އަންހެން ފަނޑިޔާރުންނާ ގުޅުވައި، ފިރިހެން ފަނޑިޔާރަކު ކޮށްފައިވާ ކޮމެންޓްތަކަކާ ގުޅޭ މައުލޫމާތުތަކެއް އަދަދު ނޫހަށް ލިބިގެން ޝާއިއުކޮށްފައިވާ ހަބަރާ ގުޅިގެން އަޅުގަނޑުގެ ހިތަށް ލައްކަ ފިކުރާ ހިޔާލު އަރާ ފައިބަމުން އެބަދެއެވެ. އަޅުގަނޑަށް މައުލޫމާތު ލިބިފައިވާ ގޮތުގައި ލީކްވެފައިވާ ސްކްރީން ޝޮޓްތަކަކީ، ދިވެހި ގިނަ ފަނޑިޔާރުންތަކެއް ހިމެނޭހެން އޮތް ވައިބަ ގުރޫޕެއްގައި، ފިރިހެން ފަނޑިޔާރަކު މަގުމަތީ ބަހުރުވައިން އަންހެން ފަނޑިޔާރުންތަކަކަށް ބުލީކުރި މެސެޖްތަކެކެވެ.
މިދެންނެވުނު ފަނޑިޔާރު އެ ގުރޫޕްގައި ލިޔާ މެސެޖްތައް މީގެ ކުރިންވެސް ލީކްވެފައި އެބަހުއްޓެވެ. އަދި މީގެ ކުރިން ދިވެހިރާއްޖޭގެ އުއްތަމަ ފަނޑިޔާރަށް އަމާޒުކޮށް ލައްކަ ހުތުރު ބަހުރުވައިން ދެއްކި ވާހަކަތަކަކާ ގުޅިގެން އެ ފަނޑިޔާރުގެ ސުލޫކީ މައްސަލައެއްވެސް ޖޭއެސްސީ އިން ބަލާފައިވެއެވެ. ފަހުން ވީ ގޮތެއް ހަބަރަށް އެނގޭވަރުވެފައި ނުވެއެވެ. އުއްތަމަ ފަނޑިޔާރަކީ ގައިމު އައުރަ ނިވާކުރައްވައިގެން އުޅުއްވާ ފިރިހެން ބޭފުޅެކެވެ.
މީގެ ކުރިން ލީކްވެފައިވާ ހަމަ އެ ފަނޑިޔާރުގެ ބައެއް މެސެޖްތަކުގެ ތެރޭގައި، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ދިވެހިރާއްޖޭގެ ހައިކޯޓުގައި ހިނގަމުންދިޔަ ޝަރީއަތާ ގުޅުވައި، ހައިކޯޓުގެ ފަނޑިޔާރުންގެ ބެންޗަށް އަމާޒުކޮށް ރުޅިވެރި ބަސްމަގުން ފަނޑިޔާރުންނަށް ކޮމެންޓްކޮށް ތަފާތު ވާހަކަތައް ހަމަ އެ ގުރޫޕްގައި ލިޔެފައިވެއެވެ. ސިޔާސީ އެކްޓިވިސްޓެއްހެން ފަނޑިޔާރެއްގެ މެސެޖްތައް އެ ގުރޫޕްގައި ލިޔަމުންދިޔައިރު، ހައިކޯޓުގެ އެ ބެންޗުގައި ވެސް އިންނެވީ އެންމެ އަންހެން ކަނބަލެކެވެ. އަދި އެކަމަނާ އިންނަވަނީ ބުރުގާ ވެސް އަޅުއްވައިގެންނެވެ.
