ފަލަސްތީނަކީ މިނިވަން ދައުލަތެއް ކަމަށް ސްލޮވޭނިއާ ސަރުކާރުން ބަލައިގެންފި އެވެ.
ސްލޮވޭނިއާގެ ބޮޑުވަޒީރު ރޮބަޓް ގޮލޮބް ނޫސްވެރިންނާ ބައްދަލުކުރައްވާ ވިދާލުވީ އެ ގައުމުގެ ސަރުކާރުން ފަލަސްތީނަކީ މިނިވަން ގައުމެއް ގޮތުގައި ބަލައިގަންނަން ނިންމާފައިވާ ކަމަށާއި، އެ ނިންމުން ފާސްކުރަން ގާނޫނު ހަދާ މަޖިލީހަށް ހުށަހަޅާނެ ކަމަށެވެ.
މިއީ ސުލްހަ ގާއިމުކުރުމަށް ދޭ މެސެޖެއް ކަމަށާއި، ސްލޮވޭނިއާއިން އަބަދުވެސް އެދެނީ ހަމަޖެހުން ކަމަށް ރޮބަޓް ވިދާޅުވި އެވެ.
ސަރުކާރުގެ ނިންމުމާ ގުޅޭ ގޮތުން ސްލޮވޭނިއާގެ ގާނޫނު ހަދާ މަޖިލީހުން ގޮތެއް ނިންމުމަށް ހަމަޖެހިފައި ވަނީ އަންނަ އަންގާރަ ދުވަހު ކަމަށް އެ މަޖިލީހުގެ ރައީސް ވަނީ ވިދާޅުވެފަ އެވެ.
ނަމަވެސް އިޒްރޭލުގެ ފޮރިން މިނިސްޓަރު ވަނީ މި ހުށަހެޅުން ސްލޮވޭނިއާގެ ގާނޫނު ހަދާ މަޖިލީހުން ފާސްނުވާނެ ކަމަށް އުންމީދުކުރާ ކަމަށް ވިދާޅުވެފަ އެވެ.
ފަލަސްތީނަކީ މިނިވަން ގައުމެއް ގޮތުގައި މެއި 28، ގައި ސްޕެއިން، އަޔަލޭންޑް އަދި ނޯވޭއިން ރަސްމީކޮށް ނިންމާފަ އެވެ.
މީގެއިތުރުން 27 މެމްބަރު ގައުމު ހިމެނޭ ޔޫރަޕިއަން ޔޫނިއަން (އީޔޫ) ގެ ސްވިޑެން، ސައިޕްރަސް، ހަންގޭރީ، ޗެކް ރިޕަބްލިކް، ސްލަވާކިއާ، ރޮމޭނިއާ އަދި ބަލްގޭރިއާއިން ވަނީ ފަލަސްތީނަކީ މިނިވަން ދައުލަތެއް ގޮތުގައި ބަލައިގެންފަ އެވެ.
އޮކްޓޫބަރު 7، އިން ފެށިގެން އިޒްރޭލުން ފަލަސްތީނަށް ދެމުން އަންނަ ހަމަލާތަކުގައި މިހާތަނަށް 36،224 މީހުން މަރުވެފައިވާއިރު، 81،777 މީހުން ވަނީ ޒަހަމްވެފަ އެވެ. އަދި އޭގެ ތެރޭގައި ގިނައީ އަންހެނުންނާ ކުޑަކުދިންނެވެ.
