މޯލްޑިވްސް އެކްސްޕޯ 2026 ގެ އޮފިޝަލް އިންޝުއަރެންސް ޕާޓްނަރަކަށް ދިވެހި އިންޝުއަރެންސް ހަމަޖައްސައިފި އެވެ.
މި އެއްބަސްވުމާއެކު، ރާއްޖޭގެ ވިޔަފާރިތަކާއި، އައު އީޖާދުތަކުގެ އިތުރުން އިގްތިސާދީ ކުރިއެރުމަށް މަގުފަހިކޮށްދޭ ގައުމީ ފެންވަރުގެ ހަރަކާތްތަކަށް އެއްބާރުލުން ދިނުމުގައި އެ ކުންފުނިން ދެމިއޮންނާނެކަން ވަނީ ހާމަކޮށްފަ އެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުން އިންތިޒާމުކޮށް، ބިޒްނަސް ސެންޓަރ ކޯޕަރޭޝަން (ބީސީސީ) އިން ކުރިއަށްގެންދާ މޯލްޑިވްސް އެކްސްޕޯ 2026 ބޭއްވުމަށް ހަމަޖެހިފައިވަނީ އޮކްޓޫބަރު 25 އިން ނޮވެމްބަރު 2 ގެ ނިޔަލަށް ހުޅުމާލެ ސެންޓްރަލް ޕާކުގައެވެ.
"ފިއުޗަރ މޯލްޑިވްސް: އިނޮވޭޝަން، ކްރިއޭޓިވިޓީ އެންޑް ގްލޯބަލް ކަނެކްޝަންސް" މި ޝިއާރުގެ ދަށުން ނުވަ ދުވަހުގެ މުއްދަތަށް ކުރިއަށްގެންދާ މި މައުރަޒަކީ، ރާއްޖޭގެ ހުނަރުވެރިންނާއި، އުފެއްދުންތަކާއި، ޚިދުމަތްތައް ދައްކާލުމަށް ވިޔަފާރިވެރިންނާއި، އުފެއްދުންތެރި ސިނާއަތްތަކުގެ އިތުރުން އާންމު މުޖުތަމައު އެއްތަނަކުން ބައްދަލުވާނެ މުހިންމު މަންސައެކެވެ.
ސައްތަ އިންސައްތަ ދިވެހި ހިއްސާ އޮންނަ އަދި ދިވެހިން ހިންގާ ކުންފުންޏެއްގެ ގޮތުގައި، ދިވެހި އިންޝުއަރެންސުން އަބަދުވެސް އިސްކަންދެނީ ރާއްޖޭގެ ވިޔަފާރިތަކުގެ އަގުވަޒަންކޮށް، ވިޔަފާރިވެރިކަން ކުރިއަރުވައި، ވިޔަފާރިތައް ފުޅާކުރުމަށް ފުރުސަތުތައް ފަހިކޮށްދޭ މިފަދަ ހަރަކާތްތަކަށް އެއްބާރުލުން ދިނުމަށެވެ.
ގައުމީ ފެންވަރުގެ މައުރަޒުތަކާއި ސިނާއީ އެކި ހަރަކާތްތަކުގައި ބައިވެރިވުމުގެ މައިގަނޑު މަގްސަދަކީ، ރާއްޖޭގެ އިގްތިސާދު ކުރިއެރުވުމަށް އެހީތެރިވުމުގެ އިތުރުން، އިންޝުއަރެންސާ މެދު އާންމުން ހޭލުންތެރިކުރުވުން ކަމަށް އެ ކުންފުނިން ބުނެއެވެ.މި އެކްސްޕޯ ކުރިއަށްދާއިރު، އެކްސްޕޯގެ "ޓޫރިޒަމް އެންޑް ވިޒިޓަރ އިކޮނޮމީ ޑިސްޓްރިކްޓް" ގައި ހުންނަ ދިވެހި އިންޝުއަރެންސްގެ ޓީމާ ބައްދަލުކުރުމުގެ ފުރުސަތު ޒިޔާރަތްކުރާ ފަރާތްތަކަށް ލިބޭނެ އެވެ.
އެތަނުން ކުންފުނީގެ އިންޝުއަރެންސް ހިދުމަތްތަކާ ބެހޭ މައުލޫމާތު ހޯދުމުގެ އިތުރުން، ކުންފުނިން ފުޅާކުރަމުން އަންނަ ޑިޖިޓަލް ހިދުމަތްތައް ތަޖުރިބާކޮށްލުމުގެ ފުރުސަތު ވެސް ލިބިގެންދާނެއެވެ.މި ޕާޓްނަރޝިޕްގެ ސަބަބުން، ރާއްޖޭގެ ވިޔަފާރިތަކަށް ރައްކާތެރިކަން ހޯދައިދިނުމަށާއި، މުޖުތަމައު ބާރުވެރިކުރުވުމަށާއި، ރާއްޖޭގެ މުސްތަގުބަލު ބިނާކުރުމަށް ދިވެހި އިންޝުއަރެންސުން ކުރަމުންދާ މަސައްކަތްތައް އިތުރަށް ވަރުގަދަވެގެންދާނެއެވެ.
