ޑަބްލިން، އަޔަލެންޑް (މެއި 23) - މި ސީޒަނުގައި ފުރަތަމަ ފަހަރަށް ބަޔާ ލެވަކޫސަން ބަލިވި މެޗު، ޔޫރޮޕާ ލީގުގެ ފައިނަލާ ދިމާވުމަކީ ވަރަށް ހިތްދަތިކޮށް ކުރިމަތިވެފައިވާ ކަމެއް ކަމަށް ލެވަކޫސަންގެ ކޯޗު ޒަބީ އަލޮންސޯ ބުނެފި އެވެ.
މެޗަކުން ބަލިނުވެ، ޖަރުމަނު ލީގުގެ ޗެމްޕިއަންކަން ހޯދި ލެވަކޫސަން، މި ސީޒަނުގައި ރޭގެ މެޗާ ހަމައަށް ކުޅުނު 51 މެޗުން ވެސް ބަލިވެފައިނުވެ އެވެ.
އެކަމަކު، ރޭ ޔޫރޮޕާ ލީގުގެ ފައިނަލުގައި އެޓަލަންޓާ އަތުން 3-0 އިން ބަލިވެ، ލެވަކޫސަން އަށް މުބާރާތުގެ ތަށި ގެއްލުނުއިރު، އެ ޓީމުގެ ރެކޯޑަށް ވެސް ވަނީ ނިމުން އަތުވެފަ އެވެ.
އަލޮންސޯ ބުނީ، ލެވަކޫސަނަށް ވުރެ ރަނގަޅަށް އެޓަލަންޓާ އިން ކުޅުނު ކަމަށާއި ތަށި ހައްގުވަނީ ވެސް އެ ޓީމަށް ކަމަށެވެ.
"މިއީ އަހަރެމެންގެ ދުވަހެއް ނޫން. ވަރަށް ދަށްކޮށް ދިޔައީ. ވަރަށް ހިތްދަތި ހަގީގަތުގައި މި ގޮތަށް މިހާ މުހިންމު މެޗެއްގައި ދިމާވީ، އާދައިގެ ކަމެއް ނޫން ސީޒަނެއްގެ 52 ވަނަ މެޗުގައި ފުރަތަމަ ފަހަަރަށް ބަލިވުން. އޭގެއިން އެބަ އެނގޭ ބަލިނުވެ އަހަރެމެން ވަރަށް ކާމިޔާބު މަސައްކަތެއް ކޮށްފިކަން، އެ ކަމާ ފަހުރުވެރިވޭ،" އަލޮންސޯ ބުންޏެވެ.
"އެކަމަކު، މި ބަލި މި ދިމާވި ގޮތް ވަރަށް ހިތްދަތި،"
ރޭގެ މެޗުގެ ކުރިން، ލެވަކޫސަން އެންމެ ފަހުން މެޗަކުން ބަލިވެފައިވަނީ، މިދިިޔަ އަހަރު މެއި މަހު 27 ވަނަ ދުވަހު އެވެ.
ލެވަކޫސަން އަށް އަދި މި ސީޒަނުގައި އެއް ފައިނަލް އެބައޮތެެވެ. އެއީ މި ހޮނިހިރު ދުވަހު، ކައިސަސްލައުޓެންއާ ދެކޮޅަށް ކުޅޭ މެޗެވެ.