އަންހެން ފަނޑިޔާރުން ބުލީކުރަމުންދާއިރު، ކަމާބެހޭ މުއައްސަސާތަކުން އެކަމުގައި ހަމަ އެއްވެސް ބަހެއް ނުބުނެ އޮތުމަކީ އަޅުގަނޑު އިންތިހާއަށް ހައިރާންވާކަމެކެވެ. ލީކްވެފައިވާ މެސެޖްތަކުގައި މަތީ ކޯޓުތަކުގައި ތިއްބެވި އަންހެން ފަނޑިޔާރުންނަށް ބިރުދައްކައި މަގާމުން ވަކިކުރާނެކަމުގެ އިންޒާރުގެ ބަހުރުވަތައް ހިމެނިފައިވެއެވެ. ފަނޑިޔާރުގެ ބަހުރުވަ ހުރީ ދިވެހިރާއްޖޭގައި ފަނޑިޔާރުކަން ކުރާ ހުރިހާ އަންހެނުން ތިބެނީ އޮރިޔާމުންކަމަށް ދޭހަވާ މޭރުމަކުންނެވެ. އަދި އެ ފަނޑިޔާރުގެ ބަސްމަގަށް ބަލާއިރު، ދިވެހިރާއްޖޭގެ ސުޕްރީމް ކޯޓުގެ ޝަރީއަތްތައް ވެސް ލައިވް ނުކުރެވޭނެއެވެ. އެހެނީ ދިވެހިރާއްޖެއަކީ ބަރަހަނާ ސައިޓްތައް މަނާކުރެވިފައިވާ ގައުމަކަށްވާތީއެވެ. މިއީ ކަނޑައެޅިގެން އަންހެން ފަނޑިޔާރުންގެ ވަޒީފާގެ ރައްކާތެރިކަމަށް އަރައިގަތުމުގެ އަމަލުތަކެކެވެ. އަދި ބުލީކުރުމުގެ ދަށުދަރަޖައިގެ ފިނޑި އަމަލުތަކެއްވެސްމެއެވެ. ދިވެހިރާއްޖޭގައި ފަނޑިޔާރުންނާބެހޭ ގާނޫނެއް އެބައޮތެވެ. އަދުލު އިންސާފު ގާއިމުކުރުމުގައްޔާއި، ފަނޑިޔާރުކަމުގެ މަސްއޫލިއްޔަތުތަކާއި ވާޖިބުތައް އަދާކުރުމުގައި ފަނޑިޔާރުންނަކީ އެހެން އެއްވެސް މީހެއްގެ ނުވަތަ މުއައްސަސާއެއްގެ ބާރެއް ނުވަތަ ނުފޫޒެއް ފޯރުވޭނޭ ބައެއް ނޫންކަމަށާއި، އަމިއްލަ ފަރުދަކު ވިޔަސް، ދައުލަތުގެ ކަމެއް ހިންގުމާ ހަވާލުވެހުރި މީހަކުވިޔަސް، ފަނޑިޔާރުންގެ މަސައްކަތާ ބެހި، ނުފޫޒު ފޯރުވައި ހަދައިގެން ނުވާނެކަމަށް، އެގާނޫނުގެ 4 ވަނަ މާއްދާގައި އޮވެއެވެ. މިކަން މިހެން އޮންނައިރު، ރައީސް ޔާމީންގެ މައްސަލަ ބެލި ބެންޗަށް ސިޔާސީ ބޭފުޅަކު ނުފޯރުވާވަރަށް ހުރިހާ ފަނޑިޔާރުންނަށް ފެންނާނެހެން ނުފޫޒު ފޯރުވުމުގެ އަމަލުތަކެއް ވައިބާ ގުރޫޕެއްގައި ފަނޑިޔާރަކު ކުރަމުންދާއިރު ފިޔަވަޅެއް ނޭޅޭނަމަ، ގާނޫނުތަކާއި މުއައްސަސާތަކުގެ ބޭނުމަކީ ކޮބާތޯއެވެ؟
ހަމަ އެމާއްދާގެ އަކުރެއްގައި، ކޯޓުތަކުގެ މިނިވަންކަން ރައްކާތެރިކުރުމަށާއި، ކޯޓުތަކުގެ ހައިބަތާއި ގަދަރު ހިމާޔަތްކުރުން ދައުލަތުގެ މުއައްސަސާތަކާ މަތިކޮށްފައިވާއިރު، އެންމެ ފަނޑިޔާރެއްގެ ބަސްމަގު ހުރި ގޮތުން މުޅި ކޯޓުތަކުގެ ހައިބަތާ ގަދަރު ކުޑަވަމުންދާއިރު، އެއީ އެއްވެސް ފިޔަވަޅެއް ނޭޅޭ ބާވަތުގެ ކަމަކަށްވާނަމަ އެއީ އަމިއްލަ ފަރުދެއްގެ ހައިސިއްޔަތުން ހަމަ ގައިމު އަޅުގަނޑު ކަންބޮޑުވާ ކަމެކެވެ.
