މި އަހަރުގެ ޖުލައި މަހުގައި ފްރާންސްގެ ޕެރިހުގައި ފަށާ, އޮލިމްޕިކްސް 2024 ގައި އެތުލެޓިކްސް އިން ވާދަކުރާނީ އިބާދުﷲ އާދަމް ކަމަށް އެތުލެޓިކްސް އެސޯސިއޭޝަން އިން ހާމަކޮށްފި އެވެ.
ޖެމެއިކާގައި ތަމްރީނު ފުރިހަމަކުރަމުން އަންނަ އިބާދުﷲ އަކީ ކުރި އަރަމުން އަންނަ ޒުވާން އެތުލީޓެކެވެ. މި ފަހުން އެތުލެޓިކްސް އެސޯސިއޭޝަނުން ބެލި ޓައިމް ޓްރައިލްސް ތަކުން އެންމެ ރަނގަޅު ޓައިމިންގް އެއް ނެރެފައިވަނީ ވެސް އިބާދުﷲ އެވެ.
ޓައިމް ޓްރަޔަލް އަށް ބެލިއިރު، އިބާދުﷲ ގެ ޓައިމިން އަކީ، 10.50 ސިކުންތެވެ.
އިބާދުﷲ "އަދަދު" އަށް ބުނީ މިއީ މިދިޔަ ހަތަރު އަހަރު އެންމެ ބޮޑު ޓާގެޓަށް ހަދައިގެން މަސައްކަތް ކުރި ކަންތައް ކަމަށެވެ. އަދި މިއީ ކުޑައިރުން ފެށިގެން ދެކެމުން އައި އެއް ހުވަފެނެއް ކަމަށް އިބާދުالله ބުންޏެވެ.
"މިއީ ކުޑައިރުން ފެށިގެން ދެކެމުން އައި ހުވަފެނެއް ހަގީގަތަކަށް ވުން. މިދިޔަ ހަތަރު އަހަރު އެންމެ ބޮޑު ޓާގެޓަކަށް ހަދައިގެން ވޯކް ކުރީ މި އަށް. (އޮލިމްޕިކްސް އަށް)،" އިބާދުﷲ ބުންޏެވެ.
އިބާދުﷲ ބުނީ މިއީ އެންމެ ފުރަތަމަ ދުވަން ފެށިއިރު, އޭރުގެ ކޯޗު ރައުހަތު ވެސް ދެކެމުން އައި ހުވަފެން ކަމަށެވެ. އަދޮ ކޯޗު ރައުހަތު، އަަބަދުވެސް، އިބާދުالله އަށް މިކަން ވާނެ ކަމަށް ބުނި ކަމަށެވެ.
އެންމެ ފަހުން ކުރިއަށްދިޔަ އޭޝިއަން ގޭމްސް އާއި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި އަނިޔާގެ ސަބަބުން އިބާދުﷲ ވާދަކޮށްފައި ނުވެ އެވެ. އެކަމަކު، މި ކާމިޔާބީއާ އެކު އިބާދުﷲ ހުރީ އެ ދެ ގޭމްސްގައި ވާދަނުކުރެވުނު ހިތާމަ ފޮހެލައިގެންނެވެ.
އިބާދުﷲ އިތުރަށް ބުނީ މިއީ އަދި ފެށުމެއް ކަމަށާއި އިތުރު ކާމިޔާބީ ހޯދަން ބޭނުންވާ ކަމަށެވެ.
މި ފަހަރުގެ އޮލިމްޕިކްސްގައި ރާއްޖޭން ހަތަރު ކުޅިވަރަކުން ވާދަކުރާނެ އެވެ. އެއީ އެތުލެޓިކްސްގެ އިތުރުން ބެޑްމިންޓަން، ޓޭބަލް ޓެނިސް އަދި ފެތުމެވެ.
ޓޭބަލް ޓެނިސް ތަރި ފާތިމަތު ދީމާ އަލީ އަކީ، ރާއްޖޭން އޮލިމްޕިކްސް އަށް ކޮލިފައިވި ފުރަތަމަ އެތުލީޓެވެ. އިބާދުﷲ އާއި ބެޑްމިންޓަން ތަރި، ފާތިމަތު ނަބާހާ، އޮލިމްޕިކްސްގައި ވާދަކުރަނީ، ޓްރައިޕާޓައިޓް އިންވިޓޭޝަނަލް ފުރުސަތެއްގަ އެވެ.
ސްވިމިން އިން އޮލިމްޕިކްސްގައި ވާދަކުރާ އެތުލީޓުންގެ ނަން އަދި އިއުލާނެއް ނުކުރެ އެވެ.
