ބާޒާރުގައި މިރުސް ތިޔާގިވެ، މިރުހުގެ އަގު އަނެއްކާ ވެސް ހެޔޮވެއްޖެ އެވެ.
މާލޭ ދަތުރުވެރިންގެ މާރުކޭޓުގެ ގިނަ ގޮޅިތަކުގައި މިއަދު ކަނޑޫދޫ މިރުސް ހުރިއިރު، ބައެއް ގޮޅިތަކުގައި ޔުގާންޑާ އަދި ލަންކާ މިރުސްވެސް ހުއްޓެވެ.
ކަނޑޫދޫ މިރުހުގެ 100 ގްރާމު މިއަދު 25ރ. އާއި 35ރ. އާ ދެމެދުގެ އަގެއްގައި ހުރިއިރު، ރޯދަ މަސް ފެށުނުއިރު ކަނޑޫދޫ މިރުހުގެ 100 ގްރާމު ލިބެންހުރީ 85ރ. އަށްކަން ފާހަގަކުރެވެ އެވެ.
ޔުގާންޑާ މިރުހުގެ 100 ގްރާމު މިއަދު ލިބެން ހުރީ 25ރ އަށެވެ. އަދި ލަންކާ މިރުހުގެ 100 ގްރާމު ލިބެން ހުރީ 20ރ. އަށެވެ.
މާރުކޭޓު ގޮޅިއެއްގައި މަސައްކަތްކުރާ މީހަކު "އަދަދު" އާ ވާހަކަދައްކަމުން ބުނީ މިރުހުގެ އަގު ދަށަށް ދިޔައީ ސްޓޮކު އާވުމުން ކަމަށާއި، އަގު މައްޗަށް ދާނީ ސްޓޮކު ލިބުމުގައި ދަތިތައް ކުރިމަތިވާނަމަ ކަމަށެވެ.
ބާޒާރުގައި އެވްރެޖުކޮށް މިއަދު ތޮއްޑޫ ކަރާ 20ރ. އަށް ލިބެން ހުރިއިރު، މީގެ ކުރިން ކަރާ ކިލޯއެއް ލިބެން ހުރީ 18ރ. އަށްކަން ފާހަގަކޮށްލެވެ އެވެ. އަދި އަލަނާސި ކަރާ ކިލޯއެއްގެ އަގު ހުރީ 25ރ. އަށެވެ.
މާލޭ މަސް މާރުކޭޓުގައި މަސް ވިއްކަނީ -- ފޮޓޯ: އިޔާދު / އަދަދު
އާފަލުގެ އަގުތަކަށް ބަލާއިރު، ފެހި އާފަލެއް ލެބެން ހުރީ 8ރ. އާއި 9ރ. އަށް ކަމަށްވާއިރު، ފެހި އާފަލުގެ އަގު 12ރ. އަށް މިދިޔަ ބުރާސްފަތީގައި އުފުލުނެވެ. އަދި އޮރެންޖުގެ އަގު ހުރީ 8ރ. އާއި 9ރ. އަށެވެ.
މާލޭ މަސް މާރުކޭޓުގައި ހުރި މަހުގެ އަގުތަކަށް ބަލާއިރު، މިއަދު ކަންނެލި ކިލޯއެއް ލިބެން ހުރީ 30ރ. އަށެވެ. އަދި ކަޅުބިލަމަސް ކިލޯއެއްގެ އަގު ހުރީ 35ރ. އާއި 40ރ. އަށެވެ.
މާނިއާ މަހެއް 40ރ. އަށް ލިބެން ހުރިއިރު، ރަތްމަސް ކިލޯއެއްގެ އަގު ހުރީ 40ރ. އާއި 60ރ. އާ ދެމެދުގެ އަގެއްގަ އެވެ. އަދި ކުޑަ މުށިމަހެއް ދެ ރުފިޔާއަށް ހުރިއިރު، ރެހި ޖޯޑެއްގެ އަގު ހުރީ 30ރ. އަށެވެ.
މީގެއިތުރުން ފިލޮޅެއް 50ރ. އަށް ލިބެން ހުރިއިރު، މާތޮޅިއެއްގެ އަގު ހުރީ 30ރ. އަށެވެ.
ފަތްޕިލާވެލީގެ އަގުތައްވެސް ބާޒާރުގައި އެއްވަރުއްގައި ވަނީ ހިފެހެއްޓިފަ އެވެ. އަދި ތަރުކާރީގެ އަގުތައްވެސް ހުރީ އެއްވަރެއްގައި ހިފެހެއްޓިފަ އެވެ.
