ގްލާސްގޯ، ސްކޮޓްލެންޑް (ޖޫން 2) - ސްކޮޓްލޭންޑްގެ ޕްރިމިއާ ލީގުގައި 2026 ވަނަ އަހަރުން ފެށިގެން އާޓިފިޝަލް ޕިޗުތައް ބޭނުންކުރުން ހުއްޓާލުމަށް އެ ލީގުގެ ކްލަބުތަކުން ފާސްކޮށްފިއެވެ.
ސްކޮޓްލޭންޑްގެ ލީގުން މި މަހު ހުށަހަޅައިވާ ރެޒޮލޫޝަންގައި (އެއްބަސްވުމުގައި) ވާ ގޮތުން 2026/2027 ވަނަ އަހަރުގެ ސީޒަން އިން ފެށިގެން ސްކޮޓްލޭންޑްގެ ޕްރިމިއާ ލީގުގައި އާޓިފިޝަލް ޕިޗުތައް ބޭނުން ނުކުރެވޭނެ އެވެ.
މިފަދަ ހުށަހެޅުމެއް ފާސްވުމަށް ސްކޮޓްލޭންޑްގެ ލީގުގެ 12 ކްލަބުގެ ތެރެއިން ނުވަ ކްލަބުގެ ވޯޓު މަދުވެގެން ބޭނުންވާނެ އެވެ.
އަންނަ ސީޒަންގެ ސްކޮޓްލޭންޑް ލީގުގައި ހިމެނެނީ، އެބަޑީން، ސެލްޓިކް، ޑަންޑީ، ޑަންޑީ ޔުނައިޓަޑް، ހާޓްސް، ހިބަނިއަން، ކިލްމަނޮކް، މަދާވެލް، ރޭންޖާސް، ރޮސް ކައުންޓީ، ސެއިންޓް ޖޯންްސްޓޯން އަދި ސެއިންޓް މިރެން އެވެ.
މި ސީޒަންގެ ސްކޮޓްލޭންޑް ލީގުގައި ކުޅުނު ކްލަބުތަކުގެ ތެރެއިން އާޓިފިޝަލް ޕިޗު ބޭނުންކުރަނީ ކިލްމަނޮކް އަދި ލިވިންގްސްޓަން އިންނެވެ. މީގެ ތެރެއިން ލިވިންގްސްޓަން ވަނީ ރެލިގޭޓްވެފަ އެެވެ. އަންނަ އަހަރު ފެށިގެން ސްޓޭޑިއަމްގެ ޕިޗު ވިނަ ޕިޗަކަށް ބަދަލުކުރުމަށް ކިލްމަނޮކް އިން ވަނީ ނިންމައިފަ އެވެ.
ސްކޮޓްލޭންޑްގެ ލީގުން ބުނީ މި ވަގުތު އާޓިފިޝަލް ޕިޗުތައް ބޭނުންކުރާ ކްލަބުތަކުން، ވިނަ ޕިޗުތަކަށް ބަދަލުކުރުމަށް ދެ އަހަރު ދުވަހުގެ މުއްދަތެއް ދޭނެ ކަމަށެވެ.
