ރާއްޖޭގެ 13 ކޯޗެއް، މެލޭޝިއާގައި ކުރިއަށްދިޔަ އޭއެފްސީ ފުޓްސަލް ލެވަލް ވަން ކޯޗިން ކޯސް ހާސިލްކޮށްފި އެވެ.
މެލޭޝިއާގެ ސްޕޯޓިޒާ އިން އޭއެފްސީ އާއި މެލޭޝިއާ ފުޓްބޯލް އެސޯސިއޭޝަނާ ގުޅިގެން، ކުރިއަށްގެންދިޔަ މި ކޯޗިން ކޯސް އޮތީ މި މަހު 1-6 އަށެވެ. ޖުމްލަ އެކު، 19 ކޯޗުން މި ކޯހުގައި ބައިވެރިވިއިރު، ރާއްޖޭގެ 13 ކޯޗުން ވަނީ ބައިވެރިވެފަ އެވެ.
މިއީ، މިހާތަނަށް ރާއްޖޭން ބޭރުގައި ބޭއްވި އެއްވެސް ކުޅިވަރުގެ ކޯހެއްގައި ބައިވެރިވި ޖުމްލަ މެމްބަރުންގެ ތެރެއިން މި އަދަދަށް ރާއްޖޭގެ ކޯޗުން ފެނިގެންދިޔަ ފުރަތަމަ ފަހަރަށް ވުމުގެ ފުރުސަތު ބޮޑެވެ.
ކޯހުގައި ބައިވެރިވި ދިވެހި ކޯޗުންނަކީ، އަލީ އަަރުޝަދު (އަރޭ)، ޝަމީމް އަލީ، މުހައްމަދު ނާޝިދު (ނާއްޓޭ)، މުހައްމަދު ނައުފަލް، މުހައްމަދު ސާމިން، މުހައްމަދު ނާޝިދު (ނާއްޓެ)، ޝީނީޒް މުހައްމަދު (ޝިމިނީ)، އަހުމަދު ޔަމީން، މުހައްމަދު ޝާހީން (ޕޮޓޭ)، ޖައުފަރު އަލީ (ޖައުބެ)، އަލީ ހައިޝަމް (ޗުމްޕު)، އިބްރާހިމް އަހުމަދު (ބޮޑޭ)، ނައުޝަދު އާދަމް އަދި އަހުމަދު ސަރާހު އެވެ.
ތިއަރީ އާއި ޕްރެކްޓިކަލް ކްލާސްތައް ކުރިއަށްގެންދިއުމަށް ފަހު، ކޯހުގެ ހުރިހާ ބައެއް ފުރިހަމަ ކުރުމުން ވަނީ ސެޓްފިކެޓް އޮފް އެެޓެންޑެންސް އެއް ދީފަ އެވެ. އަދި އެއް އަހަރު ދުވަހު ކޯޗިންގައި އުޅުމަށް ފަހު، ފުރިހަމަ ކުރަންޖެހޭ ކަންްކަން ނިންމުމުން އަސްލު ސެޓްފިކެޓް ކޮންމެ ކޯޗަކަށް ލިބިގެންދާނެ އެވެ.
ފީފާ އިން ދާދިފަހުން ވަނީ ފުރަތަމަ ފަހަރަށް ދުނިޔޭގެ ފުޓްސަލް ރޭންކިން ނެރެފަ އެވެ. އޭގައި ރާއްޖެ އޮތީ ދުނިޔޭގެ 110 ވަނައިގަ އެވެ. އޭޝިއާގެ 27 ވަނައިގައި ލައްވާލިއިރު، ސައުތު އޭޝިއާ (ސާފް) އަށް ބަލާއިރު، ފުޓްސަލްގެ އެއް ވަނަ ގައުމަކީ ރާއްޖެ އެވެ.
