ޕީއެންސީ ހުރިހާ މެންބަރުންގެ ވޯޓު އަބްދުއްރަހީމްއަށް ނުލިބޭނެކަން ކުރިން އެނގޭ: ފަލާހު

ޕީއެންސީގެ ޕީޖީ ލީޑަރު، އިބްރާހިމް ފަލާހު -- ފޮޓޯ: މިރާން ނާޝިމް / އަދަދު

ޕީއެންސީގެ ޕީޖީ ލީޑަރު، އިބްރާހިމް ފަލާހު -- ފޮޓޯ: މިރާން ނާޝިމް / އަދަދު

ވިހި ވަނަ ރައްޔިތުންގެ މަޖިލީހުގެ ރައީސްއަކު ކަނޑައަޅަން މިއަދު ނެގި ވޯޓުގައި ޕީއެންސީގެ ފަރާތުން ވާދަކުރެއްވި، ލ. ފޮނަދޫ ދާއިރާގެ މެންބަރު، އަބްދުއްރަހީމް އަބްދުﷲ އަށް ޕީއެންސީގެ ހުރިހާ މެންބަރުން ވޯޓު ނުދެއްވާނެކަން ކުރިން ވެސް އެނގޭ ކަމަށް އެ ޕާޓީގެ ޕަލަމެންޓު ގުރޫޕު ލީޑަރު، އިބްރާހިމް ފަލާހު ވިދާޅުވެއްޖެ އެވެ.

މަޖިލީހުގެ ހުވާ ކުރެއްވުމަށްފަހު ޕީއެންސީ ޕީޖީ ގުރޫޕުން ފުރަތަމަ ފަހަރަށް މިއަދު ބޭއްވި ނޫސްވެރިންގެ ބައްދަލުވުމުގައި "އަދަދު" ނޫހުން ކުރި ސުވާލަކަށް ޖަވާބުދެއްވަމުން ފަލާހު ވިދާޅުވީ ޕީއެންސީން ކުރިން ވެސް ގަސްދުކޮށްގެން ތިބީ އެ ޕާޓީގެ ހުރިހާ މެންބަރުންގެ ވޯޓު އަބްދުއްރަހީމްއަށް ނުލިބޭނެ ކަމަށެވެ.

"[މިއަދު] މަޖިލީހުގެ ތަޅުމުގައި މިއަދު ނެގުނު ވޯޓަކީ ހަމަ އަޅުގަނޑުމެން، އެ އަދަދު އެއީ ހަމަ އަޅުގަނޑުމެން ބަލައިގެން ތިބި އަދަދު އިނގޭތޯ ފުރަތަމަ ހަމަ، އަޅުގަނޑުމެން ގަސްދުކޮށްފައި އޮތް ގޮތަށް ހަމަ ވޯޓުގެ ކަންކަން ދިޔައީ،" ފަލާހު ވިދާޅުވި އެވެ.

މިއަދު ހުވާ ކުރި މަޖިލީހުގެ ރައީސް ހޮވަން ހެނދުނު ނެގި ވޯޓުގައި މަޖިލީހުގެ 93 މެންބަރުންގެ ތެރެއިން 92 މެންބަރުން ބައިވެރިވެވަޑައިގެންނެވި އެވެ. ވޯޓު ނުލައްވަނީ މިއަދުގެ ރިޔާސަތު ބެލެހެއްޓެވި، ދ. މީދޫ ދާއިރާގެ މެންބަރު އަހުމަދު ސިޔާމް އެވެ.

މަޖިލީހުގައި ޕީއެންސީގެ 75 މެންބަރުން ތިއްބެވި ނަމަވެސް މިއަދުގެ ވޯޓުގައި އަބްދުއްރަހީމްއަށް ވޯޓުދެއްވީ 71 މެންބަރެކެވެ. އިދިކޮޅު އެމްޑީޕީގެ ފަރާތުން މަޖިލިސް ރައީސްކަމަށް ކުރިމަތިލެއްވި ހިތަދޫ ދެކުނު ދާއިރާގެ މެންބަރު، އިބްރާހިމް ނާޒިލްއަށް ލިބިވަޑައިގެންނެވީ 14 ވޯޓެވެ. ބާކީ ހަތް ވޯޓު ވީ ބާތިލެވެ.

