ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގައި އެ ހުރި މައްސަލަތައް ހައްލުނުކޮށް، އަވަސް އަރުވާލައިގެން، ބާއްވަން އުޅޭ އެ ޖަމިއްޔާގެ އިންތިހާބު ބަލައިނުގަންނާނެ ކަމަށް ކޮމިޝަނާ އޮފް ސްޕޯޓްސް، މުހައްމަދު ތޮލާލް ވިދާޅުވެއްޖެ އެވެ.
ބެޑްމިންޓަން އެސޯސިއޭޝަންގެ ރައީސް، މޫސާ ނާޝިދު (މޫސަ)އާ ގުޅޭ ކޮރަޕްޝަނަށް މަގުފަހިވާ ގޮތަށް ކަންކަން ކޮށްފައިވާ ކަމުގެ ޝަކުވާތަކާއި އެ އެސޯސިއޭޝަންގެ އަސާސީ ގަވާއިދުގައި ހުރި މައްސަލަތައް ހައްލުނުކޮށް، އެ އެސޯސިއޭޝަންގެ އިންތިހާބު ނުބާއްވަން ތޮލާލް ވަނީ މީގެ ކުރިން ވެސް އަންގައިފަ އެވެ.
އެކަމަކު، ސްޕޯޓްސް ކޮމިޝަނަރުގެ އެ އެންގުމަށް ބޯލެނބުމެއް ނެތި، ބެޑްމިންޓަން އެސޯސިއޭޝަނުން ވަނީ މި މަހު 22 ވަނަ ދުވަހު ބާއްވަން ނިންމާފައިވާ އެ ޖަމިއްޔާގެ އިންތިހާބުގައި ވޯޓު ލެވޭނެ ލިސްޓު ގެޒެޓްކޮށްފަ އެވެ.
އިންތިހާބީ ކޮންގްރެސް ބާއްވަން ބެޑްމިންޓަން އެސޯސިއޭޝަނުން ނިންމާފައި އޮތީ އައްޑޫ އިކުއޭޓްރަލް ވިލެޖުގަ އެވެ.
މި ކަމާ ގުޅޭގޮތުން، "އަދަދު" އިން ކޮމިޝަނާ އޮފް ސްޕޯޓްސް، ތޮލާލްއާ ސުވާލުކުރުމުން އޭނާ ވިދާޅުވީ އެންގުމާ ހިލާފަށް ބާއްވާ އިންތިހާބެއް ބަލައިނުގަންނާނެ ކަމަށެވެ.
"އަޅުގަނޑުމެން ވަރަށް ރަނގަޅަށް ބެޑްމިންޓަން އެސޯސިއޭޝަނަށް އަންގާފައިވާނީ، އެސޯސިއޭޝަންގައި އެ ހުރި މައްސަލަތައް ހައްލުނުކޮށް އިންތިހާބު ނުބާއްވަން، އެ އަށް ނުބަލައި، ބާއްވާ އިންތިހާބެއް ބަލައެއް ނުގަންނާނަން،" ތޮލާލް ވިދާޅުވި އެވެ.
ބެޑްމިންޓަން އެސޯސިއޭޝަނާ އެކު ބައްދަލުވުމެއް ބާއްވަން ކޮމިޝަނާ އޮފް ސްޕޯޓްސް އިން ވަނީ ނިންމައިފަ އެވެ.
ބެޑްމިންޓަން އެސޯސިއޭޝަނުން ގެޒެޓްކޮށްފައިވާ ވޯޓު ލެވޭ ލިސްޓަށް ބަލާއިރު، އެސޯސިއޭޓް މެމްބަރުންގެ ގޮތުގައި، ހިމަނާފައިވަނީ ދެ ކްލަބް އެވެ. އެއީ، ކްލަބް ސްޓެޓިކް އާއި އިންޑޯ ސްޕޯޓްސް އެކެޑަމީ އެވެ.
