މަސް އޮޑި ސްޕޯޓްސް ކުލަބްގެ ނަން "އޮޑި ސްޕޯޓްސް" ކުލަބަށް ރީ ބްރޭންޑް ކޮށްފި އެވެ.
ދެ ވަނަ ޑިވިޝަންގެ ޗެމްޕިއަން މަސް އޮޑިން އެ ކުލަބްގެ ނަން ރީ ބްރޭންޑްކުރީ ކުލަބްގެ ފެންވަރު އިތުރަށް މަތިކޮށް އެހެން ކުޅިވަރުތަކުގައިވެސް އެ ކުލަބްގެ ޝާމިލްވުން އިތުރުކުރުމަށް ކަމަށް އެ ކުލަބުން ބުނެ އެވެ.
އަދި އޮޑި ސްޕޯޓްސް ކުލަބަށް ރީ ބްރޭންޑްކޮށް އެ ކުލަބުން މި އަހަރުން ފެށިގެން އިތުރު ކުޅިވަރުތަކުގައި ވެސް ފެންނާނެ ކަމަށް ކުލަބުން ބުނެ އެވެ.
މަސް އޮޑީގެ ނަން އޮޑި ސްޕޯޓްސް ކުލަބަށް ރީ ބްރޭންޑް ކޮށްދެއްވީ މިރޭ, ސެންޓްރަލް ޕާކުގައި ބޭއްވި ރަސްމިއްޔާތުގައި މަހިބަދޫ ދާއިރާގެ މެމްބަރު އަދި އެފްއޭއެމްގެ އިންތިހާބުގައި ވާދަކުރައްވަން ނިންމަވާފައިވާ އެ އެސޯސިއޭޝަންގެ ކުރީގެ ރައީސް އަހުމަދު ތާރިގް (ޓޮމް) އެވެ.
މި ރަސްމިއްޔާތުގައި އޮޑި ސްޕޯޓްސް ކުލަބްގެ އިސް ވެރިންނާއި, ކުޅުންތެރިންގެ އިތުރުން ކުލަބާ އަލަށް ގުޅުނު ކުޅުންތެރިން ވަނީ ބައިވެރިވެފަ އެވެ.
މި ރަސްމިއްޔާތުގައި ވާހަކަ ދައްކަވަމުން އޮޑި ސްޕޯޓްސް ކުލަބްގެ އޮފިޝަލް ބުނީ, އޮޑި ސްޕޯޓްސް ކުލަބްގެ އަމާޒަކީ ފުޓުބޯޅަ ނޫން ކުޅިވަރުތަކުންވެސް ކުރިއަށް ދިޔުން ކަމަށެވެ. މިރޭ، ކުލަބް ރީ ބްރޭންޑް ވެގެންދާއިރު, މި އަހަރުން ފެށިގެން އެހެން ކުޅިވަރުތަކުން ވެސް ކުލަބް ކުރިއަށް އޮތްތަނުގައި ފެނިގެންދާނެ ކަމަށް އެ ކްލަބުން ވަނީ ބުނެފަ އެވެ.
މަސްއޮޑިން ވޭތުވެދިޔަ ދެ އަހަރެއްހާ ދުވަހު ފުޓުބޯޅައިގެ އެންމެ އުހަށް އެރުމަށް ކުރި ދަތުރަކީ ފަސޭހަ ދަތުރެއް ނޫން ކަމަށް ވެސް އެ ކްލަބުން ވަނީ ފާހަގަކޮށްފަ އެވެ.
މި ރަސްމިއްޔާތުގައި ވަނީ އޮޑި ސްޕޯޓްސް ކުލަބްގެ އާ ލޯގޯ އާއި, އަންނަ ސީޒަނުގައި އެ ޓީމުން ބޭނުން ކުރާނެ ޖާޒީ ވެސް ދައްކާލާފަ އެވެ.
ދެ ވަނަ ޑިވިޝަނުގެ ޗެމްޕިއަންކަން އޮޑި ސްޕޯޓްސް ކުލަބުން ހޯދީ ފައިނަލުގައި ރާއްޖޭގެ އެންމެ ކާމިޔާބު އެއް ކުލަބް ވިކްޓަރީ ސްޕޯޓްސް ކުލަބް ބަލިކުރުމަށްފަހުގަ އެވެ. އެއާއެކު އޮޑި ސްޕޯޓްސް ކުލަބަށް ވަނީ ފުރަތަމަ ޑިވިޝަނުން ފުރުސަތު ފަހިވެފަ އެވެ.