މަޖިލީހުގެ ރައީސްއަކު ހޮވުމަށް ނެގި ވޯޓުގައި އަބްދުއްރަހީމްއަށް 71 ވޯޓު ލިބިވަޑައިގެންނެވިއިރު، ސަރުކާރަށް ތާއީދު ކުރާ ޕާޓީތަކުގެ ހަތަރު މެންބަރަކު ވެސް މަޖިލީހުގައި ތިއްބަވަ އެވެ. އެއީ މިއަދުގެ ރިޔާސަތު ބެލެހެއްޓެވި، އަހުމަދު ސިޔާމްއާއި ވެލިދޫ ދާއިރާގެ މެންބަރު، މުހައްމަދު އައްބާސްއާއި މާމިގިލީ ދާއިރާގެ މެންބަރު، ގާސިމް އިބްރާހިމްގެ އިތުރުން މާފަންނު އުތުރު ދާއިރާގެ މެންބަރު، މުހައްމަދު ނާޒިމް އެވެ.

އަބްދުއްރަހީމްއަށް ޕީއެންސީގެ ހުރިހާ މެންބަރުން ވޯޓު ނުދެއްވި ނަމަވެސް މަޖިލީހުގެ ރައީސްކަމަށް އަބްދުއްރަހީމްގެ ނަން ހުށަހެޅުއްވީ ސީދާ ރައީސުލްޖުމުްހޫރިއްޔާ، ޑރ. މުހައްމަދު މުއިއްޒު އެވެ. އަބްދުއްރަހީމްގެ ނަން އެމަނިކުފާނު ހުށަހެޅުއްވީ މުލިއާގޭގައި ސަރުކާރާއި ސަރުކާރު ކުންފުނިތަކުގެ ވެރިންނާއި މިއަދު ހުވާކުރެއްވި ހުރިހާ މަޖިލިސް މެންބަރުން ބައިވެރިވެވަޑައިގެންނެވި ބައްދަލުވުމެއްގެ ތެރޭގަ އެވެ.

މަޖިލިސް ރައީސްކަމަށް މިއަދު އިންތިހާބުވެވަޑައިގެންނެވި އަބްދުއްރަހީމްއަކީ މި ސަރުކާރު ގެނައުމަށް އެންމެ ބުރަކޮށް މަސައްކަތް ކުރެއްވި އެއް ބޭފުޅާ އެވެ. އެމަނިކުފާނަކީ ފާއިތުވި ފަސްއަހަރު އިދިކޮޅުގެ ހުންގާނުގައި ވެސް ހިއްޕަވައިގެން ހުންނެވި މާލިމީ އެވެ.

ރައީސް މުއިއްޒު އެދިވަޑައިގެންނެވި ގޮތަށް ޕީއެންސީގެ ހުރިހާ މެންބަރުން އަބްދުއްރަހީމްއަށް މިއަދު ވޯޓު ނުދިނުުގެ ކުރިން ވެސް ޕީއެންސީ ޕީޖީ ގުރޫޕު ތެރޭގައި އަބްދުއްރަހީމްއާ މެދު ހިތްހަމަ ނުޖެހުންތަކެއް ބައެއް މެންބަރުންގެ އޮތް ކަމަށް އަޑުތައް ފެތުރުނެވެ. ނަމަވެސް މިހައިތަނަށް ޕީއެންސީން ދިޔައީ އެކަން ދޮގު ކުރަމުންނެވެ.

ކޮމެންޓް

ފަހުގެ ޚަބަރު

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

ހިދުމަތުގެ އެންމެ މަތީ ޝަރަފު މުހައްމަދު ރަޝީދާއި އައްބާސަށް

ދައުލަތަށް ހިދުމަތް ކުރުމުގެ އެންމެ މަތީ ޝަރަފު، މުހައްމަދު ރަޝީދު އިބްރާހީމާއި އައްބާސް އިބްރާހީމަށް ވަނީ އަރުވާފައި. މުހައްމަދު ރަޝީދަށް މި ޝަރަފު އެރުވީ ދީނީ ރޮނގުން ކުރެއްވި ހިދުމަތްތަކަށް ކަމަށްވާއިރު، އައްބާސް އިބްރާހީމަށް މި ޝަރަފު އެރުވީ ދިވެހިބަހާއި އަދަބިއްޔާތުގެ ދާއިރާއިން.

