މާލޭ ދަތުރުވެރިންގެ މާރުކޭޓުގައި ކުރުނބާގެ އަގު ރަނަށްވެ، ތޮއްޑޫ ކަރާ ހުސްވާން ފަށައިފި އެވެ.
ދަތުރުވެރިންގެ މާރުކޭޓުގައި މިއަދު ކުރުނބަލެއް 50ރ. އާއި 100ރ. އާ ދެމެދު ލިބެން ހުރިއިރު، ކުރުނބާ ފުޅިއެއް ލިބެން ހުރީ 150ރ. އާއި 200ރ. އާ ދެމެދުގެ އަގެއްގަ އެވެ.
ބާޒާރުގައި ކުރުނބާ ވިއްކަން ހުރި މެހެބޫބް، 33 "އަދަދު" އާ ވާހަކަ ދައްކަމުން ބުނީ ކުރުނބާގެ އަގު އުފުލުނީ، ކުރުނބާ ލިބުން މަދުވެފައިވާތީ ކަމަށާއި، ކުރުނބާގެ ރަނގަޅު ޝިޕްމަންޓެއް ލިބުމާއެކު ކުރުނބާގެ އަގު ދަށްވާނެ ކަމަށް ބެލެވޭ ކަމަށެވެ.
"ކުރުނބާގެ އަގު އުފުލުނީ ރަނގަޅު ކުރުނބާ މިހާރު ނުލިބޭތީ. މިހާރު ލިބެން ހުރީ ވަރަށް ކުދި ކުރުނބާ. ބޮޑެތި ކުރުނބާ މި ލިބެނީ އަގުބޮޑުކޮށް" މެހެބޫބް ބުނި އެވެ.
ބާޒާރުގައި ތޮއްޑޫ ކަރާ ހުސްވެ، މިއަދު ގިނައިން ލިބެން ހުރީ އިންޑިއާ ކަރާ ކަމަށްވާއިރު، އިންޑިއާ ކަރާ ކިލޯއެއް ލިބެން ހުރީ 20ރ. އަށެވެ. އަދި ދިވެހި އެހެން ރަށްތަކުގެ ކަރާ ކިލޯއެއް ލިބެން ހުރީ 20ރ. އަށެވެ.
ކަރާ ވިއްކަން ހުރި އަހުމަދު ރިއްފަތު، 41 ބުނީ ބާޒާރުގައި ތޮއްޑޫ ކަރާ މިހާރު ގާތްގަނޑަކަށް އެއްކޮށް ހުސްވެފައިވާ ކަމަށާއި، ކުރިއަށް އޮތް ދުވަސްތަކުގައި ތޮއްޑޫ ކަރާ ލިބޭއިރު އަގުބޮޑުވާނެ ކަމަށެވެ.
ދަތުރުވެރިންގެ މާރުކޭޓުގައި ކަރާ ވިއްކަނީ -- ފޮޓޯ: އިޔާދު އަބްދުލް ވައްހާބު
"މިހާރުވެސް ތޮއްޑޫ ކަރާ ލިބެން ހުރީ 25ރ. އަށް. ރޯދަ މަސް ނިމޭއިރު ކިލޯއެއް 35ރ. އަށް އަރާނެ ކަމަށް ލަފާ ކުރެވޭ" ރިއްފަތު ބުނި އެވެ.
ބާޒާރުގައި މިއަދުވެސް ލެޓިއުސް ކިލޯއެއްގެ އަގު 100ރ. އަށް ވުރެ މަތީގައި ހުރިއިރު، ކޮޕީފަތް ބޮނޑިއެއް ލިބެން ހުރީ 10ރ. އަށެވެ. އަދި ކުއްޅަފިލާފަތް ބޮނޑިއެއް ލިބެން ހުރީ 20ރ. އަށެވެ.
މޭވާއަށް ބަލާއިރު އާފަލެއް 6ރ. އާއި 7ރ. އަށް ލިބެން ހުރިއިރު، އޮރެންޖެއް ލިބެން ހުރީ 7ރ. އަށެވެ. އަދި ގްރޭޕްސްގެ 100 ގްރާމު 18ރ. އަށް ލިބެން ހުރިއިރު، ސްޓްރޯބެރީގެ 250 ގްރާމުގެ ތަށްޓެއް ލިބެން ހުރީ 60ރ. އަށެވެ.
މަހުގެ އަގުތަކަށް ބަލާއިރު މަސް މާރުކޭޓުގައި ކަނޑު މަސް ކިލޯއެއްގެ އަގު ހުރީ 35 ރުފިޔާއަށެވެ. އަދި ކަންނެލި ކިލޯއެއް 35ރ. އަށް ހުރިއިރު، ބޮޑު ކަންނެލި ކިޅޯއެއްގެ އަގު ހުރީ 40ރ. އަށެވެ.
މުށިމަހުގެ 10 މަސް 20ރ. އަށް ވިއްކަމުންދިޔައިރު، މިއަދު ބާޒާރުގައި ފަރުމަސް ވަރަށް މަދުކަން ފާހަގަކުރެވުނެވެ.
