މައިނާ ހަންޏާސް ކަޕް 2024 ގެ ފުރަތަމަ މެޗުގައި އެފްސީ ގޯޅި ބަލިކޮށް އެންމެ ފަހުގެ ޗެމްޕިއަން ލަކުޑި މޮޅަކުން މުބާރާތް ފަށައިފި އެވެ.
މިދިޔަ އަހަރުގެ މުބާރާތް ލަކުޑިން ކާމިޔާބުކުރީ ނިން އެފްސީ ބަލިކޮށެވެ. ރޭ ކުޅުނު ފުރަތަމަ މެޗުގައި ގޯޅީގެ މައްޗަށް ލަކުޑިން ކުރިހޯދީ 4-2 ގެ ނަތީޖާ އަކުންނެވެ.
މި މެޗު ފަށައިގެން ލަކުޑިން ވަނީ ގޯޅީގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދާފަ އެވެ. ފުރަތަމަ ހާފު ނިމުމުގެ ކުރިން ލަކުޑި އަށް ލީޑު ނަގާދިނީ އަބްދުالله މިދުހަތު ފަހުމީ (ބިޗަޑް) އެވެ.
ދެ ވަނަ ހާފުގެ ވަރަށް ކުރީކޮޅު ލަކުޑިން ވަނީ ލީޑު ފުޅާކޮށްފަ އެވެ. އެ ޓީމުން ލީޑު ފުޅާކުރީ އާދަމް ފަހުމާން ޖެހި ގޯލުންނެވެ. އެކަމަކު، މެޗު ނިމެން ފަސް މިނެޓަށް ވެފައި ވަނިކޮށް ގޯޅީގެ މުހައްމަދު ހުޝާމް ވަނީ ގޯލު ޖަހާ ފަރަގު ކުޑަކޮށްފަ އެވެ.
ކައިރިކައިރީގައި ލަކުޑީގެ ސުއައިދު ސައީދު އާއި ބިޗަޑް ކާމިޔާބުކުރި ގޯލު ތަކުން އަލުން އެ ޓީމުން ވަނީ ލީޑު ނަގައިފަ އެވެ. އެކަމަކު، މެޗު ނިމުމުގެ ކުރިން ގޯޅީގެ އަލީ އަޒުމީ ގޯލު ޖަހާ ފަރަގު ކުޑަކުރި އެވެ.
މި މުބާރާތުގައި މިރޭ ދެ މެޗު ކުޅޭނެ އެވެ. ފުރަތަމަ މެޗުގައި ވާދަކުރާނީ އާރްކޭ އާއި ރައިވަލް ޔުނައިޓެޑް އެވެ. ދެވަނަ މެޗުގައި މަގުކޮޅު ސްޕޯޓްސް ކުލަބް ނުކުންނާނީ ލަކުޑި އާއި ދެކޮޅަށެވެ.
މި މުބާރާތުގެ މީޑިއާ ޕާޓްނަރަކީ އަދަދު ސްޕޯޓްސް އެވެ. މި މުބާރާތުގެ ހުރިހާ މެޗެއް އަދަދު ސްޕޯޓްސް ފޭސްބުކް ޕޭޖުން ލައިވްކުރާނެ އެވެ.
