މިއަދު ހުވައިކުރި 20 ވަނަ ރައްޔިތުންގެ މަޖިލީހުގެ ގަވާއިދު އެކުލަވައިލައި ފާސްކުރެވެންދެން، މިދިޔަ ދައުރުގައި ފާސްކޮށް އަމަލުކުރަމުން އައި ގަވާއިދު ދަމަހައްޓަން، މަޖިލީހުން މިއަދު ފާސްކޮށްފި އެވެ.
މަޖިލީހުގެ މަސައްކަތް މެދު ނުކެނޑި ކުރިއަށް ގެންދިއުމަށް ޓަކައި ކުރީގެ ގަވައިދު މިވަގުތަށް ދަމަހައްޓަން މިއަދުގެ ޖަލްސާގައި ހުށަހެޅުއްވީ އިނގުރައިދޫ ދާއިރާގެ ޕީއެންސީ މެމްބަރު އިބްރާހީމް ފަލާހެވެ. ތާއީދުކުރެއްވީ މައްޗަންގޮޅި އުތުރު ދާއިރާގެ މެމްބަރު އިބްރާހީމް މުހައްމަދެވެ.
އެ ހުށަހެޅުން ފާސްކުރަން ފާސްކުރީ މިއަދުގެ ޖަލްސާގައި ބައިވެރިވެވަޑައިގެން، ވޯޓުގައި ބައިވެރިވެވަޑައިގެންނެވި 90 މެމްބަރުންގެ އިއްތިފާގުންނެވެ.
މަޖިލީހުގެ މިދައުރުގައި އަމަލުކުރާނެ އާ ގަވައިދު އެކުލަވައިލަން، މަޖިލީހުގެ އާއްމު ކޮމިޓީއާ ހަވާލުކޮށް، އެ މަސައްކަތް ނިންމާނެ ސުންގަޑި ވެސް އެ ހުށަހެޅުމުގައި ކަނޑައެޅި އެވެ. އެ ހުށަހެޅުމުގައިވާ ގޮތުން ޖޫން 02، ގެ ކުރިން އާއްމު ކޮމިޓީން އެ މަސައްކަތް ނިންމަން ޖެހޭނެ އެވެ.
މިއަދު ހެނދުނު ހުވައިކުރި 20 ވަނަ ރައްޔިތުންގެ މަޖިލީހުގެ ސުޕަ މެޖޯރިޓީ އޮތީ ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށެވެ. ޕީއެންސީއަށް ނިސްބަތްވާ 75 މެންބަރުން މަޖިލީހުގައި ތިއްބަވަ އެވެ. ސަރުކާރަށް ތާއިދުކުރާ މެންބަރުންނާ އެކު އެ އަދަދު 79 އަށް އަރަ އެވެ.
