މެންޗެސްޓާ (މެއި 27) - އަންނަ ސީޒަނަށް ފަހު، މެންޗެސްޓާ ސިޓީއާ އެކު ހަދާފައިވާ ކޮންޓްރެކްޓް ހަމަވުމުން، އެ ޓީމުގެ ކޯޗު ޕެޕް ގާޑިއޯލާ އެ ޓީމު ދޫކޮށްލާނެކަަމަށް ބެލެވޭތީ، ސިޓީން އާ ކޯޗެއް ހޯދުމުގެ މަސައްކަތް ފަށާފައިވާ ކަމަށް ރިޕޯޓްތައް ބުނެފި އެވެ.
ސިޓީއާ އެކު، ގާޑިއޯލާ ހަދާފައިވާ ކޮންޓްރެކްޓް އަންނަ އަހަރުގެ ޖޫން މަހުގެ ނިޔަލަށް ހަމަވާނެ އެވެ. އެއްބަސްވުން އާ ކުރަން ސިޓީން އަންނަނީ މި އަހަރު ފެށުނުއިރުއްސުރެ މަސައްކަތް ކުރަމުންނެވެ. އެކަމަކު، މިހާތަނަށް އަދި އަލިމަގެއް ނުފެނެ އެވެ.
"ހަގީގަތަކީ އަހަރެން މަަޑުކުރުމަށް ވުރެ ގާތީ ކްލަބް ދޫކޮށްލުން، މިހާރު އަށް އަހަރު އެވީ، ދެން އެ ވަނީ ނުވަ އަހަރު، އަހަރެން މި ވަގުތު ވިސްނައިގެން މި ހުރީ އަންނަ ސީޒަނުގައި މަޑުކުރަން، ދެން، އަންނަ ސީޒަނުގެ ތެރޭގައި އަހަރެމެން ވާހަކަ ދައްކައިގެން މި ކަމަށް ގޮތެއް ނިންމުން އޮތީ،" އިނގިރޭސި ޕްރިމިއާ ލީގުގެ ޗެމްޕިއަންކަން ހޯދުމުގެ އުފާފާޅުކުރުމުގެ ތެރެއިން ގާޑިއޯލާ ބުންޏެވެ.
އޭގެ ފަހުން، ސިޓީން ސީޒަން ނިމުމަށް ފަހު، ބޭއްވި ޕެރޭޑުގެ ތެރެއިން އެ ކްލަބްގެ މީޑިއާ އިން ވަނީ މުޅި އުމުރަށް ސިޓީގައި މަޑުކުރެވޭނެތޯ ސުވާލުކޮށްފަ އެވެ. ޖަވާބުގައި ގާޑިއޯލާ ބުނެފައިވަނީ، އަންނަ އަހަރު އެފްއޭ ކަޕާ އެކު އުފާފާޅުކުރަން އަމާޒުހިފާފައިވާ ކަމަށެވެ.
މި ސީޒަނުގައި ސިޓީ ވަނީ އެފްއޭ ކަޕްގައި، މެންޗެސްޓާ ޔުނައިޓެޑް އަތުން 2-1 އިން ބަލިވެފަ އެވެ.
މުސްތަގުބަލާ ގުޅޭގޮތުން ވާހަކަ ދައްކަން ސިޓީގެ ޗެއާމަން ހަލްދޫން އަލް މުބާރަކް ވަނީ ގާޑިއޯލާއާ އެކު ބައްދަލުވުމެއް ބާއްވައިފަ އެވެ. ރިޕޯޓްތައް ބުނާގޮތުން، ގާޑިއޯލާ ވަނީ އެ ކްލަބާ އެކު އެއްބަސްވުން އާ ކުރެވެން ނެތް ކަމަށް ބުނެފަ އެވެ. އެއާ އެކު، ސިޓީން އާ ކޯޗެއް ހޯދުމުގެ މަސައްކަތް ވަނީ ފަށައިފަ އެވެ.
ބަޔާން މިއުނިކް ދޫކޮށް، 2016 ވަނަ އަހަރު ސިޓީ އަށް ބަދަލުވި ގާޑިއޯލާ ވަނީ މިހާތަނަށް އެ ޓީމާ އެކު، ހަ ފަހަރު އިނގިރޭސި ޕްރިމިއާ ލީގު، ހަަތަރު ފަހަރު ލީގު ކަޕް، އެފްއޭ ކަޕް ދެ ފަހަރު، ޗެމްޕިއަންސް ލީގާއި ޔުއެފާ ސުޕަ ކަޕް އަދި ފީފާ ކްލަބް ވޯލްޑް ކަޕް އެއް ފަހަރު ކާމިިޔާބުކޮށްފަ އެވެ.
