އިމާރާތްކުރުމުގެ މަސައްކަތް ކުރިއަށްދާއިރު، ރައްކާތެރިކަމުގެ ފިޔަވަޅުތައް އަޅަން ކޮންސްޓްރަކްޝަން މިނިސްޓްރީން މިއަދު އިލްތިމާސްކޮށްފި އެވެ.
އެ މިނިސްޓްރީން ނެރުނު އިއުލާނެއްގައި ބުނީ މޫސުން ގޯސްވެ ވައިގަދަވުމުގެ ސަބަބުން އިމާރާތް ކުރުމުގެ މަސައްކަތް ކުރިއަށްދާއިރު، ސައިޓުގައި ހަރުކޮށްފައިވާ ނުވަތަ ބޭނުންކުރާ ތަކެތި ވަޔާ ވިއްސައިގެން ގޮސް ހިތާމަވެރި ހާދިސާއެއް ހިނގިޔަ ނުދިނުމަށް ފިޔަވަޅު އަޅަން ޖެހޭ ކަމަށެވެ.
އެގޮތުން އެފަދަ ހާދިސާއެއް ނުހިނގާނެ ގޮތަށް އެންމެހައި ސަލާމަތީ ފިޔަވަޅު އަޅައި، ސަލާމަތީ މިންގަނޑުތައް ކަށަވަރު ކުރުމަށް އެންމެހާ ފަރާތްތަކަށް އިލްތިމާސް ކުރާ ކަމަށް އެ މިނިސްޓްރީން ބުނި އެވެ.
މިވަގުތު އިމާރާތް ކުރުމުގެ މަސައްކަތް މަޑުޖެހިފައިވާ ސައިޓުތަކުގައިވާ ތަކެތި ވައިގަދަވުމުގެ ސަބަބުން ވިއްސައިގެން ގޮސްދާނެފަދަ ހާލަތެއް ހުރިނަމަ، އެ ތަކެތި ރައްކާތެރި ގޮތުގައި ބަލަހައްޓާ، އަޅަންޖެހޭ އެންމެހާ ސަލާމަތީ ފިޔަވަޅު އަޅަން ވެސް ވަނީ އަންގާފަ އެވެ.
ވިއްސާރަވެ ވައިގަދަވެ ހުކުރު ދުވަހު ހުޅުމާލޭގައި އިމާރާތް ކުރަމުންދާ ބައެއް ތަންތަނުގައި ޖަހާފައި ހުރި ފެންސްތައް ވަޔާ ވެއްޓުނެވެ. އެކަމާ ގުޅިގެން އެއްވެސް މީހަކަށް ގެއްލުމެއް ނުލިބެ އެވެ.
ރާއްޖޭގައި ހުޅަނގު މޫސުމުގެ ބާރު ގަދަވެފައިވާއިރު، ވައި ބާރުވެ ބައެއް ގެއްލުންތައް ދަނީ ލިބެމުންނެވެ. އަދި އެމްއެންޑީއެފް، ފުލުހުންގެ އިތުރުން ޑިޒާސްޓާއިން ވަނީ މޫސުމަށް ސަމާލުވެ، ދުރާލާ ރައްކާތެރި ފިޔަވަޅު އެޅުމަށް އިލްތިމާސްކޮށްފަ އެވެ.
