ޕެރިހުގައި މި ފަހަރު ބާއްވާ އޮލިމްޕިކްސް އިން ފުރުސަތު ހޯދައި، ބެޑްމިންޓަން ކުޅުންތެރިޔާ، ފާތިމަތު ނަބާހާ (ނަބާ) ހާއްސަ ޝަރަފެއް ހޯދައިފި އެވެ.
ނަބާ އަކީ ރާއްޖޭގެ ބެޑްމިންޓަން ތާރީހުގައި ވެސް އޮލިމްޕިކްސްގެ ދެ މުބާރާތެއްގައި ވާދަކުރާނެ ފުރަތަމަ ކުޅުންތެރިޔާ އެވެ. އޮލިމްޕިކްސްގެ ބެޑްމިންޓަން އިވެންޓުގައި ރާއްޖޭން ފުރަތަމަ ފަހަރަށް ވާދަކުރީ 2012 ވަނަ އަހަރުގެ ލަންޑަން އޮލިމްޕިކްސްގައި ވާދަކުރި މުހައްމަދު އަޖުފާން ރަޝީދު އެވެ. އޭގެ ފަހުން، ޓޯކިޔޯ 2020 އޮލިމްޕިކްސްގައި ނަބާ ވާދަކުރި އެވެ.
ޓްރައިޕާޓައިޓް އިންވިޓޭޝަނަލް ފުރުސަތެއްގައި، ނަބާ އަށް މި ވަނީ ޖެހިޖެހިގެން ދެ ވަނަ އޮލިމްޕިކްސް އިން ފުުރުސަތު ލިބިފަ އެވެ. މިއީ، މިދިޔަ ހަތަރު އަހަރެއްހާ ދުވަހު، ބައިނަލްއަގުވާމީ މުބާރާތްތަކުގައި ނަބާ ދެއްކި ޕާފޯމަންސަށް ބަލާފައި ލިބިގެންދިޔަ ފުރުސަތެކެވެ.
ނަބާ ބުނީ، ދެ ވަނަ ފަހަރަށް އޮލިމްޕިކްސްގައި ވާދަކުރުމުގެ ފުރުސަތު ލިބިގެންދިއުމުން ވަރަށް ބޮޑަށް ހިތްހަމަޖެހޭ ކަމަށާއި އެކަން ހާސިލްކުރަން އެހީތެރިވި އެންމެންނަށް ވަރަށް ބޮޑަށް ޝުކުރު އަދާކުރާ ކަމަށެވެ. އެ ގޮތުން، ނަބާ ވަނީ އޭނާގެ އެއް މާބަނޑު ކޮއްކޮ، އައިމިނަތު ނަބީހާ (ނަބީ) އަށް ހާއްސަ ޝުކުރެއް އަދާކޮށްފަ އެެވެ. އެއީ، އޮލިމްޕިކްސް އަށް ދިއުމަށް މި ކުރި ދަތުރުގައި އެކުގައި ގިނަ ކަންތައްތަކެއް ހާސިލްކުރެވިފައިވާއިރު، ބޮޑު ސަޕޯޓެއް ލިބިފައިވާތީ އެވެ.
މީގެ އިތުރުން ނަބާ ވަނީ މޯލްޑިވްސް އޮލިމްޕިކް ކޮމިޓީ އާއި ސްޕޯޓްސް މިނިސްޓްރީގެ ސަޕޯޓްގެ އިތުރުން، ގައުމީ ބެޑްމިންޓަން ކޯޗު ކޮރެއާގެ ޖަން ކީ ޔަން އާއި ރިވައިވަލް ސްޕޯޓްސް ކްލަބްގެ ކޯޗަކަށް ހުރި ނަޝްފާން މުހައްމަދު އަށް ވެސް ޝުކުރު އަދާކޮށްފަ އެވެ.
މި ފަހަރުގެ އޮލިމްޕިކްސްގައި ރާއްޖޭން ފުރަަތަަމަ ފަހަރަށް ހަަތަރު ކުޅިވަރެއްގައި ވާދަކުރާނެ އެވެ. އެއީ، ޓޭބަލް ޓެނިހާއި ބެޑްމިންޓަންގެ އިތުރުން ކުރިން ވެސް ފުރުސަތު ލިބެމުން އަންނަ ސްވިމިން އަދި އެތުލެޓިކްސް އެވެ.
މީގެ ކުރިން އޮލިމްޕިކްސްގައި އެއް ފަހަރަށް ވުރެ ގިނަ ފަހަރު ވާދަކުރުމުގެ ޝަރަފް ހޯދާފައިވާ ދިވެހި އެތުލީޓުންނަށް ބަލާއިރު، ތިން އޮލިމްޕިކްސްގައި ވާދަކުރި ހަމައެކަނި އެތުލީޓަކީ، އެތުލެޓިކްސްގެ، އަހުމަދު ޝަގީފް (ރިވަރިން) އެވެ. ދެ އޮލިމްޕިކްސްގައި ވާދަކުރި އެތުލީޓުންނަށް ބަލާއިރު، އެތުލެޓިކްސްގެ ހުސެއިން ހަލީމް (ކުޑަ ހުސެން)، ނަސީރު އިސްމާއިލް، މުހައްމަދު އާމިރު، ހުސެއިން ރިޔާޒް، ހަސަން ސާއިދު ހިމެނެ އެވެ. އަދި ސްވިމިންގެ ހަސަން މުބާހު، އައިމިނަތު ރޫޔާ ހުސެއިން، އަދި އައިމިނަތު ސަަޖަން ވެސް ދެ އޮލިމްޕިކްސްްގައި ވާދަކުރި އެވެ. އަދި މި ފަހަރުގެ އޮލިމްޕިކްސް އިން ފުރުސަތު ހޯދައި ނަބާ ވެސް މި ވާދަކުރަނީ ދެ ވަނަ އޮލިމްޕިކްސްގަ އެެވެ.
