އިރާނުގެ ރައީސް އިބްރާހިމް ރައިސީގެ ޖަނާޒާގެ ކަންކަން ފަށައިފި އެވެ.
ރައިސީ އަވަހާރަވީ އިރުމަތި އަޒަރުބައިޖާނުގައި ބޭއްވި ރަސްމިއްޔާތަކަށްފަހު އެނބުރި ގައުމަށް ވަޑައިގެންނެވި ހެލިކޮޕްޓަރު ވެއްޓުނު ހާދިސާގަ އެވެ.
ހެލިކޮޕްޓަރު ވެއްޓުނު ހާދިސާގައި ރައިސީގެ އިތުރުން އިރާނުގެ ފޮރިން މިނިސްޓަރު ހުސެއިން އާމިރު އަބްދުﷲ ހައިން އަދި އިރުމަތީ އަޒަރުބައިޖާނުގެ ގަވަރުނަރު ވެސް ވަނީ ނިޔާވެފަ އެވެ.
ރައިސީގެ ޖަނާޒާގައި ބައިވެރިވެވަޑައިގަތުމަށް އިރާނުގެ ގިނަ ރައްޔިތުން ވަނީ ކަޅު ހެދުމުގައި މަގުތައް މައްޗަށް ނިކުމެފަ އެވެ. އަދި ރައިސީ އާއި ހުސެއިން އާމިރު އަބްދުﷲގެ ސަންދޯއް ވަނީ ގައުމުގެ އެކި ހިސާބުތަކަށް ގެންގޮސްފަ އެވެ.
ރައިސީގެ ޖަނާޒާ ކުރިއަށް ގެންދަނީ -- ފޮޓޯ: ވެސްޓް އޭޝިއާ ނިއުސް އެޖެންސީ
ރައިސީގެ ޖަނާޒާގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒުގެ ހާއްސަ މަންދޫބެއްގެ ގޮތުގައި ލޯކަލް ގަވަމެންޓު މިނިސްޓަަރު އާދަމް ޝަރީފް ވަނީ ރޭ އިރާނަށް ފުރާވަޑައިގެންފަ އެވެ.
ރައިސީ އަވަހާރަވުމާ ގުޅިގެން ހިތާމަފާޅު ކުރުމުގެ ގޮތުން އިއްޔެއިން ފެށިގެން ތިން ދުވަހަށް ދިވެހި ދިދަ ބައިދަނޑިއަށް ވަނީ ތިރިކޮށްފަ އެވެ.
އިރާންގެ އަށް ވަނަ ރައީސް, ރައިސީ ވެރިކަމާ ހަވާލުވެވަޑައިގެންނެވީ އޯގަސްޓް، 2021، ގަ އެވެ. އެމަނިކުފާނު ވަނީ އިރާނުގެ ޕްރޮސެކިއުޓާ ޖެނެރަލްގެ މަގާމު 2014 އިން 2016 ގެ ނިޔަލަށް ފުރުއްވާފަ އެވެ.