ހަމަ މިދެންނެވުނު ގާނޫނުގެ 32 ވަނަ މާއްދާގައި ފަނޑިޔާރުންގެ ސުލޫކީ މިންގަނޑުތަކެއް ބަޔާންކޮށްފައި އޮވެއެވެ. އެމާއްދާގެ 5 ވަނަ ނަންބަރުގައި ވަރަށް ރީތި އިބާރާތެއް އޮވެއެވެ. ވިދާޅުވާށެވެ! "ފަނޑިޔާރު ކުރާކަމަކުން، ނުވަތަ ބައިވެރިވުމަކުން، ނުވަތަ ދައްކާ ވާހަކައަކުން، ނުވަތަ ފާޅުކުރާ ހިޔާލަކުން، ނުވަތަ އެނޫންވެސް އެހެންގޮތަކުން، ފަނޑިޔާރުގެ މިނިވަންކަމާއި، މުސްތަގައްލުކަމާއި، އިންޞާފުވެރިކަމާމެދު ސުވާލު އުފެދޭނެ ނުވަތަ އުފެދިދާނެ އެއްވެސްކަމެއް ނުކުރުން އަދި ސިޔާސީ ގޮތުން ވަކި ފަރާތަކަށް ބުރަވެހުރެ ވާހަކަ ނުދެއްކުން؛" އަދި 10 ވަނަ ނަންބަރުވެސް ވިދާޅުވާށެވެ. "ސިޔާސީ ހިޔާލުތައް ފާޅުކޮށް ސިޔާސީކަމެއްގައި ނުއުޅުން؛"
މިހާތަނަށް ހިނގި އެންމެ ބޮޑު ސިޔާސީ އެއް ލީޑަރުގެ ޖިނާއީ މައްސަލާގައި ވަކިގޮތަކަށް ބުރަވެހުރެ އެތައް ފަނޑިޔާރުން ތިބި ގުރޫޕެއްގައި ފަނޑިޔާރަކު ހިޔާލުފާޅުކޮށްފައިވާއިރު، އެކަން އެއީ ހަމަ އެއްވެސް ފިޔަވަޅެއް އެޅޭ ބާވަތަކުގެ ކަމަކަށް ނުވާނަމަ، ދެންނެވުނު އިބާރާތަކީ އެއީ ފޮޓޯފުރޭމަކަށް ލައި ފާރުގައި ހާރުކުރަންވެގެން މަޖިލީހުން ފާސްކުރި އިބާރާތަކީ ތޯއްޗެކެވެ.
އާދޭހެވެ! އެފަނޑިޔާރުގެ އޮތީ އަންހެން ބޭފުޅުންގެ އައުރައިގެ މައްސަލައެއް ނޫނެވެ. އެކަން ލީކްވެފައިވާ ކުރީގެ އެހެން މެސެޖްތަކުންނާއި އެފަނޑިޔާރާ ގުޅިގެން ފެންމަތިވެފައިވާ އެހެން މައްސަލަތަކުގެ މައުލޫމާތުން ސާފުކޮށް އެނގެއެވެ. ފަނޑިޔާރުންނަކީ އެބައިމީހުންގެ މަސައްކަތާއި މަސައްކަތުން ބޭރުގައިވެސް ވަކި އަހުލާގަކާއި ސުލޫކެއް ހިފަހައްޓަންޖެހޭނެ ބައެކެވެ.
ބާޒާރުމަތީ ބަހުރުވައިން އެހެން ފަނޑިޔާރުންނަށް ބަވައި، މައްލަވަކޮށް، މިކަންކަން ހިނގަމުންދާއިރު، ބަލަހައްޓައިގެން ތިބޭނަމަ، މާދަމާ ހަމަ އެފަނޑިޔާރު ކުރައްވާ ހުކުމެއްގައި، ދައުލަތުގެ މުއައްސަސާއަކަށް، އެއްޗެއް "ބައްލަވަން" ލިޔުއްވައި އަމުރެއް ނެރުއްވުމަކީ ވެސް ކުރައްވާފާނެ ކަމެކެވެ.
