ބިންވެރިޔާ ސްކީމުގެ ދަށުން މިދިޔަ ސަރުކާރުން މާލޭ ރައްޔިތުންނަށް ދިން ގޯތިތައް ތިން މަސްދުވަސްތެރޭ ހަވާލު ކުރުން ލާޒިމުވާ ގޮތަށް، ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމް ހުށަހެޅުއްވި ބިލަށް ރައްޔިތުންގެ މަޖިލީހުގެ މެޖޯރިޓީ އޮންނަ ޕީއެންސީގެ ގިނަ މެންބަރުން މިއަދު ފާޑުވިދާޅުވެ، އެ ބިލަށް އެހި ވޯޓުގައި މިއަދު އެ ބިލު ބޭރުކޮށްލައިފި އެވެ.
މިއަދު މަޖިލީހުގައި ވޯޓަށް އެހީ އެ ބިލު ކޮމިޓީއަށް ފޮނުވުމަށެވެ. އެގޮތަށް ނުފެންނަ ކަމަށް ވޯޓުގައި ބައިވެރިވެވަޑައިގެންނެވި 88 މެންބަރުންގެ ތެރެއިން 75 މެންބަރުން ވޯޓު ދެއްވި އެވެ. ކޮމިޓީއަށް ފޮނުވަން 12 މެންބަރުން ވޯޓު ދެއްވިއިރު ވަކި ކޮޅަކަށް ވޯޓު ނުދެއްވާ އެއް މެންބަރަކު ހުންނެވި އެވެ.
ބިލު ކޮމިޓީއަށް ފޮނުވަން ފާސްނުވުމުން ބަދަލެެއް ނުގެނެސް ބިލު ފާސްކުރަން ނެގި ވޯޓުގައި ނުފެންނަ ކަމަށް 76 މެންބަރުން ވޯޓު ދެއްވި އެވެ. ބިލު ފާސްކުރަން 12 މެންބަރުން ވޯޓު ދެއްވިއިރު ވަކި ކޮޅަކަށް ވޯޓު ނުދެއްވާ އެއް މެންބަރަކު ހުންނެވި އެވެ.
ތިން މަސްދުވަހުގެ ތެރޭގައި ގޯތިހަވާލުކުރަން ލާޒިމްވާ ގޮތަށް ބިމާ ބެހޭ ގާނޫނަށް ބަދަލުގެންނަން، މީކާއީލް ހުށަހެޅުއްވި ބިލް 19 ވަނަ ރައްޔިތުންގެ މަޖިލީހުން ފާސްކޮށް، ތަސްދީގުކުރުމަށް ޓަކައި ރައީސް ޑރ.މުހައްމަދު މުއިއްޒަށް ފޮނުވި އެވެ.
އެ ބިލާ މެދު މަޖިލީހުން އަލުން ވިސްނުމަށް، އަނބުރައި ފޮނުއްވައިލެއްވި އިރު 19 ވަނަ މަޖިލީހުގެ ދައުރު އޮތީ ނިމިފަ އެވެ. އެހެންވެ، އެ ބިލާ މެދު ގޮތެއް ނިންމުމަށް ޓަކައި މަޖިލީހުގެ މިއަދުގެ ޖަލްސާގައި ބަހުސަށް ހުޅުވައިލި އެވެ.
އެ ބަހުސްގެ ފުރަތަމަ ފުރުސަތުގައި ހޮޅުދޫ ދާްއިރާގެ ޕީއެންސީ މެންބަރު އަބްދުއްސައްތާރު މުހައްމަދު ވިދާޅުވީ އެ ބިލު އަނބުރައި ފޮނުއްވައިލެއްވި އިރު ރައީސް ފޮނުއްވި ސިޓީގައި ބަޔާންކުރައްވާފައިވާ ސަބަބުތަކަށް ޓަކައި އެ ބިލު މިހާރު އޮތް ގޮތަށް ކުރިއަށް ގެންދަން ފެނިވަޑައިނުގަންނަވާ ކަމަށެވެ.
މާފަންނު ދެކުނު ދާއިރާގެ ޕީއެންސީ މެންބަރު އަބްދުﷲ ރިފާއު ވިދާޅުވީ ޖެއްސުންކުރާ އުސޫލުން ގާނޫނުތައް ފާސްކުރުމަކީ ރައްޔިތުންނަށް އެންމެ ފައިދާ ބޮޑު ގޮތް ކަމަށް ދެކެވަޑައިނުގަންނަވާ ކަމަށެވެ. މީކާއީލް ހުށަހެޅުއްވި ބިލަކީ އެފަދަ ބިލެއް ކަމަށް ވެސް ރިފާއު ސިފަކުރެއްވި އެވެ.
"މީގައި މިއޮތް މައުލޫމާތަށް ބަލާއިރުގައި އަޅުގަނޑުމެންނަށް ފެންނަނީ މުޅިން ވެސް ޖެއްސުންކުރާ އުސޫލުން މިކަން ކުރުން،" ބިލު އަނބުރައި ފޮނުއްވައިލެއްވި އިރު ރައީސް ފޮނުއްވި ސިޓީއާ ހަވާލާދެއްވައި ރިފާއު ވިދާޅުވި އެވެ.
މާފަންނު ހުޅަނގު ދާއިރާގެ ޕީއެންސީ މެންބަރު މުހައްމަދު މުސްތަފާ އިބްރާހީމް ސިފަކުރެއްވި ގޮތުގައި މީކާއީލް ހުށަޅުއްވި ބިލަކީ ފަސް އަހަރުގެ ދައުރެއް ނިމެން ކުޑަތަންވުމުން، ރައްޔިތުންނަށް "ކަމެއް ކޮަށްދޭން އުޅޭކަން ދައްކަން" ހުށަަހަޅާފައި އޮތް ބިލެއްގެ ގޮތުގަ އެވެ.
ވިލިމާލެ ދާއިރާގެ ޕީއެންސީ މެންބަރު މުހައްމަދު އިސްމާއީލް ވިދާޅުވީ މީކާއީލްގެ ބިލަކީ ނުބައި ނިޔަތެއްގައި ސިޔާސީ މަންފާ ހާސިލުކުރަން ހުށަހަޅާފައި އޮތް ބިލެއްގެ ގޮތުގައި ސިފަކުރެވޭ ކަމަށެވެ.
މިއަދުގެ ޖަލްސާގައި ވާހަކަ ދެއްކެވި ޕީއެންސީ މެންބަރުން ވިދާޅުވީ އެ ބިލު މަޖިލީހުން ބޭރުކޮށްލަން ޖެހޭ ކަމަށެވެ.
މަޖިލީހުން ފާސްކުރާ ބިލެއް ރައީސް ތަސްދީގުނުކުރައްވައި އަލުން ފޮނުވައިލުމުން އަމަލުކުރެވެން އޮންނަނީ ދެގޮތަކަށެވެ. އެއް ގޮތަކީ ބިލު އޮތް ގޮތަށް އަލުން ފާސްކުރުމެވެ. އަނެއް ގޮތަކީ ކަމާ ބެހޭ ކޮމިޓީއަކަށް ބިލު ފޮނުވައިލުމެވެ. މަޖިލީހުން ބިލު ބޭރުކުރާ ނަމަ އެގޮތަށް ފުރަތަމަ ނިންމަން ޖެހޭނީ ކޮމިޓީންނެވެ. ބިލު ބޭރުކޮށްލެވޭނީ ކޮމިޓީ ރިޕޯޓް ތަޅުމުން ފާސްކޮށްގެންނެވެ.
