އިންޑިއާ އަސްކަރިއްޔާއިން ހަދިޔާކޮށްފައިވާ ވައިގެ ތިން އުޅަނދުގެ އޮޕަރޭޝަންތަކަށް ސިފައިން ތިބީ އެ ކަމަށް ބޭނުންވާ ވަރަށް ކަމަށާއި ސިފައިން ގިނަކޮށްގެން މަރުކަޒުވާން އިންޑިއާއިން މަސައްކަތްކޮށްފައި ނުވާ ކަމަށް ސަރުކާރުން މިއަދު ބުނެފި އެވެ.
ސިފައިން ފޮނުވާލުމުގެ މަސައްކަތުގެ ތަފުސީލު ދިނުމަށް ބޭއްވި ނޫސްވެރިންގެ ބައްދަލުވުމުގައި އަމާޒުވި ސުވާލުތަކުގެ ޖަވާބުގައި، ފޮރިން މިނިސްޓަރު މޫސާ ޒަމީރު ވިދާޅުވީ އުޅަނދުތައް އޮޕަރޭޓްކުރަން ތިބި 76 ސިފައިންގެ ބަދަލުގައި ގެނައި މަދަނީ މީހުންގެ އަދަދަކީ 76 ކަމަށެވެ.
ކުރިން ވެސް ސިފައިން ތިބި އަދަދަކީ އޮޕަރޭޝަނަށް ސީދާ ބޭނުންވާ އަދަދު ކަމަށް ޒަމީރު ވިދާޅުވި އެވެ. ދިވެހިންގެ ކަންބޮޑުވުމަކަށް އޮތީ ބޭރުގެ ސިފައިންގެ ބަޔަކު ރާއްޖޭގައި ތިބުން ކަމަށާއި ސިފައިންގެ ބަދަލުގައި މަދަނީ މީހުން ތިބުމުން މައްސަލަ ހައްލުވީ ކަމަށް އޭނާ ވިދާޅުވި އެވެ.
"މި ކަމަށް ގެނެސްފަ ތިބީ މި ކަމަށް ހަމަ ބޭނުންވާ އަދަދަށް މީހުން ކުރީގައި ވެސް، އިންޑިއާ ސަރުކާރުން އަނެއްހެން މި ތާނގާ ސިފައިންތަކެއް މާ ގިނައިން ބައިތިއްބަން އުޅެފައެއް ނެތް،" ވަޒީރު ވިދާޅުވި އެވެ.
މި ސަރުކާރުގެ ފޮރިން މިނިސްޓަރު އެެހެން ވިދާޅުވި ނަމަވެސް، މިދިޔަ ސަރުކާރުގައި އިދިކޮޅު ފަރާތްތަކުގެ ގޮތުގައި ޕީއެންސީ/ޕީޕީއެމް ކޯލިޝަންގެ ވެރިން ތިބި އިރު އިންޑިއާއިން މަސައްކަތްކުރަނީ އެ ގައުމުގެ އަސްކަރީ މަރުކަޒެއް ރާއްޖޭގައި ގާއިމު ކުރުމަށް ކަމަށް ތުހުމަތުކޮށްފައިވެ އެވެ.
އަވައްޓެރި އިންޑިއާ އަސްކަރިއްޔާއަކީ ޒަމާނުއްސުރެން ރާއްޖެއާ އެންމެ ގާތް ގުޅުމެއް އޮންނަ ބޭރުގެ އަސްކަރިއްޔާ އެވެ.
އެ ގުޅުމުގެ ތެރެއިން، އެ ގައުމުގެ ފުރަތަމަ ހެލިކޮޕްޓަރު ގެނައީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. ދެވަނަ ހެލިކޮޕްޓަރަކީ، ކުރީގެ ރައީސް އަބްދުﷲ ޔާމީނުގެ ވެރިކަމުގައި ގެނައި އުޅަނދެކެވެ. ޑޯނިއާ މަތިންދާބޯޓު ގެނައީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގަ އެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދަކީ އިންޑިއާ ސިފައިން ރާއްޖޭން ފޮނުވާލުމެވެ. އެކަމަކު ސިފައިން އެކަނި ފޮނުވާލައި، އުޅަނދުތައް ބަހައްޓާތީއާއި އޭގެ ބަދަލުގައި އިންޑިއާގެ މަދަނީ ބަޔަކު ގެންނަން އެއްބަސްވެފައިވާތީ ސަރުކާރުން އެ ވައުދު ފުއްދި ގޮތާ މެދު ފާޑުކިޔުންތަކެއް އަމާޒުވެފައިވެ އެވެ.
