ރާއްޖޭގެ އިސްލާމީ އިންޝުއަރަންސްގެ މޭސްތިރި ކަމަށްވާ އަމާނާ ތަކަފުލް މޯލްޑިވްސްގެ 13 ވަނަ އަހަރީ އާއްމު ޖަލްސާ އިއްޔެ ބާއްވައިފި އެވެ.
އަމާނާ ތަކަފުލްއަށް މިދިޔަ އަހަރު ތަކަފުލް ކޮންޓްރިބިއުޝަންގެ (ތަކަފުލް ހަރަކާތްތަކުން ލިބުނު އާމްދަނީ) 19 ޕަސަންޓު އިތުރުވެފައި ވާއިރު، ލިބުނު ޖުމްލަ އާމްދަނީ 203 ޕަސަންޓު އިތުރުވި އެވެ. އެއީ 67 މިލިއަން ރުފިޔާގެ ފައިދާ އެވެ.
މިދިޔަ އަހަރު އިންވެސްޓްމަންޓް ތަކުން ލިބުނު ފާހަގަކޮށްލެވޭ ކާމިޔާބީގެ ސަބަބުން ޓެކްސް ކެނޑުމުގެ ކުރިން 20.05 މިލިއަން ރުފިޔާ ފައިދާ ގޮތުގައި އަމާނާ ތަކަފުލްއަށް ލިބުނު ކަމަށް އެ ކުންފުނިން ބުނެ އެވެ.
ފައިދާ ގޮތުގައި 6.57 މިލިޔަން ރުފިޔާ ކަނޑައަޅާފައިވާއިރު، މިއީ ފައިނަލް ޑިވިޑެންޑްގެ ގޮތުގައި ހިއްސާއަކަށް މޫނުމަތީ އަގުގެ 15 ޕަސަންޓެވެ. ހިއްސާގެ މޫނުމަތީ އަގުގެ 25 ޕަސަންޓު ވަނީ ހިއްސާދާރުންނަށް ދޭން ނިންމާފަ އެވެ. އެކަން ފާސްކޮށްފައިވަނީ އަހަރީ އާންމު ޖަލްސާގައެވެ.
އެހެން އަހަރުތަކާ އެއްގޮތަށް އަހަރީ އާންމު ޖަލްސާ ނިންމާލުމުގެ ކުރިން ހިއްސާދާރުންނަށް އެއް އަހަރުގެ ޕާސަނަލް އެކްސިޑެންޓު ކަވަރޭޖު ހިލޭ ދިނުމަށް ބޯޑުން ވަނީ ނިންމައި އިއުލާންކޮށްފަ އެވެ.
އަހަރީ އާންމު ޖަލްސާގައި ވަނީ އިންޑިޕެންޑެންޓު ބޯޑު މެންބަރެއްގެ ގޮތުގައި ޑރ. އައިޝަތު މުނީޒާ ހަމަޖެއްސި އެވެ. އަދި ސިރާޖު ނިޒާމު ވެސް ބޯޑަށް އައްޔަން ކުރި އެވެ.
"ކުންފުނިން ދެމެހެއްޓެނިވި ގޮތަކަށް ފަންޑް މެނޭޖުކުރުމާއި، ތަކާފުލްގެ އުސޫލުތައް ދެމެހެއްޓުމަށް ދޭ އަހައްމިއްޔަތު އިތުރަށް ހާމަވެގެން ދަނީ. މެދުކެނޑުމެއްނެތި 13 އަހަރު ކުންފުނީގެ ތަކަފުލް ސްކީމްތަކުގައި ބައިވެރިވެފައިވާ ފަރާތްތަކުގެ ތެރެއިން ބަދަލު ހޯދުމަށް ހުށައަޅާފައި ނުވާ ފަރާތްތަކަށް ސާޕްލަސް ބަހާފައި ވާތީ،" އަމާނާ ތަކާފުލްއިން ބުންޏެވެ.
މިހާތަނަށް އަމާނާ ތަކަފުލްއިން ފައިދާގެ ގޮތުގައި ބެހި އަދަދު ވަނީ 12.4 މިލިއަން ރުފިޔާއަށް އަރައިފަ އެވެ. މީގެއިތުރުން މިއަދާ ހަމައަށް ޖުމްލަ ހިއްސާގެ ފައިދާގެ ގޮތުގައި 42.1 މިލިއަން ރުފިޔާ ވަނީ ބހައިފަ އެވެ.
އަމާނާ ތަކަފުލްގެ އެމްޑީ ހަރީޒް ސުލައިމާން ވިދާޅުވީ ޖުމްލަކޮށް ކުންފުނި ހިންގުން ހަރުދަނާކަންމަތީ ދެމެހެއްޓުމަށްޓަކައި ކަޑައެޅިފައިވާ އުސޫލުތައް މަތީ ސާބިތުވެ ތިބެ، ޓީމުން ކެނޑިނޭޅި އައު ހިދުމަތްތައް ތައާރަފުކޮށް ފުޅާ ދާއިރާއެއްގައި އެކަންކަން ތަންފީޒުކުރެވި، ވިޔަފާރީގެ ހުރިހާ ރޮނގަކުންވެސް ކުރިއެރުންތައް ހޯދަމުންދާ ކަމަށެވެ.
އަމާނާ ތަކަފުލްއިން ވަނީ މިދިޔަ އަހަރުގެ ޖެނުއަރީ މަހުން ފެށިގެން އަމަލުކުރަން ފެށި އިންޓަނޭޝަނަލް ފައިނޭންޝަލް ރިޕޯޓިން ސްޓޭންޑާޑު 17 އާ އެއްގޮތްވާ ގޮތުގެ މަތިން ކުންފުނީގެ މާލީ ހިސާބުތައް ރިޕޯޓުކޮށްފަ އެވެ.
އާ މިންގަނޑު ގެނައުމުން މާލީ ބަޔާންތަކުގައި ވާ މައުލޫމާތު ފެންވަރު ރަނގަޅުވެ، ކިޔުންތެރިންނަށް ތަކަފުލްގެ ވިޔަފާރި ހަރަކާތްތަކާއި ކުންފުނި ހިނގަމުންދާގޮތް ރަނގަޅަށް ދެނެގަނެވޭނެ ކަމަށް ބުނެ އެވެ.
އަމާނާ ތަކަފުލް ވެގެން ގޮސްފައިވަނީ މި މިންގަނޑަށް އަމަލުކުރަން ފެށި ދެކުނުއޭޝިޔާގެ ފުރަތަމަ ކުންފުންޏަށެވެ.
އަމާނާ ތަކާފުލްގެ ޗެއާމަން ތައްޔިބު އަކްބަރު އަލީ ވަނީ ކުންފުނީގެ މުސްތަޤްބަލާމެދު ޔަގީންކަން އެބައޮތް ކަމަށް އަހަރީ ރިޕޯޓުގައި ހާމަކުރައްވައިފަ އެވެ.
ޗެއާމަންގެ ބަޔާނުގައި ވިދާޅުވީ ރާއްޖޭގެ މިސްރާބު ހުރީ ދެމެހެއްޓެނިވި ގޮތެއްގައި ކުރިއަރާ، ގޮންޖެހުންތަކާ ކުރިމަތިލެވޭ އަދި އިގްތިސާދަށް ކަފިވެގެންދާނެ ކުރިއެރުން ގެނެސްދެވޭނެ ފަދަ އައު ދާއިރާތަކުން ބޭރުގެ އިންވެސްޓްމަންޓްތައް ގެނައުމަށް ފައްކާވެފައިވާ ކަމަށެވެ.
