ބޭންކް އޮފް މޯލްޑިވްސް (ބީއެމްއެލް) އާ މިދިޔަ އަހަރު 23،000 އާ ކަސްޓަމަރުން ގުޅި، ކުރާ ޝަކުވާތައް 20 ޕަސަންޓު ދަށް ކުރެވިފައިވާ ކަމަށް އެ ބޭންކުން ބުނެފި އެވެ.
ބީއެމްއެލްއިން ބުނީ މިދިޔަ އަހަރު އެ ބޭންކާ 23،000 އައު ކަސްޓަމަރުން ގުޅި، 66،000 އަށްވުރެ ގިނަ އައު އެކައުންޓު ހުޅުވާފައިވާ ކަމަށެވެ.
އޭގެ އިތުރުން މިދިޔަ އަހަރު އެ ބޭންކަށް ގިނަ ކުރިއެރުންތަކާއި ކާމިޔާބީތައް ލިބުނު ކަމަށާއި، މިގޮތުން ޓެކްސްއަށް ކެނޑުމަށްފަހު ސާފު ފައިދާ ގޮތުގައި 2.07 ބިލިއަން ރުފިޔާ ފައިދާގެ ގޮތުގައި ލިބުނު ކަމަށް ބީއެމްއެލްއިން ބުންޏެވެ.
ކަސްޓަމަރުންގެ އިތުބާރާއި ބޭންކިން ހިދުމަތް ހޯދުމަށް އިހުތިޔާރުކުރާ ބޭންކަކީ ބީއެމްއެލް ކަމުގައި ގިނަ ކަސްޓަމަރުން ނިންމާ ނިންމަކީ ލިބުނު ވަރަށް ބޮޑު ކުރިއެރުމެއް ކަމަށް އެ ބޭންކުން ބުންޏެވެ. ހަމައެހެންމެ ކަސްޓަމަރުންނަށް ދެމުންދާ ހިދުމަތުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ކުރަމުން އަންނަ ކަމަށް ވެސް ބީއެމްއެލްއިން ބުންޏެވެ.
ބީއެމްއެލްގެ ޑައިރެކްޓާ އޮފް ކަސްޓަމާ ސާވިސް ގުލްނާޒް މާހިރު ވިދާޅުވީ ފުރިހަމަ އަދި ރައްކާތެރި ބޭންކިން ހިދުމަތެއް ކަސްޓަމަރުންނަށް ފޯރުކޮށްދިނުމަކީ އެ ބޭންކުން އެކަމަކަށް އެންމެ ހާއްސަ ސަމާލުކަމެއްދޭ އެއްކަން ކަމަށެވެ.
ބީއެމްއެލްގެ މުވައްޒަފުންތަކެއް ހަރަކާތްތެރިވަނީ -- ފޮޓޯ: ބީއެމްއެލް
މިގޮތުން ބީއެމްއެލްއިން އަބަދުވެސް މަސައްކަތް ކުރަނީ ކަސްޓަމަރުންގެ ހިތްހަމަޖެހޭ އަދި އުފަލާއެކު ބަލައިގަންނަ ހިދުމަތެއް ފޯރުކޮށްދިނުންކަން ފާހަގަކުރައްވާ ގުލްނާޒް ވިދޅާުވީ ކުރެވެނު މަސައްކަތުން މިދިޔަ އަހަރު ވަނީ ކަސްޓަމަރުންގެ ޝަކުވާ 20 ޕަސަންޓު ދަށްކުރެވިފައި ކަމަށެވެ.
ބީއެމްއެލް އިން މިދިޔަ އަހަރުގެ މެއި މަހު ވަނީ ޑިޖިޓަލް ބޭންކިން އެސިސްޓަންޓް އާޔާ ތައާރަފްކޮށްފަ އެވެ.
