އިސްތަންބޫލް، ތުރުކީ (މެއި 19) - ތުރުކީގެ ކްލަބް ބެސިކްޓާސް އިން ތަޖުރިބާކާރު ކޯޗު ހޯސޭ މޮރީނިއޯ، އެ ޓީމުގެ ކޯޗަކަށް ހަމަޖައްސަން މަޝްވަރާތައް ފަށައިފި އެވެ.
މިދިޔަ ޖެނުއަރީ މަސް ތެރޭ އިޓަލީގެ ރޯމާގެ ކޯޗުކަމުން ވަކިކުރި މޮރީނިއޯ އަދި ޓީމަކާ ހަވާލުވެފައިނުވެ އެވެ.
މޮރީނިއޯ ދެ ފަހަރެއްގެ މަތިން ކުރިން ކޯޗުކޮށްދިން ޗެލްސީގެ ސަޕޯޓަރުން އޭނާ އަލުން އެ ޓީމަށް ގެންނަން ޝުއޫރުފާޅުކުރާއިރު، މޮރީނިއޯ ކުރިން ފެނުނު މެންޗެސްޓާ ޔުނައިޓެޑުން ވެސް އޭނާ އަށް އަލުން އޮފާކޮށްފާނެ ކަމުގެ އަޑުވަނީ ގަދަވެފަ އެވެ.
އެކަމަކު، މިދިޔަ ހަފްތާގައި ތުރުކީގެ ބެސިކްޓާސް އިން މޮރީނިއޯ އަށް ވަޒީފާ ހުށަހަޅާފައިވާ ކަމަށް މީޑިއާގައި އަޑުފެތުރުނެވެ.
ބެސިކްޓާސްގެ ނައިބު ރައީސް، ހުސެއިން ޔުޝެލް ވިދާޅުވީ، މިދިޔަ މަސް ތެރޭގައި މޮރީނިއޯ އަށް އެ ކްލަބްގެ ކޯޗަކަށް ވުމުގެ ޕްރޮޕޯސަލް ހުށަހެޅުމާ އެކު، މޮރީނިއޯ އެ އޮފާ އަށް މަރުހަބާ ކިޔާފައިވާ ކަމަށެވެ.
"ދެން މީގެ ފައިސާގެ ކަންކަމާ އެހެނިހެން ކަންކަން ޖެހޭ ވަރަށް ތަފްސީލީ ގޮތަކަށް މަޝްވަރާކުރަން، އެކަމަށްޓަކައި، އަހަރެމެން ވަރަށް އަވަހަށް މޮރީނިއޯއާ ބައްދަލުކުރަން، އިޓަލީ އަށް ދާނަން،" ޔުޝެލް ވިދާޅުވި އެވެ.
ބެސިކްޓާސްގެ ވިސްނުމަކީ، މޮރީނިއޯ އެ ޓީމުގެ ކޯޗަކަށް އަންނަން އެއްބަސްވެއްޖެނަމަ، އޭނާގެ ކޯޗިން ސްޓާފުންގެ ތެރޭގައި، ބެސިކްޓާސް އަށް ކުރިން ކުޅުނު، އަދި މޮރީނިއޯގެ އިރުޝާދުގެ ދަށުން ވެސް ކުޅެފައިވާ، ރިކާޑޯ ކުއަރެސްމާ ހިމެނުމެވެ.