އާންމުންގެ ތަނަވަސްކަން ހުއްޓުވަނީ ރާއްޖެ ނިކަމެތިކުރުން: ނަޝީދު

ރަސްމާލެ މަޝްރޫއު އީގަލް ހިލްސް ކުންފުންޏާ ހަވާލުކުރުމާ ދެކޮޅަށް އެމްޑީޕީން ކުރާ މަސައްކަތަކީ އާންމު ރައްޔިތުންނަށް ލިބެން އޮތް ތަނަވަސްކަން ހުއްޓުވައި ރާއްޖެ ނިކަމެތިކުރުމަށް ޖަހާ މަޅިއެއް ކަމަށް ނަޝީދު ވިދާޅުވި.

ޖޭޕީ، އަދާލަތު، އެމްޑީއޭ އަދި އެމްއެންޕީން މެންބަރުން ވަކިވަނީ

އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި ޖޭޕީ، އެމްޑީއޭ، އަދާލަތު އަދި އެމްއެންޕީން ގިނަ އަދަދެއްގެ މެންބަރުން ވަނީ ވަކިވެފައި. މީގެ ބަދަލުގައި ސަރުކާރު ހިންގާ ޕީއެންސީއާއި އިދިކޮޅު އެމްޑީޕީގެ މެންބަރުންގެ އަދަދު ބޮޑުތަނުން އިތުރުވި. އެންމެ ގިނަ މެންބަރުން ވަކިވީ ޖޭޕީން ކަމަށްވާއިރު، އެންމެ ގިނަ މެންބަރުން އަލަށް ގުޅުނީ ޕީއެންސީއާ

އިސްތިއުނާފު ލަސްވާ މައްސަލައިގައި ޖޭއެސްސީ ހާޒިރުކުރަނީ

ޖަލު ހުކުމް ތަންފީޒުކޮށް ނިމޭއިރުވެސް އިސްތިއުނާފު މަރުހަލާ ނުނިމޭ މައްސަލައަށް ގާނޫނީ ހައްލެއް ހޯދުމަށް ޖޭއެސްސީ މަޖިލީހުގެ ޖުޑިޝަރީ ކޮމިޓީއަށް ހާޒިރުކުރުމަށް ވަނީ ފާސްކޮށްފަ. އިސްތިއުނާފު މައްސަލަތައް ނިންމަންޖެހޭ ވަކި މުއްދަތެއް ގާނޫނުގައި ނެތުމުގެ ސަބަބުން ކުށްވެރިންގެ އަސާސީ ހައްގުތައް ގެއްލެމުންދާކަން މެންބަރުން ފާހަގަކުރެއްވި.

"ބިން ދީ ދީނާއި މިނިވަންކަން ގެއްލުވާ ވެރިޔަކު އަދި މި ނޫނީ ނާދޭ"

ބޭރު މީހުންނަށް ބިން މިލްކުކުރެވޭ ގޮތަށް ސަރުކާރުން ނިންމާފައިވާ ނިންމުމަކީ ރާއްޖޭގެ ދީނީ ވަހުދަތާއި މިނިވަންކަމަށް އޮތް ބޮޑު ނުރައްކަލެއް ކަމަށާއި މި ނިންމުމުގެ ސަބަބުން ރާއްޖޭގެ ބިންތަކުގެ މިލްކުވެރިކަން އެހެން ދީންތަކުގެ މީހުންނަށް ލިބިދާނެ ކަމުގެ ބިރު އޮތްކަން ފާހަގަކުރައްވައި، ގައުމު ދިފާއުކުރުމަށް ނުކުތުމަށް ޖަމީލު ގޮވާލައްވައިފިއެވެ.

ސުޕްރީމް ކޯޓުގެ ފަނޑިޔާރުންނަށް އޮނަރަބަލް ކިޔަން އަންގައިފި

ސުޕްރީމް ކޯޓުގެ ފަނޑިޔާރުންނާ މުހާތަބުކުރާއިރު "އޮނަރަބަލް" ކިޔުމަށް ޖޭއެސްސީން ރަސްމީކޮށް އަންގައި ސާކިއުލާއެއް ވަނީ ނެރެފައި. މި ބަދަލާއެކު ފަނޑިޔާރުންގެ ނަމުގެ ކުރިއަށް "އަލްއުސްތާޒް" ބޭނުންކުރުން ހުއްޓާލަން ޖެހޭއިރު، މިއީ މީގެ ކުރިން އަމަލުކުރަމުން އައި އުސޫލަށް ގެނައި ރަސްމީ ބަދަލެއް.

Newsletter

Get the latest news delivered straight to your inbox