އާޔާއަކީ ކަސްޓަމަރުންނަށް ފޯރުކޮށްދޭ ހިދުމަތް އިތުރަށް ފުރިހަމަ ކުރުމަށް ބޭންކުގެ ވެބްސައިޓް، ފޭސްބުކް މެސެންޖާ، ވައިބާ އަދި ވަޓްސްއެޕް މެދުވެރިކޮށް 24 ގަޑިއިރު ހިދުމަތް ލިބޭ އިންޓަލިޖެންޓް ޗެޓްބޮޓެކެވެ.
"އާޔާ ފަރުމާކޮށްފައިވަނީ ކަސްޓަމަރުންނަށް ފަސޭހަވާނެހެން ދިވެހި ބަހުންނާއި އިނގިރޭސި ބަހުން މުއާމަލާތް ކުރެވޭ ގޮތަށް. ކަސްޓަމަރުންގެ ސުވާލުތަކަށް ޖަވާބުދީ އަދި ބޭނުންވެއްޖެ ހާލަތެއްގައި ކަސްޓަމާ ސާވިސް އޭޖަންޓަކާ އާޔާ ގުޅުވާލަދޭނެ،" ގުލްނާޒް ވިދާޅުވި އެވެ.
ބީއެމްއެލްގެ ޑައިރެކްޓާ އޮފް ކަސްޓަމާ ސާވިސް ގުލްނާޒް މާހިރު -- ފޮޓޯ؛ ބީއެމްއެލް
މިދިޔަ އަހަރު ކަސްޓަމަރުން ފެށި 47،000 ޗެޓްގެ ތެރެއިން 53 ޕަސަންޓު ޗެޓަށް ޖަވާބު ދިނީ އާޔާ މެދުވެރިކޮށް ކަމަށާއި، އޭގެން ދައްކުވައިދެނީ ކަސްޓަމަރުން ބޭންކަށް ގުޅަން ނުޖެހި، ބޭނުންވާ ގިނަ މައުލޫމާތުތަކެއް އާޔާ މެދުވެރިކޮށް ހޯދޭނެކަން ކަމަށް ގުލްނާޒް ވިދާޅުވި އެވެ.
ގުލްނާޒް އިތުރަށް ވިދާޅުވީ ކަސްޓަމަރުން ހުށަހަޅާ މައްސަލަތައް ހައްލުކޮށްދިނުމުގައި މިދިޔަ އަހަރު 24 ޕަަސަންޓުގެ ކުރިއެރުމެއް ލިބުނު ކަމަށެވެ. އޭނާ މިކަން ސިފަކުރެއްވީ ކަސްޓަމަރުން ބޭނުންވާ ފަދަ ހިދުމަތެއް ދިނުމަށް ބޭންކުން ދޭ އަހައްމިއްޔަތުކަން އަންގައިދޭ ކަމެއްގެ ގޮތުގަ އެވެ.
"މި ކާމިޔާބީއަކީ ބޭންކުން އިސްނަގައިގެން ކުރި އެތައް މަސައްކަތެއްގެ ސީދާ ނަތީޖާ. މީގެ ތެރޭގައި، ކޭސް މެނޭޖްމަންޓް ސިސްޓަމް ތަންފީޒުކުރުމާއި މުވައްޒަފުންނަށް ދެވުނު ތަމްރީނާއި މިދިޔަ އަހަރު ތެރޭ ބޭންކުގެ ގިނަ ޕްރޮސެސްތަކެއް ބަދަލުކޮށް އިތުރަށް ރަނގަޅުކުރުމަށް ކުރެވުނު ބުރަ މަސައްކަތް،" ގުލްނާޒް ވިދާޅުވި އެވެ.
ރާއްޖޭގެ އެންމެ ބޮޑު ބޭންކިން ވިއުގަ އާއި ޒަމާނީ ބޭންކިން ހިދުމަތާއެކު ބީއެމްއެލްގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކަށް އެހީތެރިކަން ފޯރުކޮށްދިނުން ކަމަށް އެ ބޭންކުން ބުންޏެވެ.
