ދ. މާދެލީގައި އަޅަން ނިންމައި، ފ. ނިލަންދޫ އަށް ބަދަލުކުރި މަސް ފެކްޓްރީ އެޅުމަށް ރައީސް ޑރ. މުހައްމަދު މުއިއްޒު ވައުދުވެވަޑައިގަތްއިރު ވެސް މާދެލި އޮތީ އެހެން ބޭނުމަކަށް ބަޔަކަށް ދީފައިކަން ސަރުކާރަށް އެނގޭ ކަމަށް ފިޝަރީޒް މިނިސްޓްރީން ބުނެފި އެވެ.
މިއަދު އޮތް ނޫސްވެރިންގެ ބައްދަލުވުމެއްގައި މައުލޫމާތުދެއްވަމުން ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ މާދެލީގައި މަސް ފެކްޓްރީ އެޅުމަށް ރިޔާސީ އިންތިހާބުގެ ކެމްޕެއިނުގެ ތެރޭގައި ރައީސް މުއިއްޒު ވައުދުވެވަޑައިގަތީ، އެހިސާބުގެ މަސްވެރިން އަދި ރައްޔިތުންގެ އެދުމުގެ މަތިން ކަމަށެވެ.
ޝިޔާމް ވިދާޅުވީ މާދެލީގައި މަސް ފެކްޓަރީއެއް އެޅުމަށް ރައީސް ވައުދުވެވަޑައިތް އިރު ވެސް، އެ ރަށް އެހެން ބޭނުމަކަށް ދޫކުރެވިފައިވާކަން ރައީސް މުއިއްޒަށް ވެސް އެނގިވަޑައިގަންނަވާ ކަމަށެވެ.
"އެމަނިކުފާނުގެ ކެމްޕެއިނުގަ ވަޑައިގަނެ ރައީސުލްޖުމުހޫރިއްޔާ ވިދާޅުވީ ދ. މާދެލީގަ މަސް ފެކްޓްރީއެއް ގާއިމުކޮށްދެއްވާނެ ކަމަށް. މާދެލި އޮތީ އޭރުގަ ވެސް ރައީސުލްޖުމުހޫރިއްޔާއަށް ވެސް އެނގިވަޑައިގަންނަވާ އޭރުގަވެސް އެހެން ބޭނުމަކަށް ދެވިފަ އޮތް ރަށެއްކަން،" ޝިޔާމް ފާހަގަކުރެއްވި އެވެ.
އެގޮތުން އެ ރަށުގައި މަސް ފެކްޓްރީ އެޅޭ ގޮތް ނުވީ، އެހެން ބޭނުމަކަށް ދޫކޮށްފައި އޮތުމުން މާދެލި އަނބުރާ ދައުލަތަށް ހޯދުމުގައި މާލީ ބޮޑު ބުރައެއް އުފުލަންޖެހޭތީ ކަމަށް މިނިސްޓަރު ޝިޔާމް ފާހަގަކުރެއްވި އެވެ.
"ދިވެހިރާއްޖޭގެ މާލީ ހާލަތު މިވަގުތު އޮތް ގޮތުންނާއެކީގަ އެހެން ބޭނުމަކަށް ވެފިފަ އޮތް ރަށަކަށް ވާތީ އެ ރަށް އަނބުރާ ސަރުކާރަށް ހޯދުމުގަ މާލީ ވަރަށް ބޮޑު ބުރައެއް ދައުލަތުން އުފުލަންޖެހޭތީ ދެން އިހިސާބުގަ މި ފެކްޓްރީ ގާއިމްކުރެވޭނީ ނިލަންދޫގަކަމަށްވާތީ އެގޮތަށް އެވަނީ ބަދަލުކުރެވިފަ،" ޝިޔާމް ވިދާޅުވި އެވެ.
މާދެލީގައި މަސް ފެކްޓަރީއެއް ހަދަން ރައީސް މުއިއްޒު ފުރަތަމަ ވައުދުވެވަޑައިގެންނެވިއިރު ވެސް އެ ރަށުގައި ރިސޯޓެއް ހަދަން އެސްއޭއެސް ކެޕިޓަލް ޕްރައިވެޓް ލިމިޓެޑްއާ އޮތީ ހަވާލުކޮށްފަ އެވެ. ސެއިންޓް ރެޖިސްގެ ވޮއްމުލި ހިންގާ އެ ކުންފުންޏާ މާދެލި ހަވާލުކުރީ ޖުލައި 5، 2023، ގަ އެވެ. އެއީ ސެއިންޓް ރެޖިސްއަކީ މެރިއަޓް ހޮޓެލްސްގެ ދަށުން ހިންގާ ކުންފުންޏެވެ. މާދެލީގެ އެކުއިޒިޝަން ކޮސްޓު ވެސް އެސްއޭއެސް އިން އޮތީ ދައްކައިފަ އެވެ. އެއީ 7.2 މިލިއަން ޑޮލަރު (111،024،000ރ.) އެވެ.
މާދެލި ހިމެނޭ ގޮތަށް ތިން ރަށެއްގައި މަސް ފެކްޓަރީ ހަދަން ޗައިނާގެ ޑޮންފަންގް އިލެކްޓްރިކް އިންޓަނޭޝަނަލް ކޯޕަރޭޝަނާއެކު ފިޝަރީޒް މިނިސްޓްރީން އެމްއޯޔޫއެއްގައި ސޮއިކުރީ ނިމިގެން ދިޔަ ރައްޔިތުންގެ މަޖިލީހުގެ އިންތިހާބު ބޯމަތިވެފައި އޮއްވައި، އޭޕްރީލް 14 ގަ އެވެ. އެ އެއްބަސްވުމުގައި ފިޔޯރީ އަދި ފެލިވަރުގައި މަސް ފެކްޓަރީއެއް ހެދުން ވެސް ހިމެނެ އެވެ.
މާދެލީ މަޝްރޫއުގައި އެ ރަށުގައި ބަނދަރެއް ހެދުމާއި، މުވައްޒަފުން ތިބުމަށް އެކޮމޮޑޭޝަން އެޅުމާއި މަގުތައް ހެދުމާއި 1500 ޓަނުގެ ކޯލްޑް ސްޓޯރޭޖަކާއި ބްރައިން އަދި ބްލާސްޓް ފްރީޒިން ފެސިލިޓީތައް އަދި 50 ޓަނުގެ ޕްރޮސެސިން ފެސިލިޓީއެއް ހިމެނެ އެވެ.
އެ މަޝްރޫއު ފ. އަތޮޅު ވެރިރަށް، ނިލަންދޫ އަށް ބަދަލުކުރީ އެ ރަށް އާބަން ސެންޓަރެއްގެ ގޮތުގައި ތަރައްގީ ކުރަން މި ސަރުކާރުން ކަނޑައަޅާފައިވާތީ ކަމަށް ފިޝަރީޒް މިނިސްޓްރީން އިއްޔެ ބުންޏެވެ. މަސް ފެކްޓަރީ އެޅުމަށް ބިން ހަމަޖެއްސުމާ ގުޅޭ ގޮތުން ފިޝަރީޒު މިނިސްޓްރީގެ ޓީމެއް އިއްޔެ އެ ރަށަށް ޒިޔާރަތްކޮށް ކައުންސިލާއެކު މަޝްވަރާކުރި އެވެ.
