އެއްގަމު އުޅަނދުތަކަށް އަލުން ޑޮމެއިން ވިއްކަން ފަށާނީ ސައްހަ ނޫން ޑޮމެއިންތައް ދެނެގަނެ ކެންސަލަ ކުރުމަށްފަހުގައި ކަމަށް ޓްރާންސްޕޯޓް މިނިސްޓްރީން ބުނެފި އެވެ.
އެ މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު މުހައްމަދު އަމީން ވިދާޅުވީ ރާއްޖޭގައި މިވަގުތު ގާތްގަނޑަކަށް 1،400 ޑޮމެއިން ގެންގުޅޭ ކަމަށެވެ. އޭގެ ތެރޭގައި ސައްހަ ނޫން 700 ވަރަކަށް ޑޮމެއިން އުޅޭކަން މިނިސްޓަރު ވިދާޅުވި އެވެ.
ޓްރާންސްޕޯޓު މިނިސްޓްރީން ކުރިން ބޭނުންކުރަމުން އައި މެޓްރިކްސް ސިސްޓަމުގެ ތެރޭގައި ގިނަ ޑޮމެއިންތަކުގެ މައުލޫމާތު ފެންނަން ނެތް ކަމަށާއި، ސައްހަ ނޫން ޑޮމެއިންތައް ދެނެގަތުމުގެ މަސައްކަތް ކުރާނެ ކަމަށް އަމީން ވިދާޅުވި އެވެ.
"އަޅުގަނޑުމެން ބޭނުންކުރަމުން ދިޔަ މެޓްރިކްސް ސިސްޓަމް ނިޒާމުގެ ތެރޭގަ ގިނަ ރިޕޯޓްސްތަކެއް ނެތް. ރިޕޯޓްސް ފެންނަން ނެތް ޑޮމެއިންތައް ކްލިއާކުރަން އިއުލާނުކޮށްގެން އެކަން ކުރާނަން،" މިނިސްޓަރު އަމީން ވިދާޅުވި އެވެ.
މިނިސްޓަރު ވިދާޅުވީ ސައްހަ ނޫން ޑޮމެއިންތައް ވަކިކުރުމަށް ފަހު، އައު ސޮފްޓްވެއާއަކާއިއެކު ޑޮމެއިން ވިޔަފާރި ބެލެހެއްޓުމުގެ ނިޒާމު ހަރުދަނާކޮށް، އަލުން ޑޮމެއިން ވިއްކަން ފަށާނެ ކަމަށެވެ. އަލަށް ތައާރަފުކުރާ ސިސްޓަމުގެ ތެރެއިން އެއް ޑިޖިޓާއި ދެ ޑިޖިޓުގެ ޑޮމެއިން ވިއްކާނެ ކަން މިނިސްޓަރު ފާހަގަކުރެއްވި އެވެ.
އައު ސޮފްޓްވެއާ ގަތުމަށް އަންނަ އަހަރުގެ ބަޖެޓުގައި ހިމަނާނެކަން ފާހަގަކުރެއްވި އެވެ.
"މިހާތަނަށް ގެންގުޅެފަ އޮތީ ތިން ޑިޖިޓާ ހަތަރު ޑިިޖިޓުގެ ޑޮމެއިން. އަލަށް ތައާރަފުކުރާ ޑޮމެއިން ސިސްޓަމުގެ ތެރޭގައި އެއް ޑިޖިޓު ނުވަތަ ދެ ޑިޖިޓުގެ ޑޮމެއިން ވިއްކަން ހުޅުވާލަނަން،" މިނިސްޓަރު ވިދާޅުވި އެވެ.
ޑޮމެއިން ބޭނުންކުރުމުގެ ގަވާއިދާ ހިލާފަށް ޑޮމެއިންތައް ދޫކުރަމުންދާ ކަން ފާހަގަކުރިގެން ކަމަށް ބުނެ ޓްރާންސްޕޯޓް މިނިސްޓްރީން ޑޮމެއިން ވިއްކުން ހުއްޓުވީ މިދިޔަ އަހަރު އެވެ.
އޮގަސްޓު 29، 2023 ގައި އޭރުގެ މިނިސްޓަރު އައިޝަތު ނަހުލާއަށް ރައީސް އޮފީހުން ފޮނުވި ސިޓީގައި ފާހަގަކޮށްފައިވާ މައްސަލަތަކުގެ ތެރޭގައި ގަވާއިދުގައިވާ ފަދައިން ޑޮމެއިން ވިއްކުމާ ގުޅޭ މައްސަލަ ހައްލުކުރުމަށް ކޮމިޓީއެއް އެކުލަވާލާފައި ނެތުމާއި، އާންމުކޮށް އިއުލާން ކުރުމެއް ނެތި ޑޮމެއިން ވިއްކަމުންދާކަން ފާހަގަކޮށްފައިވެ އެވެ.
