އެމެރިކާގެ ބާޒާރަށް އެޕަލްގެ އެންމެ ފުރަތަމަ ފަތްޖަހާލެވޭ ފޯނު ވިއްކަން ފެށުމާ އެއް ވަގުތެއްގައި، އެޕަލް ޑުއޯ ރާއްޖޭގެ ބާޒާރަށް މިއަދު ރަސްމީކޮށް ތައާރަފުކޮށްފި އެވެ.
މިއީ ދުނިޔޭގެ އެންމެ ކުރިއަރާފައިވާ ޓެކްނޮލޮޖީގެ އުފެއްދުމެއް އެމެރިކާގެ ބާޒާރާ އެއް ދުވަހެއްގައި ރާއްޖޭގެ ކަސްޓަމަރުންނަށް ލިބެން ފެށި ފުރަތަމަ ފަހަރެވެ.
ރާއްޖޭގެ އިލެކްޓްރޯނިކްސް ބާޒާރަށް އައި މި ތާރީހީ ބަދަލާ އެކު، އެޕަލް ޑުއޯގެ ވިޔަފާރި މިއަދު ރަސްމީކޮށް ފަށާފައިވަނީ ރާއްޖޭގައި އެޕަލްގެ އުފެއްދުންތައް ފުޅާދާއިރާއެއްގައި ވިއްކަމުންދާ އެލް ސްޓޫޑިއޯއިންނެވެ.
މީގެ ކުރިން ބައިނަލްއަގުވާމީ ބާޒާރަށް ނެރޭ އައު އުފެއްދުންތައް ރާއްޖެއަށް ލިބުމުގައި ދިގު އިންތިޒާރެއް ކުރަން ޖެހުނު ނަމަވެސް، މިއަދުގެ މި ފެށުމާ އެކު ދިވެހި ކަސްޓަމަރުންނަށް ދުނިޔޭގެ އެހެން ބޮޑެތި ގައުމުތަކާ އެއްވަގުތެއްގައި އެންމެ ފަހުގެ ޓެކްނޮލޮޖީ ތަޖުރިބާކުރުމުގެ ފުރުސަތު ވަނީ ހުޅުވިފަ އެވެ.
އެލް ސްޓޫޑިއޯއަކީ ރާއްޖޭގައި ހުޅުވި ފުރަތަމަ އެޕަލް މޯނޯ ސްޓޯރެވެ. މީގެ އިތުރުން އެ ކުންފުންޏަކީ އެޕަލްގެ ރަސްމީ އޮތޮރައިޒްޑް ރީސެލާ އެކެވެ.
މިކަމުގެ ސަބަބުން ކަސްޓަމަރުންނަށް އުފެއްދުންތައް ގަތުމުގައި އެޕަލްގެ ފުރިހަމަ ވޮރެންޓީއާއި، އުފެއްދުންތަކާ ގުޅޭ ރަސްމީ އެހީތެރިކަމާއި، ސެޓިފައިޑް ކަސްޓަމަރު ކެއާގެ ހިދުމަތްތައް ސީދާ ގޮތެއްގައި ލިބިގެންދާނެ އެވެ.
އެލް ސްޓޫޑިއޯއިން ބުނި ގޮތުގައި އެތަނުން ފުރަތަމަ ވިއްކީ ޕްރީ އޯޑާ ދީފައިވާ ފަރާތްތަކުގެ ފޯނުތައް ކަމަށެވެ.
"ރަނގަޅު ޑިމާންޑެއް ލިބެމުން އެބަދޭ. ޑިމާންޑު ބޮޑުވުމުން އިތުރު ޝިޕްމެންޓަކަށް ވެސް އޯޑަރު ޖަހައިފިން،" އެލް ސްޓޫޑިއޯގެ މެނޭޖަރު ބުންޏެވެ.
އޭނާ ބުނި ގޮތުގައި ދުނިޔޭގެ އެހެން ގައުމުތަކާ އެއް ދުވަހެއްގައި ދިވެހި ކަސްޓަމަރުންނަށް އައިފޯން ޑުއޯ ރާއްޖޭން ލިބޭނެ ގޮތް ހަދައި ދެވުމަކީ ލިބުނު ވަރަށް ބޮޑު އުފަލެކެވެ.
