މައިނާ ހަންޏާސް ކަޕް 2024 ގައި ރޯޔަލް ނައިޓުން ކުޅުނު ފުރަތަމަ މެޗު ކާމިޔާބުކޮށް ފެށުން ރަނގަޅުކުރިއިރު, ލަކުޑިން ދެ ވަނަ މެޗު ވެސް ކާމިޔާބު ކޮށްފި އެވެ.
ރޯޔަލް ނައިޓުން މި މުބާރާތުގައި ކުޅުނު ފުރަތަމަ މެޗުގައި ރައިވަލްސް ޔުނައިޓެޑުގެ މައްޗަށް ކުރިހޯދީ 7-1 ގެ ނަތީޖާ އަކުންނެވެ.
މި މެޗުގެ ފުރަތަމަ ހާފުގައި ރައިވަލް ޔުނައިޓެޑުން ވަނީ ރަނގަޅަށް ޑިފެންސްކޮށް ރޯޔަލް ނައިޓުގެ އެޓޭކުތައް ހުއްޓުވާފަ އެވެ. އެކަމަކު ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ރޯޔަލް ނައިޓްގެ އަބްދުالله ފިޒާން ވަނީ ގޯލު ޖަހާ އެ ޓީމަށް ލީޑު ނަގާދީފަ އެވެ. އަދި ދެވަނަ ހާފު ފަށައިގެން ހަތަރުވަނަ މިނެޓުގައި ފިޒާން ވަނީ އިތުުރު ގޯލެއް ޖަހާ އެ ޓީމުގެ ލީޑު ފުޅާކޮށްދީފަ އެވެ. މި މެޗުގައި ރޯޔަލް ނައިޓްގެ އަލީ އަލްސަން (އައްލެ) އާއި, މުހައްމަދު މިދުހަތް ވެސް ވަނީ ދެ ގޯލު ޖަހާފަ އެވެ. އަދި މުހައްމަދު އިމްރާން ވަނީ ގޯލެއް ޖަހާފަ އެވެ.
ރޯޔަލް ނައިޓް އާއި ރައިވަލް ޔުނައިޓެޑް ބައްދަލުކުރި މެޗުގެ ތެރެއިން - ފޮޓޯ: އަތޫފް އާތިފް / އަދަދު
މިރޭ ކުޅުނު ދެވަނަ މެޗު މަގުކޮޅު ސްޕޯޓްސް ކުލަބްގެ މައްޗަށް ލަކުޑިން ކުރިހޯދީ 3-1 ގެ ނަތީޖާ އަކުންނެވެ.
މި މެޗުގެ 14 ވަނަ މިނެޓުގައި ލަކުޑި އަށް ލީޑު ނަގައިދިނީ ޝުއައިދު ސައީދު ޖަހާދިން ގޯލުންނެވެ. އެކަމަކު، ދެ ވަނަ ހާފުގައި މަގުކޮޅުގެ އަހުނަފް ޒާހިރު ވަނީ ގޯލު ޖަހާ ނަތީޖާ ހަމަހަމަ ކޮށްފަ އެވެ.
މެޗު ނިމެން މިނެޓަކަށް ވެފައި ވަނިކޮށް، ލަކުޑި އަށް އަލުން ލީޑު ނަގާދިނީ އާދަމް ފަހުމާން ޖެހި ގޯލުންނެވެ. މި މެޗުގައި ލަކުޑިން ޖެހި ފަހު ގޯލު އެ ޓީމަށް ޖަހާދިނީ އަބްދުالله މިދުހަތު ފަހުމީ (ބިޗަޑް) އެވެ.
މި މުބާރާތުގައި މިރޭ ވެސް މެޗެއް ކުޅޭނެ އެވެ. މިރޭގެ މެޗުގައި ކުޅޭނީ އެފްސީ ގޯޅި އާއި މަގުކޮޅު ސްޕޯޓްސް ކުލަބް އެވެ.