މިދިޔަ ހަތަރު އަހަރު ބަރާބަރަށް އެސޯސިއޭޝަންގެ ހަރަކާތްތަކުގައި ބައިވެރިވި، އެއް ކްލަބް ކަމަށްވާ ރިވައިވަލް ސްޕޯޓްސް ކްލަބަށް ފުރުސަތެއް ނުދެ އެވެ.
ވޯޓު ލިސްޓުގައި، ފުރިހަމަ މެމްބަރުންގެ ގޮތުގައި ހިމަނާފައިވަނީ ދެ ބެޑްމިންޓަން ޑިވެލޮޕްމަންޓް ކޮމިޓީ (ބީޑީސީ) އެވެ. އެއީ، ނ. ހޮޅުދޫ ބެޑްމިންޓަން ޑިވެލޮޕްމަންޓް ކޮމިޓީ (ބީޑީސީ) އާއި އައްޑޫ ބެޑްމިންޓަން ޑިވެލޮޕްމަންޓް ކޮމިޓީ (ބީޑީސީ) އެވެ.
ބެޑްމިންޓަން ޑިވެލޮޕްމަންޓް ކޮމިޓީ އަށް ވޯޓު ލެވޭ އުސޫލާ މެދު ގިނަ ކަންބޮޑުވުންތަކެއް އެބަހުއްޓެވެ. އަދި ކޮމިޝަނާ އޮފް ސްޕޯޓްސް، ތޮލާލް ވެސް ވަނީ ބީޑީސީތަކަށް މި ވަރުގެ ބާރެއް ލިބޭ ގޮތަށް އޮތްއިރު، އެއީ އެއްވެސް މުއައްސަސާއެއްގައި ރަޖިސްޓްރީނުކޮށް ހިންގާ ތަނަކަށްވާތީ، އެކަން ރަނގަޅުކުރަން އަންގައިފަ އެވެ.
ބެޑްމިންޓަން އެސޯސިއޭޝަންގެ އިންތިހާބުގައި ވޯޓު ލުމުގެ ހައްގު ލިބޭ ގޮތަށް އެ އެސޯސިއޭޝަންގެ ހިންގާ ކޮމިޓީން ބާރުދީފައި އޮންނަ، ބެޑްމިންޓަން ޑިވެލޮޕްމަންޓް ކޮމިޓީ (ބީޑީސީ) ތަކަކީ، ކޮމިޝަނާ އޮފް ސްޕޯޓްސްގައި ރަޖިސްޓްރީ ކުރުމެއް ވެސް ނެތި/ ރާއްޖޭގެ އެއްވެސް ރަސްމީ މުއައްސަސާއެއްގައި ރަޖިސްޓްރީ ނުކުރާ، އެސޯސިއޭޝަންގެ ހިންގާ ކޮމިޓީން ބޭނުންވާ ގޮތަކަށް ކަންކަން ނުފޫޒު ފޯރުވޭ ގޮތަށް އޮތް ބަޔެކެވެ.
ގިނަ ފަހަރު ބީޑީސީތައް ހިންގަން ފުރުސަތު ދެނީ ވެސް އެސޯސިއޭޝަންގެ ހިންގާ ކޮމިޓީގެ ބާރު ހިންގޭ ގޮތަށް އޮންނަ ރަށްތަކަށެވެ. އެއީ، އިންތިހާބަކާ ދިމާކޮށް، އެ ބީޑީސީތަކެއްގެ ބޭނުން ރަނގަޅަށް ހިފޭނެ ގޮތެއް ބަލައިފަ އެވެ. ބެޑްމިންޓަން ކްލަބްތަކަށް ނުލިބޭ ފަދަ ހައްގުތަކެއް، ބީޑީސީތަކަށް ދީފައި އޮންނަ އޮތުމުގައި ވެސް ހަމަހަމަކަން ގެއްލޭ ފަދަ ގޮތަކަށް ކަންކަން ފަހިވެފައި އޮތް ކަމަކީ ވެސް ކަންބޮޑުވުމެކެވެ. މިއީ ގުޑް ގަވަރްނަންސް އާ މުޅިން ހިލާފު އަމަލެއްގެ ގޮތުގައި، ކުޅިވަރު އެޑްމިނިސްޓްރޭޓަރުން ވެސް ފާހަގަކުރެ އެވެ.
