އަދި މި ރަށުން މި އިވެންޓަށް ބޮޑު ތަރުހީބެއް ލިބެމުން އަންނަ ކަމަށް ރެޑް ބުލް އިން ވަނީ ބުނެފަ އެވެ.
