ބާސެލޯނާ (މެއި 30) - ހުސްވެފައިވާ ބާސެލޯނާގެ ކޯޗުގެ މަގާމާ ދެ އަހަރުގެ ކޮންޓްރެކްޓެއްގެ ދަށުން ޖަރުމަނުގެ ކޯޗު ހަންސީ ފްލިކް ހަވާލުވެއްޖެ އެވެ.
ޖަރުމަނުގެ ގައުމީ ޓީމުގެ ކޯޗުގެ މަގާމުން މިދިޔަ ސެޕްޓެމްބަރު މަހު ފްލިކް، 59، ވަކިކުރިއިރު، އޭނާ އަށް ބާސެލޯނާގެ ކޯޗުކަން ލިބުނީ، މިދިޔަ ހަފްތާގައި އެ ޓީމުގައި ހުރި ކޯޗު ޒަވީ ހެނާންޑޭޒް ވަކިކުރުމުންނެވެ.
"މިއީ ލިބުނު ޝަރަފެއް. އަހަރެންގެ ހުވަފެނެއް ހަގީގަތަކަށް މި ވަނީ ވެފައި، މި ޓީމާ އެކު ކޮންޓްރެކްޓްގައި ސޮއިކުރެވުނު ހިސާބުން. އަހަންނަށް ބަޔާންގައި ގިނަ ކާމިޔާބީތަކެއް ލިބުނު، އެ ފަދަ ކާމިޔާބީގެ ދަތުރެއް މި ޓީމާ އެކު ވެސް ކުރަން ބޭނުން،" ފްލިކް ބުންޏެވެ.
"ބާސެލޯނާގައި އޮތީ އަހަރެންގެ ފިލޯސަފީ، އެއީ ބޯޅަ ހިފަހައްޓައިގެން ކުޅެ ނަތީޖާ ނެރުން،"
މިދިޔަ ޖެނުއަރީ މަހު ޒަވީ، ވަނީ މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލާނެކަން އިއުލާނުކޮށްފަ އެވެ. އެކަމަކު، ތަކުރާރުކޮށް ބާސެލޯނާ އިން ކުރިއަށްގެންދިޔަ މަޝްވަރާތަކަށް ފަހު، ޒަވީ އެ ނިންމުން ބަދަލުކުރި އެވެ.
މީގެ މަހެއްހާ ދުވަސްކުރިން ޒަވީ، އިއުލާނުކުރީ އިތުރު އެއް އަހަރު ބާސެލޯނާގައި މަޑުކުރަން އެއްބަސްވެވިފައިވާ ކަމަށެވެ. އެހެން ނަމަވެސް، އެންމެ ފަހުން ބާސެލޯނާ އިން ކުޅުނު މެޗަށް ފަހު، ޒަވީ، ނޫސްވެރިންގެ ބައްދަލުވުމުގައި ދެއްކި ވާހަކަތަކެއްގެ ސަބަބުން އޭނާ ވަކިކުރަން ބާސެލޯނާގެ ބޯޑު މެމްބަރުން ވަނީ ހުށަހަޅައިފަ އެވެ. އެއާ އެކު، ބާސެލޯނާ އިން ޒަވީ މަގާމުން ވަކިކުރި އެވެ.
މަގާމުން ވަކިވުމަށް ފަހު ޒަވީ ދިން އިންޓަވިއުގައި ވަނީ، ދެން ބާސެލޯނާއާ ހަވާލުވާ ކޯޗަކަށް އުނދަގޫތަކާ ކުރިމަތިވާނެ ކަމަށް ބުނެފަ އެވެ.
ފްލިކް ބުނީ، ކޮންމެ އާ ޗެލެންޖަކީ ވެސް ޕްރެޝަރުތަކަކާ އެކު އަންނަ ކަމެއް ކަމަށާއި ބާސެލޯނާގައި ރަނގަޅު މަސައްކަތްތަކެއް ކުރެވޭނެ ކަމުގެ ޔަގީންކަން އެބައޮތް ކަމަށެވެ.
ބަޔާން މިއުނިކަށް ކޯޗުކޮށްދިންއިރު، ފްލިކް ވަނީ އެ ޓީމާ އެކު، ހަތް ތަށި ހޯދައިފަ އެވެ. އޭގެ ތެރޭގައި އެއް ސީޒަނުގައި ހުރިހާ މުބާރާތް ކާމިޔާބު ކުރުން ހިމެނެ އެވެ.