ބެޑްމިންޓަން އެސޯސިއޭޝަންގެ ގަވާއިދު އޮންނަ ގޮތުން، އެސޯސިއޭޝަނުގައި ރަޖިސްޓްރީކުރާ ބީޑީސީތަކުން އިންތިހާބަށް ވޯޓުލާއިރު، ކޮންމެ 10 މެމްބަރަކަށް 15 ވޯޓު ލެވެ އެވެ. ބީޑީސީތަކަށް މެމްބަރުން ނެގުމުގައި ވަކި އަދަދެއް ބަޔާންކުރާ ވަކި އުސޫލެއް ނެތެވެ. ބީޑީސީ އަކީ ފުރިހަމަ މެމްބަރެއް ކަމަށްވާތީ، ވަކި ފީއެއް ދައްކަން ވެސް ލާޒިމެއް ނުކުރެ އެވެ. އެކަމަކު، 18000 ރުފިޔާ އަހަރަކު ދައްކަން ޖެހޭ، ބެޑްމިންޓަން ކްލަބްތަކަށް އެންމެ ގިނަ ވެގެން ވެސް ހިމެނެނީ، 15 މެމްބަރުންނެވެ. އެ އަށް ވުރެ އިތުރެއް ނުކުރެވެ އެވެ.
މި ފަހަރުގެ އިންތިހާބުގައި، ބެޑްމިންޓަން ޑިވެލޮޮޕްމަންޓް ކޮމިޓީތަކުން ވޯޓު ލަނީ ކިތަން މެމްބަރުން ކަމެއް ހާމައެއް ނުކުރެ އެވެ. ގިނަ ބަޔަކު ދެކޭގޮތުގައި، މިއީ އިންތިހާބަށް ނުފޫޒު ފޯރުވުމުގެ ގޮތުން، ސިއްރުކޮށްފައިވާ ނަމްބަރެކެވެ.
އިންތިހާބުގައި ފަރުދީ މެމްބަރުންގެ ގޮތުގައި ވޯޓުލާން ފުރުސަތު ދީފައިވަނީ 80 މެމްބަރުންނަށެވެ. މި ލިސްޓާ މެދު ވެސް ޝަކުވާތައް ގިނަ އެވެ. އަދި މި ލިސްޓުގައި، އިންތިހާބަށް ނުފޫޒު ފޯރުވަން ވަކި ބައެއްްގެ ނަންތަކެއް ހިމަނާފައިވާ ކަމަށް ވެސް ތުހުމަތުތަކެއް އަމާޒުވެ އެވެ.
ބެޑްމިންޓަން އެސޯސިއޭޝަނުން ބުނީ، ފަރުދީ މެމްބަރުންނަށް ފުރުސަތު ދީފައިވަނީ، އެސޯސިއޭޝަންގެ ހިންގާ ޤަވާއިދުގައިވާ ގޮތުގެ މަތިން އަމިއްލަ މެމްބަރުންގެ ތެރެއިން ފާއިތުވި އަހަރުގެ ޖޫން މަހުގެ ނިޔަލަށް ރަޖިސްޓްރޭޝަން ހައްދަވާފައިވާ، 31 ޖެނުއަރީ 2024 ވަނަ ދުވަހުގެ ނިޔަލަށް، 2024 ވަނަ އަހަރުގެ ފުރަތަމަ ކުއާޓަރަށް މެމްބަރޝިޕް ފީ ދައްކަވާފައިވާ އަމިއްލަ މެމްބަރުންނަށް ކަމަށެވެ.
