ޕެރިސް (މެއި 14) - ޕީއެސްޖީ ދޫކޮށް މި ސީޒަން ނިމުމުން އެހެން ކުލަބަކަށް ބަދަލުވާނެ ކަން ހާމަކޮށްފައިވީ ނަމަވެސް، އޭނާ ދެން ބަދަލުވާނެ ޓީމު ހާމަކުރާނީ އެ ވަގުތު ޖެހުމުން ކަމަށް ފްރާންސްގެ ތަރި ކީލިއަން އެމްބާޕޭ ބުނެފި އެވެ.
ޕީއެސްޖީގައި ހަތް އަހަރު ހޭދަކުރުމަށްފަހު, މި ސީޒަން ނިމުމުން ޕީއެސްޖީ ދޫކޮށްލާނެކަން އެމްބާޕޭ ހާމަކުރީ މިދިޔަ ހަފުތާގެ ތެރޭގަ އެވެ. ރިޕޯޓުތައް ބުނާ ގޮތުން އެމްބާޕޭ ޕީއެސްޖީ ދޫކޮށް ބަދަލުވާނީ ރެއާލް މެޑްރިޑަށެވެ.
މިކަމާ ގުޅިގެން އެމްބާޕޭ ބުނީ, އޭނާ ޕީއެސްޖީ ދޫކޮށްލާނެ ކަން ހާމަކުރީ އެ ވަގުތު ޖެހުމުން ކަމަށާއި, ހަމަ އެގޮތައް އޭނާ ބަދަލުވާނެ ޓީމު ވެސް ހާމަކުރާނީ އެކަމަށް ވަގުތު ޖެހުމުން ކަމަށެވެ.
"އަހަރެންގެ ކުރިމަގާ ބެހޭ ގޮތުން އަހަރެން ވާހަކަ ދައްކަނީ އެ ވަގުތު ޖެހުމުން. އަހަރެން ޕީއެސްޖީ ދޫކޮށްލާނެކަން ވެސް ހާމަކުރީ އެ އުސޫލުން. އަހަރެން ބަދަލުވާނެ ކުލަބްވެސް ހާމަކުރާނީ އެކަމަށް ވަގުތު ޖެހުމުން" އެމްބާޕޭ ބުންޏެވެ.
ޔޫރަޕްގެ ބޮޑެތި ކުލަބްތަކުން އެމްބާޕޭ ހޯދަން މަސައްކަތް ކުރަމުން އަންނައިރު, އޭނާގެ އަގުބޮޑު މުސާރަ ދެވޭނެކަމަށް ބެލެވެނީ ރެއާލަށެވެ. އެކަމަކު, އެ ކުލަބުން އެމްބާޕޭ ދެން ގެންދާ ކަމަށްވަނީނަމަ, މީގެ ކުރިން އެ ކުލަބުން އެމްބާޕޭ އަށް ހުށަހެޅި މުސާރައަށްވުރެ މި ފަހަރު ހުށަހަޅާ މުސާރަ ކުޑަވާނެ ކަމަށް ބެލެވެ އެވެ.
އެމްބާޕޭ ހޯދަން ތިން ފަހަރެއްގެ މަތިން ރެއާލުން ވަނީ ބިޑްކޮށްފަ އެވެ. އެކަމަކު އެ ތިން ފަހަރު ވެސް އެމްބާޕޭ ވަނީ ރެއާލުގެ ހުށަހެޅުމަށް ދެކޮޅު ހަދާފަ އެވެ.
އެމްބާޕޭ ޕީއެސްޖީ އަށް ކުޅެދިން 306 މެޗުގައި އޭނާ ވަނީ 256 ގޯލު ޖަހާ 96 ގޯލު ޖަހަން އެހީތެރިވެދީފަ އެވެ. އަދި ޕީއެސްޖީ އާއެކު ހަތް ފަހަރު ފްރެންޗް ލީގު ވަނީ ކާމިޔާބު ކޮށްފަ އެވެ.
