މާލޭ ދަތުރުވެރިންގެ މާރުކޭޓުގައި ކެރެޓް ކިލޯއެއްގެ އަގު 45ރ. އަށް އުފުލިއްޖެ އެވެ.
ރޯދަ މަސް ފެށުނުއިރު 30ރ. އަށް ލިބެން ހުރި ކެރެޓް ކިލޯއެއްގެ އަގު 45ރ. އަށް އުފުލިފައި ވަނީ މިއަދު އެެވެ. އޭގެ ކުރިން ކިލޯއެއް 35ރ. އަށް ވެސް ވަނީ ވިއްކާފަ އެވެ.
ކެރެޓުގެ އިތުރުން މިއަދު ދިވެހި ކިއުކަމްބާ ކިލޯއެއްގެ އަގުވެސް ވަނީ 70ރ. އަށް އުފުލިފަ އެވެ. ރޯދަ މަސް ފެށުނުއިރު ކިއުކަމްބާ ކިލޯއެއްގެ އަގު ހުރީ 30ރ. އާއި 35ރ. އާ ދެމެދުގެ އަގެއްގަ އެވެ.
މާރުކޭޓު ގޮޅިއެއްގައި މަސައްކަތް ކުރާ އަލީ، 35 "އަދަދު" އަށް ބުނީ ކެރެޓް އަދި ކިއުކަމްބާގެ އަގު ބޮޑުވެފައި ވަނީ އެ ލިބޭވަރު މަދުވުމުން ކަމަށާއި، ކުރިއަށް އޮތް ދުވަސްތަކުގައިވެސް އަގު އުފުލޭނެ ކަމަށް ބެލެވޭ ކަމަށެވެ.
"ދިވެހި ކިއުކަމްބާ ލިބޭލެއް މަދުވެއްޖެ. ކުރިން ރަނގަޅަށް ލިބޭ. ކެރެޓް އަގުބޮޑުވީ އެތެރެ ކުރާ މީހުން ކުއްލިއަކަށް އެ އަގުބޮޑު ކުރުމުން" އަލީ ބުނި އެވެ.
އިއްޔެއެކޭ އެއްގޮތަށް ބާޒާރުގައި ކުރުނބާގެ އަގު 50ރ. އާއި 100ރ. އާ ދެމެދު ހުރިއިރު، ލެޓިއުސް ކިލޯއެއްގެ އަގު މިއަދުވެސް ހުރީ 100ރ. އާއި 150ރ. އާ ދެމެދުގެ އަގެއްގަ އެވެ. މިއީ ހަފްތާއެއްގެ ތެރޭގައި އަގު ބޮޑުވި ދެ ބާވަތެވެ.
މޭވާގެ އަގުތަކަށް ބަލާއިރު އާފަލު 6ރ. އާއި 7ރ. އަށް ލިބެން ހުރިއިރު، އޮރެންޖެއްވެސް ލިބެން ހުރީ އެ އަގުގަ އެވެ. އަނބު ކިލޯއެއްގެ އަގު 120ރ. އަށް އުފުލިފައިވާއިރު، މެންޑެރިން ކިލޯއެއްގެ އަގު ހުރީ 65ރ. އާއި 70ރ. އާ ދެމެދުގެ އަގެއްގަ އެވެ.
މިއަދު ދިވެހި ޖުމްހޫރީ މޭވާ މަދުން ނަމަވެސް ބާޒާރުގައި ހުރިއިރު، އަގު ހުރީ 140ރ. އާއި 160ރ. އާ ދެމެދުގެ އަގެއްގަ އެވެ. އަދި ބޭރު ޖުމްހޫރީ މޭވާ ލިބެން ހުރީ 120ރ. އާއި 130ރ. އާ ދެމެދުގެ އަގެއްގަ އެވެ.
މަހުގެ އަގުތަކަށް ބަލާއިރު ކަނޑު މަސް ކިލޯއެއްގެ އަގު ހުރީ 35ރ. އަށެވެ. އަދި ކަންނެލި ކިލޯއެއް ލިބެން ހުރީ 35ރ. އާއި 40ރ. އަށްކަން ފާހަގަކޮށްލެވެ އެވެ.
