ރައްޔިތުންގެ މަޖިލީހުގައި ހަތަރުވަނަ ދައުރު ފުރިހަމަ ކުރެއްވުމަށް ފަހު އެ މަޖިލީހުގެ މަސައްކަތްތަކާ ދުރަށް ޖެހިވަޑައިގެންނެވި ނަމަވެސް އަބަދުވެސް އިސްލާހީ މަސައްކަތުގައި ދެމިހުންނަވާނެ ކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެ އެވެ.
އަސްލަމް އެންމެ ފުރަތަމަ މަޖިލީހަށް އިންތިހާބުވެވަޑައިގެންނެވީ 2005 ގަ އެވެ. އޭރުން ފެށިގެން މެދުކެނޑުމެއްނެތި އެމަނިކުފާނު ގެންދަވަނީ މަޖިލީހުގައި ހިދުމަތް ކުރައްވަމުންނެވެ. ހިތަދޫ އުތުރު ދާއިރާގެ ގޮނޑި ވެސް ފުރުއްވާ އަސްލަމް ވިހިވަނަ މަޖިލީހަށް އިންތިހާބުވެވަޑައިގެންފައި ނުވެ އެވެ.
"އިންސާނީ ހައްގުތައް ރާއްޖޭގައި ކަށަވަރުކުރުމަށް ކުރެވެމުންދާ މަސައްކަތްތަކާއި ހެޔޮވެރިކަމެއް ރާއްޖޭގައި އަށަގެންނެވުމަށް ކުރަންޖެހޭ އެންމެހާ މަސައްކަތް ކުރުމާއި، މީގެ އިތުރުން ޑިމޮކްރަސީގެ ރަނގަޅު ހަމަތައް ރާއްޖޭގައި ގާއިމުކުރުމަށް އެތަކެއް ޒަމާނުއްސުރެ މި ކުރެވެމުންދާ އިސްލާހީ މަސައްކަތުގައި ދެމިހުންނާން," މިއަދު އޮތް މަޖިލީހުގެ އެންމެ ފަހު ޖަލްސާގައި އަސްލަމް ވިދާޅުވި އެވެ.
"ސިޔާސީ ކަންކަމުގައި އަޅުގަނޑު އަބަދުވެސް ގަބޫލުކުރާ ހަމަތަކާއި އުސޫލުތައް ކުރިއެރުވުމަށްޓަކައި އަޅުގަނޑު މަސައްކަތް ކުރާނެ ވާހަކަ ދަންނަވަން."
އަސްލަމް ވަނީ އެމަނިކުފާނުގެ ސިޔާސީ ހަޔާތުގައި އެކި ގޮތްގޮތުން އެހީތެރިކަން ފޯރުކޮށްދިން ހުރިހާ ފަރާތްތަކަށް ޝުކުރު އަދާކުރައްވާފަ އެވެ. މަޖިލީހުގެ ރިޔާސަތާ އަސްލަމް ހަވާލުވެވަޑައިގެންނެވީ ނޮވެމްބަރު 13, 2023 ގަ އެވެ.
ކުރީގެ ރައީސް އިބްރާހިމް މުހައްމަދު ސޯލިހު ނޮވެމްބަރު 2018 ގައި ވެރިކަމާ ހަވާލުވުމާ އެކު ހުސްވި އެމްޑީޕީގެ ޕީޖީ ލީޑަރުގެ މަގާމު ވެސް 2019 ގެ މަޖިލިސް އިންތިހާބާ ހަމައަށް އަސްލަމް ފުރުއްވި އެވެ.
މަޖިލިސް 19 ގެ މެޖޯރިޓީ ލީޑަރުކަން ވެސް ކުރައްވި އަސްލަމްއަކީ ނިމިގެންދިޔަ ރިޔާސީ އިންތިހާބުގައި ދެވަނަ ދައުރަކަށް ރައީސް އިބްރާހިމް މުހައްމަދު ސޯލިހު ވާދަކުރެއްވި އިރު އެމަނިކުފާނުގެ ރަނިންމޭޓެވެ. އަދި, މަޖިލީހުގެ 241 ކޮމިޓީގެ މުގައްރިރުކަން ވެސް އަސްލަމް ކުރެއްވި އެވެ.
